မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ် အနှံ့အပြားတွင် မန်ကျည်းပင်များအလေ့ကျ ပေါက်ရောက်မှုများပြီး မန်ကျည်းသီးအများအပြားထွက်ရှိရာ ဒေသတစ်ခုလည်းဖြစ်ပါသည်။ မန္တလေးတိုင်းဒေသကြီးအတွင်း မန်ကျည်းသီးအများဆုံး ထွက်ရှိရာ ဒေသများအနေဖြင့် ကျောက်ပန်းတောင်း၊ မိတ္ထီလာ၊ ရမည်းသင်း၊ ပျော်ဘွယ်၊ တပ်ကုန်း၊ ပျဉ်းမနား စသည့်ဒေသများဖြစ်ပြီး၊ ကျောက်ပန်းတောင်းမြို့နယ်အတွင်း မန်ကျည်းသီးအများဆုံးစိုက်ပျိုးထွက်ရှိသော ကျေးရွာများမှာ ပုပ္ပား၊ ဆုံကုန်း၊ မြောက်တော၊ ချိုင်း၊ ပုပ္ပားလွင်၊ သံဘို၊ ဆည်ပေါက်၊ ညောင်ကန်ကျေးရွာတို့ဖြစ်ပြီး ပုပ္ပားကျေးရွာအုပ်စုမှ ထွက်ရှိသောမန်ကျည်းသီးမှာ အရည်အသွေး အကောင်းမွန်ဆုံး ဖြစ်ပါသည်။
ကျောက်ပန်းတောင်းမြို့နယ် အတွင်းရှိမန်ကျည်းသီးစိုက်ပျိုးသော မန်ကျည်းတောင်သူ များသည် နှစ်စဉ် ဇန္နဝါရီလနောက်ဆုံးပတ်ခန့်တွင် မန်ကျည်းသီးများစတင်ခူးဆွတ်ပြီး မန်ကျည်းအသား၊ အလုံး အဖြစ်စတင်အရောင်းအဝယ်ပြုလုပ်ကြပါသည်။ မန်ကျည်းသီး မှည့်တွင် အကြောပါအစေ့ပါ ၊ အကြောမပါ အစေ့ပါနှင့်အကြောမပါအစေ့မပါ မကျည်း အသားဖတ်ဟူ၍ သုံးမျိုးရှိပြီး ဈေးကွက်အတွင်း အကြောမပါ အစေ့မပါ မန်ကျည်းသီးမှည့်(အသားဖတ်)များကို လူကြိုက်များ၍ အရောင်းအဝယ်ပိုဖြစ်ကြောင်း၊ မန်ကျည်းသီးမှည့်ကို အကြောသင်ခြင်း၊ အစေ့ထုတ်ခြင်း၊ အစေ့အသားခွဲခြားခြင်းတို့ ဆောင်ရွက်ရသည့်အတွက် အစေ့ပါမန်ကျည်းသီး မှည့်ထက်ဈေးပိုရကြောင်း သိရသည်။
၂၀၂၅ ခုနှစ်၊ မေလ ဒုတိယပတ်တွင်ဖြစ်ပေါ်နေသော အစေ့ပါ ထိပ်စမန်ကျည်းသီးမှည့် လက်ကားတစ်ပိဿာလျှင်(၃၅၀၀)ကျပ်၊ အလတ်စတစ်ပိဿာလျှင်(၃၀၀၀)ကျပ်၊ အစေ့လွတ် ထိပ်စ(အသား)တစ်ပိဿာလျှင်(၇၀၀၀)ကျပ်၊ အလတ်စ(အသေး)တစ်ပိဿာလျှင် (၆၈၀၀) ကျပ်နှင့် အကြောမပါ အစေ့ပါတစ်ပိဿာလျှင်(၃၇၀၀)ကျပ်တို့ဖြင့် အရောင်းအဝယ်ဖြစ်ပေါ် လျက်ရှိပြီး၊ ယခင်ဧပြီကာလတူနှင့် နှိုင်းယှဉ်လျှင် တစ်လအတွင်း မန်ကျည်းမှည့် အစေ့လွတ်ထိပ်စအသားတစ်ပိဿာလျှင်(၂၀၀)ကျပ်ခန့် ဈေးတက်ခဲ့ကြောင်း သိရသည်။
မန်ကျည်းသီးမှည့်အသားများကို ကျောက်ပန်းတောင်းမြို့ပေါ်ရှိ ပွဲရုံများသို့ လာရောက်ရောင်းချကြသဖြင့် ကုန်ဝင်ရောက်မှုရှိပြီး ပြန်လည်ရောင်းချကြောင်း၊ အကြော်ဆိုင်၊ အကင်ဆိုင်များနှင့် အခြားမန်ကျည်းချဉ်ဖြင့် တွဲဖက်၍ စားသုံးရသော အစားအစာဆိုင်များမှ အချဉ်ရည်ပြုလုပ်ရန် ဝယ်ယူခြင်း၊ လုပ်ငန်းရှင် မန်ကျည်းပွဲစားကြီးများမှလည်း သိုလှောင်ရန် အများအပြား ဝယ်ယူသည့်အပြင် ရန်ကုန်ဘုရင့်နောင်ပွဲရုံများသို့လည်း တင်ပို့ရောင်းချလျက် ရှိကြောင်း ဒေသခံကုန်သည်များထံမှ သိရသည်။
DOCA(မန္တလေး)