အိန္ဒိယနိုင်ငံတွင် မေ ၂၈ ရက်နေ့၌ ဝန်ကြီးချုပ် နာရင်ဒရာမိုဒီက ဥက္ကဋ္ဌအဖြစ် ဦးဆောင်၍ ကျင်းပခဲ့သည့် အစိုးရအဖွဲ့ စီးပွားရေးရာကော်မတီ အစည်းအဝေးမှ ၂၀၂၅-၂၆ သီးနှံစိုက်ပျိုးရေးနှစ်အတွင်း မိုးသီးနှံများအတွက် အစိုးရက အနိမ့်ဆုံးထားရှိ ဝယ်ယူပေးမည့် အခြေခံရည်ညွှန်းဈေးနှုန်း များအား တိုးမြှင့်ရန်အဆိုပြုချက်ကို အတည်ပြုသတ်မှတ်ခဲ့ကြောင်း သိရှိရသည်။
အိန္ဒိယ စိုက်ပျိုးရေးနှင့်လယ်သမားများဖူလုံရေး ဝန်ကြီးဌာန၏ မေ ၂၈ ရက်နေ့ သတင်း ထုတ်ပြန်ချက်အရ မိုးသီးနှံ ၁၄ မျိုးအတွက် ယခင်နှစ် အထောက်အပံ့ပြု အခြေခံရည်ညွှန်းဈေးနှုန်း များ (Minimum Support Price - MSP) အပေါ် နှုန်းထားတိုးမြှင့်မှုသည် သီးနှံအလိုက် အနိမ့်ဆုံး ၁ ရာခိုင်နှုန်းမှ အမြင့်ဆုံး ၁၃.၉ ရာခိုင်နှုန်းရှိကြောင်း၊ MSP ဈေးနှုန်းကို ကုန်ချိန် ၁ ကွင်တယ် (၁၀၀ ကီလိုဂရမ်) လျှင် ပဲတီစိမ်းသီးနှံအတွက် ယခင်နှစ်၌ ၈၆၈၂ ရူပီး သတ်မှတ်ထားရာမှ ၁ ရာခိုင်နှုန်း တိုးမြှင့်လျက် ၈၇၆၈ ရူပီးနှုန်းသို့လည်းကောင်း၊ Ragi ခေါ် ဆပ်နီသီးနှံအတွက် ယခင်နှစ် ဈေးနှုန်း အပေါ် ၁၃.၉ ရာခိုင်နှုန်း တိုးမြှင့်လျက် ၄၈၈၆ ရူပီးနှုန်းသို့လည်းကောင်း ပြောင်းလဲ သတ်မှတ်ခဲ့ ကြောင်း သိရှိရသည်။
ယခုနှစ် မိုးသီးနှံ MSP ဈေးနှုန်းပြင်ဆင်ချက်တွင် စပါးသီးနှံသည် တန်ဖိုးအရ တိုးမြှင့်မှု အနည်းဆုံးဖြစ်ပြီး ကုန်ချိန် ၁ ကွင်တယ်လျှင် ယခင်နှစ်၌ ရိုးရိုးစပါးအတွက် ရူပီး ၂၃၀၀ နှင့် Grade A အဆင့် အထူးစပါးအတွက် ၂၃၂၀ ရူပီးနှုန်း အသီးသီး သတ်မှတ်ခဲ့ရာမှ ယခုနှစ်တွင် ၆၉ ရူပီး (၃ ရာခိုင်နှုန်း) ထပ်ဆောင်းတိုးမြှင့်ပေးခဲ့သည်။ တန်ဖိုးအရ MSP ဈေးနှုန်း တိုးမြှင့်မှုအများဆုံး သီးနှံမှာ ပန်းနှမ်း (Niger seed) ဖြစ်ပြီး ယခင်နှစ်ကထက် ရူပီး ၈၂၀ (၉ ရာခိုင်နှုန်း) ပိုမိုလျက် ၁ ကွင်တယ် လျှင် ၉၅၃၇ ရူပီးနှုန်းသို့ တိုးမြှင့်ခဲ့သည်။
