မကွေးတိုင်းဒေသကြီး၊ ပွင့်ဖြူမြို့နယ် မုန်းချောင်းဘေးတစ်လျှောက်ရှိ ကျေးရွာများမှ ဒေသခံတောင်သူများသည် မဲဇလီရေလွှဲဆည်ရေဖြင့် စပါး၊ နှမ်း၊ မြေပဲ၊ ပဲထောပတ်၊ ပဲတီစိမ်း၊ စိုက်ပျိုးကြပြီး မုန်းချောင်းဘေးတစ်လျှောက်ရှိ မြေနုကျွန်းနှင့် ကိုင်းမြေများတွင် ဟင်းသီးဟင်းရွက် စားပင်သီးနှံမျိုးစုံ နှင့် နှစ်ရှည်သီးနှံများကို စီးပွားဖြစ်စိုက်ပျိုး လုပ်ကိုင်ကြကြောင်းသိရသည်။ အချို့သောဒေသခံ တောင်သူများသည် ရေလွှဲဆည်ရေများနှင့် မြေအောက်ရေများကိုအမှီပြု၍ စပါး၊ ကုလားပဲ စိုက်ပျိုးမှုနှင့်အတူ ငှက်ပျောစိုက်ပျိုးရေးလုပ်ငန်းကိုပါ စီးပွားဖြစ်တွဲဖက်စိုက်ပျိုးလုပ်ကိုင်ကြပြီး ယခုနှစ်တွင် ငှက်ပျောစိုက်ခင်းများ အောင်မြင်ဖြစ်ထွန်းလျှက်ရှိကာ ငှက်ပျောအထွက်နှုန်း ကောင်းမွန်လျှက်ရှိကြောင်း သိရှိရပါသည်။
ပွင့်ဖြူမြို့နယ်ရှိ ဒေသခံအချို့မှာ ဥယျာဉ်ခြံမြေများတွင် ဖီးကြမ်းငှက်ပျော၊ ငှက်ပျောချဉ်၊ သီးမွှေး ငှက်ပျော၊ ရခိုင်ငှက်ပျောတို့ကို စီးပွားဖြစ် စိုက်ပျိုးလုပ်ကိုင်ကြကြောင်း၊ ပွင့်ဖြူဒေသတွင် ဖီးကြမ်း ငှက်ပျောကို အများဆုံးစိုက်ပျိုးကြကြောင်း သိရှိရပါသည်။ ဖီးကြမ်းငှက်ပျောသည် စားသုံးသူများ အကြိုက်တွေ့ကာ လူမျိုးဘာသာဆင်းရဲချမ်းသာမရွေး ဝယ်ယူစားသုံးနိုင်သည့်အပြင် တစ်နေ့လျှင် ဖီးကြမ်းငှက်ပျောသီး (၃)လုံးစားပေးခြင်းဖြင့် အဆစ်အမြစ်ရောင်ရမ်းခြင်းသက်သာစေပြီး ကျန်းမာရေးအတွက် များစွာအထောက်အကူပြုသည့်အပြင် ဈေးနှုန်းလည်းသက်သာသည့်အတွက် မကွေးတိုင်း အတွင်းရှိ မြို့ပေါ်နှင့် ကျေးလက်နေ ပြည်သူများမှ ဝယ်ယူစားသုံးမှုများသည့်အတွက် တောင်သူများအတွက် တစ်နှစ်ပတ်လုံး ဝင်ငွေရ၍ စီးပွားရေးအတွက်လည်း တစ်ဖက်တစ်လမ်းမှ အထောက်အကူပြုကြောင်းသိရှိရပါသည်။ ငှက်ပျောပင်ကို စတင်စိုက်ပျိုးရာတွင် ပေါင်းမြတ်များရှင်းပြီး မြေတစ်ဧကကို ငှက်ပျောပင်(၃၀၀)လောက် အကွက်ချ၍ စိုက်ပျိုးပြီး (၆)လ/ (၁)နှစ်အကြာတွင် ငှက်ပျောတစ်ဧကလျှင် အပင်(၈၀၀ မှ ၁၀၀၀)ခန့်ထိ ပွားလာကြောင်း သိရှိရပါသည်။ မကွေးတိုင်းဒေသကြီးတွင် မြစ်အနောက် ဘက်ကမ်းဖြစ်သော စကု၊ ပွင့်ဖြူနှင့် စလင်းနယ်မြေတစ်ကြောတွင် ငှက်ပျောစိုက်ဧက (၃၀၀၀)ကျော် ခန့်ရှိကြောင်းသိရှိရပါသည်။ ဈေးကွက်အတွင်း ဖီးကြမ်းငှက်ပျော (အဖီးလှလှ)တစ်ဖီးလျှင် ငွေကျပ် (၁၀၀၀ မှ ၁၂၀၀)နှုန်း၊ ဖီးကြမ်းငှက်ပျော (ပုံမှန်အဖီး)တစ်ဖီးလျှင် ငွေကျပ်(၈၀၀ မှ ၁၀၀၀)နှုန်းဖြင့် အရောင်းအဝယ်ဖြစ်နေကြောင်းနှင့် ပွင့်ဖြူဒေသထွက် ငှက်ပျောသီးများကို မကွေး၊ မင်းဘူးနှင့် အခြားမြို့ကြီးများသို့လည်း တင်ပို့ရောင်းချနေရသည့်အတွက် ပွင့်ဖြူနယ်ရှိတောင်သူများ တစ်ဖက်တစ်လမ်းမှ စားဝတ်နေရေးအတွက် အထောက်အကူပြုလျှက်ရှိကြောင်း သိရှိရပါသည်။
DOCA(မကွေး)