များစွာသောတောင်ကိုရီးယားကုမ္ပဏီများသည် အင်ဒိုနီးရှားသို့ မတည်ငွေထပ်တိုး အမေရိကန်ဒေါ်လာ ၁.၇ ဘီလီယံရင်းနှီးမြှုပ်နှံရန် ဆန္ဒရှိကြောင်း စီးပွားရေးရာညှိနှိုင်းဆွေးနွေးရေးဝန်ကြီး Airlangga Hartarto ကပြောကြားခဲ့ပါသည်။ ထိုကြေညာချက်ကို ၎င်းက သမ္မတ Prabowo Subianto နှင့် တောင်ကိုရီးယားကုမ္ပဏီ ၁၉ ခုတို့ ဂျကာတာတွင် ဆွေးနွေးပြီးနောက် ထုတ်ပြန်ခဲ့ခြင်း ဖြစ်ကြောင်း သိရပါသည်။ တောင်ကိုရီးယားကုမ္ပဏီများသည် အင်ဒိုနီးရှားတွင် အမေရိကန်ဒေါ်လာ ၁၅.၄ ဘီလီယံ ရင်းနှီးမြှုပ်နှံပြီးဖြစ်ပြီး ယခုအခါ ထပ်တိုးအမေရိကန်ဒေါ်လာ ၁.၇ ဘီလီယံ ရင်းနှီးမြှုပ်နှံလိုခြင်းဖြစ်ကြောင်း သိရပါသည်။ Hartarto က ယခုနှစ် စက်တင်ဘာလ သို့မဟုတ် အောက်တိုဘာလတွင် အင်ဒိုနီးရှားနိုင်ငံ၏ အကြီးမားဆုံးရေနံဓာတု စက်ရုံဖွင့်လှစ်မည့် Lotte Chemicals ကို အသားပေးပြောကြားခဲ့ကြောင်း သိရပါသည်။ သမ္မတ Prabowo သည် Danantara Investment Management Agency အောက်ရှိ နိုင်ငံပိုင်လုပ်ငန်းများနှင့် မိတ်ဖက်ဖွဲ့မည့် Lotte ၏ အစီအစဉ်ကိုခွင့်ပြုပေးခဲ့ကြောင်း သိရပါသည်။ အင်ဒိုနီးရှားအစိုးရသည် အလုပ်အကိုင်အခွင့်အလမ်းများဖန်တီးပေးပြီး စက်မှုဆိုင်ရာဂေဟစနစ် အားကောင်းစေရန်ကူညီပေး နိုင်ရန်မျှော်လင့်ရသည့် ထိုရင်းနှီးမြှုပ်နှံမှု အစီအစဉ်များကို အသိအမှတ်ပြုကြောင်း သိရပါသည်။ တစ်ရက်တည်းမှာပင် ကိုရီးယားစက်မှုလုပ်ငန်းအဖွဲ့ချုပ်မှ ကိုယ်စားလှယ်အဖွဲ့သည် အင်ဒိုနီးရှားလုပ်ငန်းရှင်များအသင်းနှင့် အင်ဒိုနီးရှား- တောင်ကိုရီးယား စီးပွားရေးစားပွဲဝိုင်းဆွေးနွေးပွဲ ကျင်းပခဲ့ကြောင်း သိရပါသည်။ ထိုပွဲတွင် နှစ်ဖက်အုပ်စုသည် တောင်ကိုရီးယား-အင်ဒိုနီးရှားစီးပွားရေးကောင်စီတည်ထောင်ရန် သဘောတူညီခဲ့ကြပြီး ပြည့်ဖြိုးမြဲစွမ်းအင်၊ ဒစ်ဂျစ်တယ်အခြေခံအဆောက်အအုံ၊ ဒစ်ဂျစ်တယ်စီးပွားရေးနှင့် ပြုပြင်ထုတ်လုပ်သည့်လုပ်ငန်းများတွင် ပူးပေါင်းဆောင်ရွက်မှုအရှိန် မြှင့်တင်ရန် နားလည်မှု သဝဏ်လွှာ လက်မှတ်ရေးထိုးခဲ့ကြကြောင်း သိရပါသည်။
Reference; Antara News
DOCA(ရန်ကုန်)