ဧရာဝတီတိုင်းဒေသကြီး၊ မအူပင်ခရိုင်အတွင်းရှိ မအူပင်မြို့နယ်နှင့် ညောင်တုန်းမြို့နယ်များသည် ငါးမွေးမြူရေးကန်နှင့် မွေးမြူရေးလုပ်ငန်းများစွာ တည်ရှိသောဒေသကြီး ဖြစ်ပါသည်။
စားသုံးသူရေးရာဦးစီးဌာန၊ မအူပင်ခရိုင်၊ ညောင်တုန်းမြို့နယ် ဦးစီးမှူးဦးအောင်လွင်နှင့် ဝန်ထမ်း များသည် (၁၁.၇.၂၀၂၂)နေ့တွင် ရန်ကုန်၊ ပုသိမ်ကားလမ်းဘေး ဆားမလောက်ကျေးရွာရှိ Master Frrl Mill တိရိစ္ဆာန်အစာတောင့် စက်ရုံပိုင်ရှင် ဦးသိန်းဝင်း၏ စက်ရုံလုပ်ငန်းခွင်အတွင်းသို့ ကွင်းဆင်းလေ့လာမှု ဆောင်ရွက်ခဲ့ပါသည်။
အဆိုပါ ကွင်းဆင်းလေ့လာမှုတွင် တိရိစ္ဆာန်အစာတောင့်စက်ရုံပိုင်ရှင် ဦးသိန်းဝင်းမှ စက်ရုံလုပ်ငန်းခွင်အတွင်း လိုက်လံပြသ၍ မိမိစက်ရုံရှိ BUHLER စက်အမျိုးအစားဖြင့် တစ်ရက်လျှင် အစာတောင့် တန်(၄၀)၊(၅၀) ခန့် ကြိတ်ခွဲထုတ် လုပ်နိုင်ကြောင်း၊ အစာတောင့်ကုန်ချောရရှိရန်အတွက်၊ ဖွဲ့နုကို အဓိက ထားပြီး၊ တွဲဖက်ကုန်ကြမ်းများအဖြစ်၊ ငါးခြောက်အရိုး၊ အသားမှုန့်၊ ပဲဖတ်၊ ပဲခွဲကြမ်း။ နေကြာဖတ်၊ ဝါးဖတ်၊ ပဲပုတ်ဖတ်၊ ဆီအုန်းဖတ်တို့ဖြင့် တိရိစ္ဆာန်များလိုအပ်သည့် ပရိုတိန်းဓါတ်များကို အချိုးကျတွဲဖက်၍ ငါးလေးစာ၊ ငါးလတ်စာ၊ ငါးကြီးစာ၊ များထုတ်လုပ် လျှက်ရှိယုံသာမက ကြက်စာများကိုလည်း ထုတ်လုပ်လျှက်ရှိကြောင်း ဆွေးနွေးတင်ပြခဲ့ပါသည်။
ငါးစာများ၊ မွေးမြူရေးကြက်စာများကို ထုတ်လုပ်ရာတွင် မအူပင်မြို့နယ်နှင့် ညောင်တုန်းမြို့နယ်ရှိ ငါးမွေးမြူရေးကန်များနှင့် ၊ ကြက်မွေးမြူရေးလုပ်ငန်းများမှ ပိုင်ရှင်များကိုယ်တိုင် ကုန်ကြမ်းများပေးပို့၍ တိရိစ္ဆာန်အစာတောင့်များ ကြိတ်ခွဲထုတ်လုပ်ပေးပြီး နဝလီစက်ကြိတ်ခ တစ်ပိဿာ (၆၀)ကျပ်နှုန်းဖြင့် ကြိတ်ခွဲထုတ်လုပ် ပေးလျှက်ရှိကြောင်း ဆွေးနွေးသိရှိခဲ့ပါသည်။
စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်က စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်း၊ စီးပွားရေးလုပ်ငန်းရှင်၏ တာဝန်များကိုအလေးပေး ဆွေးနွေးခဲ့ပြီး၊ တိရိစ္ဆာန် အစာတောင့်စက်ရုံညောင်တုန်းမြို့နယ်တွင် တည်ရှိသောကြောင့် ငါးမွေးမြူရေးလုပ်ငန်းများ၊ ကြက်မွေးမြူရေးလုပ်ငန်းရှင်များ သယ်ယူစရိတ်သက်သာပြီး တိရိစ္ဆာန်များအတွက် အာဟာရပြည့်ဝသော အစာတောင့်များ ထုတ်လုပ်မှုကို ပိုမိုထုတ်လုပ်နိုင်သည့် နည်းလမ်းကောင်းများကို အပြန်အလှန် ဆွေးနွေးခဲ့ကြောင်း သတင်းရရှိပါသည်။
DOCA(ဧရာဝတီ)