ယခုနှစ်တွင် တရုတ်နှင့် ဘော့စနီးယားနှင့် ဟာဇီဂိုဗီးနား (BiH) သံတမန်ဆက်ဆံရေး နှစ် ၃၀ ပြည့်အထိမ်းအမှတ်အဖြစ် ဗီဇာကင်းစင်ရေးမူဝါဒသည် Sarajevo ၏ ခရီးသွား လုပ်ငန်းတွင် တိုးတက်မှုအရှိန်အဟုန်ကို မြင့်တင်ပေးလျှက်ရှိကြောင်း မကြာသေးမီက ဆင်ဟွာနှင့် တွေ့ဆုံ မေးမြန်းခန်းတွင် Sarajevo Canton Tourist Board ဥက္ကဋ္ဌက ပြောကြားခဲ့သည်။ Haris Fazlagic က လွန်ခဲ့သည့် ၇ နှစ်က စတင်ခဲ့သော ဗီဇာကင်းစင်ရေးမူဝါဒသည် လူအချင်းချင်း ဖလှယ်မှု သိသိသာသာ အားကောင်းလာကြောင်း အလေးပေးပြောကြားခဲ့သည်။ တရုတ်ခရီးသွားများသည် ၂၀၁၈ နှင့် ၂၀၁၉ ခုနှစ်အတွင်း Sarajevo သို့ အများဆုံးလာရောက်လည်ပတ်ကြသည်ဟု ၎င်းက ဆိုသည်။ ကပ်ရောဂါကာလအတွင်း ကမ္ဘာလုံးဆိုင်ရာ ခရီးသွားလာမှု နှေးကွေးသော်လည်း ၂၀၂၄ ခုနှစ်တွင် ပြန်လည်ကောင်းမွန်လာခဲ့ပြီး တရုတ်ခရီးသွား ၆၅၀၀၀ နီးပါးနှင့် ညအိပ်ခရီးသည် ၄၈၀၀၀ ကျော် မှတ်တမ်းတင်ခဲ့သည်။ Bascarsija နှင့် Tunnel of Hope တို့ကဲ့သို့ ယဉ်ကျေးမှုပေါင်းစုံနှင့် သမိုင်း ဝင်နေရာများကြောင့် လူသိများသော Sarajevo သည် တရုတ်ခရီးသွားများနှစ်သက်သော "Balkan route" ၏ အဓိကမှတ်တိုင်တစ်ခု ဖြစ်လာခဲ့သည်။ "Walter Defends Sarajevo" ရုပ်ရှင်နှင့် မြို့တော်၏ ချိတ်ဆက်မှုအပေါ် စိတ်ဝင်စားမှုမှာ အထူးအားကောင်းနေဆဲဖြစ်သည်။ Fazlagic က ဗီဇာကင်းစင်ရေးမူဝါဒသည် ခရီးသွားကဏ္ဍတွင် ယုံကြည်မှုကို ဆက်လက်တည်ဆောက်နေကြောင်း အလေးထားပြောကြားခဲ့သည်။ အဓိကလုပ်ဆောင်မှုများတွင် အထူးသဖြင့် ဇိမ်ခံခရီးသွားလုပ်ငန်း ကဏ္ဍတွင် တည်းခိုနေထိုင်နိုင်မှုစွမ်းရည်ကို မြှင့်တင်ရန်နှင့် တရုတ်ပရိသတ်များအတွက် ဆွဲဆောင်နိုင် သော ယဉ်ကျေးမှုပွဲများ စီစဉ်ပေးခြင်းတို့ ပါဝင်သည်ဟု Fazlagic က ထည့်သွင်းပြောကြားခဲ့သည်။ ရှေ့ကိုမျှော်ကြည့်ရင်း၊ Sarajevo သည် တိုက်ရိုက်လေကြောင်းခရီးစဉ်များကို မိတ်ဆက်ရန်၊ တရုတ် မိတ်ဖက်များနှင့် ပူးပေါင်းဆောင်ရွက်မှုကို ချဲ့ထွင်ရန်နှင့် တရုတ်ခရီးသွားများနှင့် အံဝင်ခွင်ကျ ဖြစ်သော ဒစ်ဂျစ်တယ်ငွေပေးချေမှုအက်ပ်များကို မိတ်ဆက်ရန် ရည်ရွယ်ထားသည်။ Fazlagic သည် နှစ်နိုင်ငံကြား သံတမန်ဆက်ဆံရေး နှစ် ၃၀ ပြည့် နှစ်ပတ်လည်အား ခရီးသွားလုပ်ငန်း၊ ယဉ်ကျေးမှုနှင့် စီးပွားရေးဆိုင်ရာ ဆက်ဆံမှုများ ပိုမိုနက်ရှိုင်းလာစေရန် အခွင့်အလမ်းအဖြစ် ရှုမြင်သည်။ BiH နှင့် တရုတ်နိုင်ငံသည် ၁၉၉၅ ခုနှစ် မေလတွင် သံတမန်ဆက်ဆံရေးကို ထူထောင်ခဲ့သည်။ နှစ်နိုင်ငံသဘောတူထားသည့် ဗီဇာကင်းလွတ်ရေးမူဝါဒသည် ၂၀၁၈ ခုနှစ်၊ မေလ ၂၉ ရက်နေ့တွင် တရားဝင်အသက်ဝင်ခဲ့သည်။ ဤသဘောတူညီချက်သည် နှစ်နိုင်ငံစလုံး၏ တရားဝင်သာမန်နိုင်ငံကူး လက်မှတ်ကိုင်ဆောင်ထားသူများအား ဗီဇာမလိုအပ်ဘဲ ရက်ပေါင်း ၁၈၀ ကာလအတွင်း အခြားနိုင်ငံ သို့ ဝင်ရောက်ရန်၊ ဖြတ်သန်းရန် သို့မဟုတ် နေထိုင်ရန် ခွင့်ပြုထားသည်။
Source : Xinhua
DOCA(ရန်ကုန်)