စီးပွားရေးနှင့်ကုန်သွယ်ရေးပူးပေါင်းဆောင်ရွက်မှုအရှိန်မြှင့်တင်မည့် ဗီယက်နမ်နှင့် တူနီးရှား

     လုပ်ငန်းများချိတ်ဆက်မှုနှင့် အပြန်အလှန်ကုန်သွယ်ရေးနှင့် စီးပွားရေးပူးပေါင်း ဆောင်ရွက်မှု အရှိန်မြှင့်တင်ရန်ရည်ရွယ်၍ ဗီယက်နမ်နှင့် တူနီးရှား၏ ဝန်ကြီးဌာနများ၊ ကဏ္ဍများနှင့် စီးပွားရေး လုပ်ငန်းများမှ ကိုယ်စားလှယ် ၆၀ ခန့်သည် အွန်လိုင်းမှတစ်ဆင့် ကုန်သွယ်ရေးကွန်းဖရန့်ကို ဧပြီလ ၂၄ ရက်နေ့က ကျင်းပပြုလုပ်ခဲ့ပါသည်။ ထိုအခမ်းအနားတွင် တူနီးရှားစက်မှု၊ ကုန်သွယ်ရေးနှင့် လက်မှုပညာအသင်းမှ ဒုတိယဥက္ကဌဖြစ်သူ Mohamed Koolie က နှစ်နိုင်ငံကြားပူးပေါင်းဆောင်ရွက် မှုအတွက် အာမခံချက်ရှိသောအလားအလာကို အသားပေး ပြောကြားခဲ့ပြီး ထိုအခမ်းအနားသည် စီးပွားရေးကွန်ယက်အတွက် တန်ဖိုးရှိသောစင်မြင့်တစ်ခု ဖြစ်ကြောင်းနှင့် နှစ်စဉ်အနည်းဆုံး ၂ ကြိမ် ကျင်းပရန်ပြောကြားခဲ့ကြောင်း သိရပါသည်။ လူဦးရေ ၁၂.၅ သန်းနှင့် ဥရောပနှင့်နီးကပ်သည့် မဟာ ဗျူဟာမြောက်တည်နေရာတွင် တည်ရှိခြင်းနှင့် အတူ တူနီးရှားသည် အာဖရိက-အာရပ်ဒေသတွင်း  နိုင်ငံတကာစီးပွားရေးပေါင်းစပ်ထားသည့် နိုင်ငံအဖြစ် သတ်မှတ်ခံထားရကြောင်း သိရပါသည်။ ၂၀၂၄ ခုနှစ်တွင် နှစ်နိုင်ငံကုန်သွယ်ရေးမှာ အမေရိကန်ဒေါ်လာ ၂၆၇ သန်းရှိပြီး ၂၀၂၃ ခုနှစ်ကထက် ၃ ဆ နီးပါးမြင့်တက်ခဲ့ကြောင်း သိရပါသည်။ ဗီယက်နမ်၏ တူနီးရှားသို့ အဓိကပို့ကုန်များတွင် ဖိနပ်၊ ကော်ဖီကြမ်း၊ ငရုတ်ကောင်း၊ သီဟိုဠ်စေ့၊ ပင်လယ်စာနှင့် စက်ပစ္စည်းတို့ပါဝင်ပြီး ပြန်လည်တင်သွင်း သည့် ကုန်ပစ္စည်းများမှာ ပင်လယ်စာ၊ စွံပလွံသီး၊ ဓာတုပစ္စည်းများနှင့် တိရိစ္ဆာန်အစာတို့ ပါဝင်ကြောင်း သိရပါသည်။ တူနီးရှား၏ ကုန်ပစ္စည်းများတင်သွင်းလိုအားမှာ ဆက်လက်မြင့်တက် လျှက်ရှိပြီး အထူးသဖြင့် ကော်ဖီကြမ်း၊ ဆန်နှင့် သကြားတို့တွင် ဖြစ်ကြောင်း သိရပါသည်။၂၀၂၄ ခုနှစ်မှစ၍ တူနီးရှား သည် ပုဂ္ဂလိကလုပ်ငန်းများအား ထိုကုန်ပစ္စည်းအမျိုးအစားများအား တင်သွင်းခွင့် ပြုခဲ့သည့်အတွက် ဗီယက်နမ်စီးပွားရေးလုပ်ငန်းများအပါအဝင် ပြည်ပစီးပွားရေးလုပ်ငန်းများ အတွက် ဈေးကွက်အခွင့် အလမ်းသစ်များ တံခါးဖွင့်ပေးနိုင်ခဲ့ကြောင်း သိရပါသည်။ ကွန်းဖရန့်တွင် ဗီယက်နမ်ကုန်သွယ်ရေးရုံး ကလည်း ဗီယက်နမ်၏ကုန်သွယ်ရေးနှင့် စီးပွားရေးဝန်းကျင်နှင့် ၎င်းတို့၏ ပို့ကုန်-သွင်းကုန်မူဝါဒများ နှင့်ပတ်သတ်၍ ပြောကြားခဲ့ကြောင်း သိရပါသည်။ နှစ်များစွာအတွင်း ဗီယက်နမ်နှင့် တူနီးရှားသည် များစွာသော ကုန်သွယ်ရေးသဘောတူညီချက်များလက်မှတ်ရေးထိုးနိုင်ခဲ့ပြီး ထိုမှတ်တမ်းများ သည် အပြန်အလှန်ကုန်သွယ်ရေးနှင့် ရင်းနှီးမြှုပ်နှံမှုမြှင့်တင်ရန် အားကောင်းသော အခြေခံ အုတ်မြစ်ဖြစ်ခဲ့ကြောင်း သိရပါသည်။ ထိုကွန်းဖရန့်တွင် များစွာသောတူနီးရှားလုပ်ငန်းများသည် ကော်ဖီ၊ ဆန်၊ နို့မှုန့်၊ စက်ပစ္စည်းများနှင့် စားသုံးကုန်ပစ္စည်းများ တင်သွင်းရန် အလားအလာ ရှိသောမိတ်ဖက်များ ရှာဖွေတွေ့ရှိခဲ့သကဲ့သို့ စွံ့ပလွံသီး၊ သံလွင်ဆီနှင့် ပင်လယ်စာတို့ကို ဗီယက်နမ်ဈေးကွက်သို့ တင်ပို့ရန် အခွင့်အလမ်းများကို ရှာဖွေနိုင်ခဲ့ကြောင်း သိရပါသည်။

Reference; Vietnam Plus

DOCA(ရန်ကုန်)