ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ တာချီလိတ်မြို့နယ်တာဝန်ခံရုံးမှ ဝန်ထမ်း များသည် ပန်းတိမ်ငိုပန်းစိုက်ပျိုးထုတ်လုပ်မှုနှင့် ဈေးနှုန်း/ဈေးကွက်အခြေအနေအား သိရှိနိုင်ရန် တာချီလိတ်မြို့နယ်၊ ဟောင်လိတ်ကျေးရွာသို့ (၃၀.၆.၂၀၂၂)ရက်နေ့ နံနက်(၁၀:၀၀)အချိန်တွင် ကွင်းဆင်း လေ့လာဆောင်ရွက်ခဲ့ပါသည်။
တာချီလိတ်မြို့နယ်တွင် ပန်းတိမ်ငိုပန်းစိုက်ပျိုးဧက(၂၀)ခန့်ရှိပြီး ဟောင်လိတ်ကျေးရွာတွင်(၅) ဧကခန့်စိုက်ပျိုးထားပါသည်။ ပန်းတိမ်ငိုပန်းမျိုးကို တောင်ကြီးမြို့မှမှာယူ၍ ပျိုးထောင်စိုက်ပျိုးရ သည်ဟု သိရသည်။ ပန်းတိမ်ငိုပန်းကိုစိုက်ပျိုးရာတွင် မြေကိုနွားချေးနှင့်ရော၍ပြုပြင်ပြီး ပင်ကြား တန်းကြား(၁၅)လက်မခြားကာ စိုက်ပျိုးရသည်။ အပင်အားဆေး(ရွက်ဖြန်းမြေဩဇာ)ကို တစ်ပတ်လျှင် တစ်ကြိမ်ဖြန်းပေးရပြီး ပိုးသတ်ဆေးကိုအပင်အနေအထားကြည့်၍ လိုအပ်သလိုဖြန်းပေးရသည်။ ပန်းတိမ်ငိုပန်းပင်စိုက်ပျိုးရာတွင် မြေအစိုဓာတ်အမြဲရှိနေရန် ရေကိုနေ့စဉ်ဂရုတစိုက်လောင်းပေးရ သကဲ့သို့ နေရောင်ခြည်တိုက်ရိုက်မကျစေရန် စိုက်ပျိုးရေးဇကာကိုမိုးပေးရသည့်အတွက် တစ်ဧက စိုက်ပျိုးကုန်ကျစရိတ်မှာ ကျပ်(၃၅)သိန်းခန့်ကုန်ကျသည်ဟု သိရပါသည်။ မြေတစ်ဧကလျှင် ပန်းပင် (၁)သိန်းကျော်စိုက်ပျိုးနိုင်ပြီး ရောင်းတန်းဝင်အပင်ရေ(၉)သောင်းခွဲခန့်ရှိပါသည်။ နှစ်စဉ်ဧပြီလတွင် စတင်စိုက်ပျိုးပြီး ဇွန်လမှနိုဝင်ဘာလအတွင်းခူးယူရောင်းချကြသည်။ ပန်းတိမ်ငိုပန်းတစ်ပင်ကို စတင် ပေါ်ချိန်တွင်(၆၀၀)ကျပ်ရရှိပြီး နောက်ပိုင်းတွင်(၄၀၀/၅၀၀)ကျပ်ခန့်သာ ရောင်းချရသည်ဟု သိရပါသည်။
ပန်းတိမ်ငိုပန်းပေါ်ချိန်တွင် တာချီလိတ်မြို့နယ်အတွင်းမှဈေးများတွင် လက်လီ/လက်ကား ဖြန့်ချိရောင်းချသကဲ့သို့ ရှမ်းပြည်နယ်(အရှေ့ပိုင်း)မိုင်းဖြတ်မြို့နယ်၊ မိုင်းယောင်းမြို့နယ်နှင့် ထိုင်းနိုင်ငံသို့လည်း တစ်ပိုင်တစ်နိုင်တင်ပို့ရောင်းချသည်ဟု ဟောင်လိတ်ကျေးရွာရှိ ပန်းတိမ်ငိုပန်းပင်(၂)ဧက ခန့်စိုက်ပျိုးထားသော ဦးသိန်းလွင်ထံမှ သိရှိရပါသည်။
သို့ဖြစ်ပါ၍ ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်အတွင်းရှိ ပန်းစိုက်တောင်သူများ သည် နှစ်စဉ်ပန်းတိမ်ငိုပန်းစိုက်ပျိုးခြင်းကို မိသားစုစီးပွားရေးလုပ်ငန်းအနေအဖြင့် အဓိကထားလုပ် ကိုင်ကြကာအဆင်ပြေနေသကဲ့သို့ အခြားမြို့နယ်များတွင်လည်း ပန်းတိမ်ငိုပန်းကို မိသားစုတစ်ပိုင် တစ်နိုင် ဝင်ငွေရရှိရန်စိုက်ပျိုးသင့်ပါကြောင်း အကြံပြုရေးသားလိုက်ရပါသည်။
DOCA(ရှမ်း)