ထိုင်းနိုင်ငံအစိုးရသည် ထိုင်းရိုးရာဆေးဝါးက နိုင်ငံ၏ အများပြည်သူကျန်းမာရေးစနစ်တွင် ပါဝင်မှုကို ၁၀ ရာခိုင်နှုန်းထိ မြှင့်တင်နိုင်ရန်အတွက် ပြည်တွင်းတိုင်းရင်းဆေးလုပ်ငန်းကို ပံ့ပိုးပေးရန် တိုက်တွန်းခြင်းခံရကြောင်း သိရပါသည်။ ထိုင်းနိုင်ငံစက်မှုလုပ်ငန်းအဖွဲ့ချုပ်၏ ထိုင်းတိုင်းရင်းဆေးလုပ်ငန်းအသင်း၏ ဥက္ကဌဖြစ်သူ Sittichai Daengprasert က နိုင်ငံတော် ၏ပံ့ပိုးပေးမှုသည် SME လုပ်ငန်းများပါဝင်သော တိုင်းရင်းဆေးထုတ်လုပ်သူများကြား ယုံကြည်မှုတည်ဆောက်ပေးနိုင်ရန်၊ ပို့ကုန်မြှင့်တင်ရန်နှင့် စီးပွားရေးအစီအစဉ်များဆုံးဖြတ် ချက်ချရာတွင် ကူညီပေးနိုင်မည်ဟု ပြောကြားခဲ့ပါသည်။ Mr Sittichai က ထိုအစီအစဉ်သည် ထိုင်းနိုင်ငံအား အာဆီယံတွင် တိုင်းရင်းဆေးထုတ်လုပ်ရာအချက်အချာဖြစ်လာရန် တိုက်ရိုက် နည်းလမ်းဖြစ်သော်လည်း နိုင်ငံတွင်း ရိုးရာဆေးဝါးများကို ကျယ်ပြန့်စွာအသုံးပြုရန်လိုအပ် ကြောင်း ပြောကြားခဲ့ပါသည်။ တိုင်းရင်းဆေးဝါးများသည် အများပြည်သူကျန်းမာရေးစနစ် တွင် အသုံးပြုသည့် ဆေးဝါးများ၏ ၂.၂၁ ရာခိုင်နှုန်းသာ ကိုယ်စားပြုပြီး တင်သွင်းသည့် ဆေးဝါးများကလွှမ်းမိုးထားကြောင်း သိရပါသည်။ ပြည်တွင်းတိုင်းရင်းဆေးဝါးများ၏ တန်ဖိုးသည် ဘတ် ၁.၅ ဘီလီယံသာရှိပြီး စုစုပေါင်းဆေးဝါးအားလုံးတန်ဖိုးမှာ ဘတ် ၇၀.၅ ဘီလီယံ ရှိကြောင်း သိရပါသည်။ ထိုင်းတိုင်းရင်းဆေးထုတ်ကုန်များအသင်း ဥက္ကဌ ဖြစ်သူ Saran Jaewjira က နိုင်ငံတော်၏ အရေးပါသောဆေးဝါးများစာရင်းတွင် တိုင်းရင်းဆေး ထုတ်ကုန် ၁၁၆ မျိုးသာပါဝင်သောကြောင့် အစိုးရသည် ရိုးရာဆေးဝါးများပိုမိုကြီးမားစွာအသုံးပြုခြင်းကို မြှင့်တင်ပေးသင့်ကြောင်း ပြောကြားခဲ့ပါသည်။ ထိုင်းနိုင်ငံသည် အရှေ့တောင်အာရှတွင် အကြီးမားဆုံး တိုင်းရင်းဆေးတင်ပို့သူဖြစ်သော်လည်း ကမ္ဘာ့ဈေးကွက်တွင် ထိပ်တန်းတင်ပို့ သူ ၁၀ ခုပြင်ပတွင် ရောက်ရှိနေကြောင်း သိရပါသည်။ ထိုင်းတိုင်းရင်းဆေးထုတ်ကုန်များ တင်ပို့မှုအများစုမှာ ဂျပန်နိုင်ငံသို့ဖြစ်ပြီး စုစုပေါင်းတင်ပို့မှု၏ ၁၉.၅ ရာခိုင်နှုန်းရှိကာ အိန္ဒိယ သို့တင်ပို့မှုမှာ ၁၄.၈ ရာခိုင်နှုန်း၊ တရုတ်သို့တင်ပို့မှုမှာ ၁၃.၆ ရာခိုင်နှုန်း၊ ဆော်ဒီအာရေဘီးယား သို့တင်ပို့မှုမှာ ၁၃ ရာခိုင်နှုန်းနှင့် ကျန် ၃၉.၁ ရာခိုင်နှုန်းမှာ အခြားနိုင်ငံများသို့ဖြစ်ကြောင်း သိရပါသည်။ တိုင်းရင်းဆေးလုပ်ငန်းအသင်းကလည်း ပြည်တွင်းတိုင်းရင်းဆေးထုတ်လုပ်သူများအား အဓိကစံနှုန်း ၂ ခုဖြစ်သည့် Good Manufacturing Practice (GMP) နှင့် the Pharmaceutical Inspection Co-operation Scheme (PIC/S) တို့ပြည့်မီစွာထုတ်လုပ်ရန် တိုက်တွန်းပြောကြားခဲ့ကြောင်း သိရပါသည်။
Reference; Bangkok Post
DOCA(ရန်ကုန်)