ကြီးမားသောအကောက်ခွန်များအတွက် အမေရိကန်နှင့် ညှိနှိုင်းဆွေးနွေးမှုတစ်စိတ် တစ်ပိုင်းအနေဖြင့် အင်ဒိုနီးရှားသည် ၎င်းတို့၏ လောင်စာဆီတင်သွင်းမှုအချို့ကို စင်ကာပူမှ အမေရိကန်သို့ပြောင်းလဲရန် စီစဉ်နေကြောင်း အင်ဒိုနီးရှားစွမ်းအင်ဝန်ကြီး Bahil Lahadalia က မေလ ၁၂ ရက်နေ့က ပြောကြားခဲ့ပါသည်။ အမေရိကန်သည် အင်ဒိုနီးရှားကုန်ပစ္စည်းများ အပေါ် အကောက်ခွန် ၃၂ ရာခိုင်နှုန်းချမှတ်ထားသော်လည်း အခြားနိုင်ငံများကဲ့သို့ ညှိနှိုင်း ဆွေးနွေးရန်အတွက် ဇူလိုင်လအထိ ရပ်တန့်ပေးထားကြောင်း သိရပါသည်။ Bahil က စင်ကာပူထံမှစွမ်းအင်တင်သွင်းမှု ပြောင်းလဲခြင်းသည် တစ်ဖြည်းဖြည်း ဖြစ်ပေါ်လာမည် ဖြစ်ကြောင်းနှင့် ကနဦးအဆင့်တွင် အင်ဒိုနီးရှားသည် ၎င်းတို့၏ စုစုပေါင်းစွမ်းအင်တင်သွင်းမှု ၏ ၆၀ ရာခိုင်နှုန်းကို စင်ကာပူမှ အမေရိကန်သို့ လာမည့် ၆လ အတွင်းပြောင်းရွှေ့မည်ဟု ပြောကြားခဲ့ပါသည်။ အမေရိကန်ထံမှ လောင်စာဆီတင်သွင်းမှုမြှင့်တင်ခြင်းသည် အကောက် ခွန်များကို ဖြေရှင်းရန် အင်ဒိုနီးရှားက အမေရိကန်ကို အဆိုပြုသည့် ကျယ်ပြန့်သော ကမ်းလှမ်းချက်၏ တစ်စိတ်တစ်ပိုင်းဖြစ်ကြောင်း သိရပါသည်။ အစိုးရသည် လောင်စာဆီ၊ ရေနံစိမ်းနှင့် LNG တို့ပါဝင်သော အမေရိကန်ထံမှစွမ်းအင်တင်သွင်းမှုကို အမေရိကန်ဒေါ်လာ ၁၀ ဘီလီယံတန်ဖိုးထိ တိုးမြှင့်သွားရန် အလိုရှိကြောင်း သိရပါသည်။ Bahil က အင်ဒိုနီးရှားသည် အမေရိကန်ထံမှလောင်စာဆီတင်သွင်းမှုကို ယခုပမာဏထက် ၁၀ ဆထိ မြှင့်တင်သွား ရန်အလိုရှိကြောင်း ပြောကြားခဲ့ပါသည်။ လတ်တလောတွင် လောင်စာဆီတင်သွင်းမှု၏ ၄ ရာခိုင်နှုန်းသာ အမေရိကန်ထံမှ တင်သွင်းခြင်းဖြစ်ကြောင်း သိရပါသည်။ နိုင်ငံပိုင်စွမ်းအင် လုပ်ငန်းဖြစ်သည့် Pertamina က ၎င်းတို့သည် အစီအစဉ်ကို အကောင်အထည်ဖော်ရန် အဆင်သင့်ဖြစ်နေကြောင်းနှင့် အမေရိကန်လောင်စာဆီများကိုသိုလှောင်ရန် ၎င်းတို့၏ လောင်စာဆီသိုလှောင်ကန်များကို တိုးမြှင့်ရန်လိုအပ်ကြောင်း ပြောကြားခဲ့ပါသည်။
Reference; Bangkok Post
DOCA(ရန်ကုန်)