မွန်ပြည်နယ်၊ မုဒုံမြို့နယ်၊ ကော့ခိုက်ကျေးရွာတွင် ဂန္ဓမာပန်း တစ်နိုင်တစ်ပိုင် စိုက်ပျိုး သူများ နေ့စဥ်ပုံမှန်ဝင်ငွေရရှိသည်။
“ပန်းပျိုးပင်များကို တစ်လကြာပျိုးထားပြီး စစိုက်သည့်အချိန်ကနေ နှစ်လခန့် အကြာမှာ နုတ်ယူ ရောင်းချနိုင်ပါတယ်၊ စိုက်ခင်းထဲမှာ ပန်းပင် သုံးသောင်းကျော် စိုက်ပျိုးတဲ့ ကုန်ကျစရိတ်က ကျပ်သုံးသိန်းဝန်းကျင်ရှိပါတယ်။ တစ်ရက်ကို ပန်းရောင်းရငွေ ကျပ်သုံး သောင်းနီးပါး ရှိပါတယ်။ ဂန္ဓမာပန်းတွေမှာ တစ်ရိုးတစ်ပွင့်ပန်းနဲ့ အခိုင်လိုက်ထားတဲ့ ပန်းဆိုပြီး နှစ်မျိုးရှိပါတယ်၊ ဂန္ဓမာ၊ ကြွေဖြူ၊ ရွှေဝါ စတဲ့ ဂန္ဓမာပန်းအမျိုး အစားတွေကို အဓိကစိုက်ဖြစ်ပါတယ်။ မိုးတွင်းအချိန်မှာဆို ပန်းပင်တွေကို အမိုးမိုးပြီးစိုက်ရတဲ့အတွက် အမြတ်နည်းပါတယ်၊ နွေရာသီမှာတော့ ရေပြဿနာကြောင့် နည်း နည်းပါးပါးပဲ စိုက်ပါတယ်၊ အခုလိုရာသီမှာ ပန်းအထွက်များပြီး စိုက်ရတာ အဆင်ပြေ ပါတယ်” လို့ ပန်းစိုက်တောင်သူ ဦးဝင်းဌေးက ပြောသည်။
မုဒုံမြို့နယ် ကော့ခိုက်ကျေးရွာတွင် စိုက်ပျိုးရေးလုပ်ငန်းအဖြစ် ပန်းပင်များ အဓိက စိုက်ပျိုးကြောင်း၊ အိမ်ခြံဝင်းနှင့် စိုက်ပျိုးမြေများတွင် မေမြို့ပန်း၊ ဂန္ဓမာပန်း၊ ရွှေဝါပန်း စသည့်ပန်းအမျိုးအစားများကို တစ်နိုင်တစ်ပိုင် စိုက်ပျိုးကြခြင်းဖြစ်ကြောင်း သိရသည်။
DOCA(မွန်)