တောင်ငူခရိုင်၊ ဖြူးမြို့တွင် အိမ်တိုင်းလိုလို သရက်ပင်များ စိုက်ပျိုးကြပါသည်။ သရက်သီးများမှာ ရင်ကွဲ၊ မချစ်စု၊ မနော်နွယ်၊ စိန်တလုံးစသည်ဖြင့် မျိုးကွဲများရှိရာ စိန်တစ်လုံးသရက်သီးသာ ဈေးကောင်းရရှိ၍ ကျန်သရက်သီးများမှာ ဈေးကွက်သိပ်မရှိပါ။ ထို့ကြောင့် သရက်သီးမှည့်အနေဖြင့် စိန်တစ်လုံးသရက်သီးကိုသာ ခူးဆွတ်၍ အမှည့်အုပ် ရောင်းချကြပြီး ကျန်အသီးများမှာ ခူးဆွတ်ခနှင့် ဈေးကွက် တွက်ချေမကိုက်ပါ။
ထို့ကြောင့် ယခုလို မိုးဦးကျရာသီတွင် အပင်တွင်ကျန်ရှိသော သရက်သီးများမှည့်၍ ကြွေကျလာသောအခါမှ ကောက်ယူ၍ အခွံခွာ၊ အသားအားဓါးဖြင့်ပါးပါးလှီး ဆားထည့်၍ သရက်ပြင် ကျိုကြပါသည်။ သရက်ပြင်ကျိုရန် ကုန်ကျစရိတ်နည်းပါးသောကြောင့် ခြံကျယ်၍ သရက်ပင်ရှိသောသူ အများစုမှာ သရက်ပြင်ကြို၍ ရရှိလာသော သရက်ပျဉ်များအား ရောင်းချကြပါသည်။
သရက်ပြင် ဈေးနှုန်းမှာ တစ်ပိဿာလျှင် ၈၀၀၀ ကျပ်ရှိပြီး နီးစပ်ရာလက်ဆောင်ပေးလိုသူများက ဝယ်ယူမှုများပါသည်။ တစ်ရာသီလျှင် သရက်ပြင် ပိဿာ ၃၀ ခန့်ရရှိကြောင်း၊ ယခုနှစ် ဈေးနှုန်းအရ ၂၄၀၀၀၀ ကျပ်ခန့်အပိုဝင်ငွေရရှိသဖြင့် မိသားစု မီးဖိုချောင်စရိတ်အတွက် အထောက် အကူရရှိကြောင်း သရက်ပြင် ကျိုချက်ရောင်းချသူ ဒေါ်ခင်သက်မော်၏ ပြောပြချက်အရ သိရှိရပါသည်။
DOCA(ပဲခူး)