ပြည်ပမှ အဓိကဝယ်ယူတင်သွင်းနေရသော ပဲစင်းငုံသီးနှံအတွက် MSP ဈေးနှုန်းကို ၁ ကွင်တယ်လျှင် ယခင်နှစ်၌ ၇၅၅၀ ရူပီးနှုန်းမှ ယခုနှစ်တွင် ၆ ရာခိုင်နှုန်းတိုးမြှင့်လျက် ရူပီး ၈၀၀၀ နှုန်းသို့လည်းကောင်း၊ မတ်ပဲ MSP ဈေးနှုန်းကို ယခင်နှစ် ရူပီး ၇၄၀၀ နှုန်းမှ ယခု ၅.၄ ရာခိုင်နှုန်းတိုး မြှင့်ပြီး ရူပီး ၇၈၀၀ နှုန်းသို့လည်းကောင်း ပြင်ဆင်သတ်မှတ်ခဲ့ကြောင်း သိရှိရသည်။
အိန္ဒိယပြည်တွင်း၌ မိုးသီးနှံရာသီတွင် အဓိကကျယ်ပြန့်စွာ စိုက်ပျိုးသောသီးနှံမှာ စပါးဖြစ်ပြီး စိုက်ဧရိယာ ဟက်တာပေါင်း ၄၇.၆ သန်းခန့်ရှိသည်။ ထို့အပြင် စပါးစိုက်ပျိုးမှုသည် လယ်ယာကဏ္ဍ၌ အလုပ်အကိုင်ရရှိမှုကို အများဆုံးဖန်တီးပေးလျက်ရှိသည်။
နှစ်စဉ် ဈေးနှုန်းဖောင်းပွမှုနှုန်းသည် ၅ ရာခိုင်နှုန်းဝန်းကျင်တွင် ရှိနေချိန်၌ ယခုတိုးမြှင့်ပေးခဲ့ သော MSP ဈေးနှုန်းမှာ စပါးစိုက်ပျိုးမှုကို မြှင့်တင်ရန် တွန်းအားမပေးနိုင်ပဲ စိုက်ပျိုးလိုမှုကို ကျဆင်းစေနိုင်ကြောင်း၊ ထို့အပြင် မိုးရာသီ ပဲမျိုးစုံအတွက် MSP ဈေးနှုန်းတိုးမြှင့်ပေးမှုသည် အနည်းမျှသာရှိပြီး အခြားသီးနှံများမှ ပဲမျိုးစုံသို့ သီးနှံပြောင်းလဲစိုက်ပျိုးလာစေရေးအတွက် လုံလောက်မှုမရှိပဲ ကိုယ်ပိုင်ထုတ်လုပ်မှုစွမ်းအားဖြင့် ပဲမျိုးစုံဖူလုံမှုစေရေး အစိုးရက ချမှတ်ထားသည့် မျှော်မှန်းချက် ကို ထိခိုက်စေနိုင်ကြောင်း၊ ယခုနှစ် မိုးသီးနှံ MSP ဈေးနှုန်းများ ပြင်ဆင်သတ်မှတ်မှုနှင့် စပ်လျဉ်း၍ Samyukt Kisan Morcha လယ်သမားသင်း၏ ခေါင်းဆောင် Dr Sunilam က အစိုးရသည် စိုက်ပျိုး ထုတ်လုပ်မှုစရိတ် အပေါင်း ၅၀ ရာခိုင်နှုန်း (C2 + 50 per cent) ဟူသည့် ပုံသေနည်းကို အကောင်အထည်ဖော်ခြင်း မပြုသည့်အပြင် လယ်သမားများ၏ ဝင်ငွေနှစ်ဆတိုးမြှင့်စေမည်ဟူသော ကတိကဝတ်ကိုလည်း ဖော်ဆောင်ရန် ပျက်ကွက်ခြင်းဖြစ်သည်ဟု ပြောကြားခဲ့ကြောင်းဖြင့် National Herald သတင်းဌာနက ဖော်ပြထားသည်။
Source: National Herald India, 29 May 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)