တိုင်းပြည်သာယာဝပြောရေးနှင့် စားရေရိက္ခာဖူလုံရေးတို့အတွက် တိုင်းရင်းသား ပြည်သူတစ်ရပ်လုံး၏ အကျိုးစီးပွားဖြစ်သော စိုက်ပျိုးရေးနှင့် မွေးမြူရေးကို ခေတ်မီ နည်းစနစ်များဖြင့် တိုးတက်အောင်ဆောင်ရွက်လျှက်ရှိပြီး အခြားစီးပွားရေးကဏ္ဍများကိုလည်း ဘက်စုံဖွံ့ဖြိုး တိုးတက်အောင် ဆောင်ရွက်လျှက်ရှိပါသည်။ ထို့ကြောင့် စိုက်ပျိုးရေးကဏ္ဍများတွင်လည်း ရာသီအလိုက် စိုက်ပျိုးသီးနှံ များအောင်မြင် ဖြစ်ထွန်း၍ လယ်ယာကဏ္ဍဖွံ့ဖြိုးတိုးတက်ရေးသည် အရေးကြီးသဖြင့် အထွက်နှုန်းကောင်းသော သီးနှံများစွာ ထွက်ရှိနိုင်စေရန် သွင်းအားစုများနှင့် မျိုးကောင်းမျိုးသန့်များလည်း အဓိကကျပါသည်။
လယ်ယာကဏ္ဍဖွံ့ဖြိုးတိုးတက်ရေးတွင် မျိုးကောင်းမျိုးသန့်များ စိုက်ပျိုးထုတ်လုပ် နိုင်ခြင်း၊ အထွက်နှုန်းကောင်းခြင်း၊ GAP ဖြစ်ခြင်းနှင့် ထွက်ရှိသီးနှံများ ပြည်တွင်း၌ စားရေးရိက္ခာဖူလုံ၍ ပိုလျှံသည်များကို ပြည်ပဈေးကွက်ရရှိရေးသည်လည်း အဓိကကျလှပေသည်။ ထို့ကြောင့် လယ်ယာကဏ္ဍဖွံ့ဖြိုးတိုးတက်ရေးအတွက် တစ်ဖက်တစ်လမ်းမှ အထောက်အကူပြုသည့် သွင်းအားစုဖြစ်သော ဓါတ်မြေဩဇာပင်ဖြစ်ပါသည်။ ဓါတ်မြေဩဇာဟုဆိုရာတွင်လည်း အမျိုးမျိုးရှိရာ သီးနှံတွင် ဓါတုဆေးကြွင်းမကျန်ရှိစေရေးသည်လည်း GAP သီးနှံဖြစ်ရေးအတွက် အလွန် အရေးကြီး လှပါသည်။ ထို့ကြောင့် ဓါတုဆေးကြွင်းမကျန်ရှိသော သဘာဝမြေဩဇာဖြစ်သည့် စွန့်ပစ်ပစ္စည်းဖြစ်သော ကြက်ချေးမှ ထုတ်လုပ်ထားသော ကြက်ချေး ကွန်ပေါင်း ဓါတ်မြေဩဇာဖြစ်ပါသည်။ မြန်မာနိုင်ငံသည် စိုက်ပျိုးရေးကို အဓိကထား သကဲ့သို့ မွေးမြူရေး လုပ်ငန်းကိုလည်း တစ်ဖက်တစ်လမ်းမှ အားထားရပါသေးသည်။ ယခုဓါတ်မြေဩဇာ သည် ကြက်မွေးမြူရေးခြံများမှထွက်ရှိသော စွန့်ပစ်ကြက်ချေးကို အဓိကအခြေခံ၍ ထုတ်လုပ် ထားသော ကွန်ပေါင်းမြေဩဇာဖြစ်ပါသည်။
ကြက်ချေးကွန်ပေါင်း မြေဩဇာဆိုသည်မှာ မွေးမြူရေးကြက်ခြံများမှ ထွက်ရှိသော စွန့်ပစ်ကြက်ချေးများအား သီးနှံပင်အတွက် တိုက်ရိုက်သုံးစွဲနိုင်ရန် ပေါင်းစပ်ပြုပြင်မွန်းမံ ထုတ်လုပ်သော စိုက်ပျိုးရေးသုံးမြေဩဇာဖြစ်ပါသည်။
မွေးမြူရေးလုပ်ငန်းမှ ဘေးထွက်စွန့်ပစ်ပစ္စည်းဖြစ်သော ကြက်ချေးများသည် ခြံသန့်ရှင်းရေး လုပ်ပြီး ထွက်ရှိလာလျှင်လာချင်း စိုက်ပျိုးသီးနှံပင်များအား တိုက်ရိုက်သုံးစွဲပါက သီးနှံပင်လောင် ကျွမ်းခြင်းများဖြစ်ပေါ်သဖြင့် မသုံးစွဲကြပါ။ ထို့ကြောင့် မွေးမြူရေးခြံများမှ ထွက်ရှိလာသော ကြက်ချေးများအား ခြံနှင့်ဝေးဝေး လွတ်သောနေရာများတွင် စုပုံ၍ထားရှိကြပြီး ၎င်းကြက်ချေး များအား ဆွေးမြေ့သွားမှသာ သဘာဝမြေဩဇာအဖြစ် သုံးစွဲကြပါသည်။ ထိုအခါတွင် ကြက်ချေးတွင် ပါဝင်သော စိုက်ပျိုးသီးနှံအတွက် လိုအပ်သည့် အာဟာရဓါတ်များသည် နေဒဏ်၊ လေဒဏ်တို့ကြောင့် ဆုံးရှုံးမှုများရှိနေပါသည်။ သဘာဝအရ လတ်ဆတ်သော ကြက်ချေးတွင် Nitrogen(2.42%),Phosphate (3.29%),Potassiun (2.11%)ခန့်အာဟာရဓါတ်များပါရှိသော်လည်း ဆွေးမြေ့သွား သော (မြေဆွေးအဆင့်)ကြက်ချေးတွင် ၎င်းအာဟာရဓါတ်များ အပြည့်အဝ မပါရှိနိုင်တော့ပေ။
မွေးမြူရေးခြံများတွင်လည်း စွန့်ပစ်ပစ္စည်းမှ အပိုဝင်ငွေရရှိရန် စိုက်ပျိုးရေးအတွက်လည်း အသုံးဝင်သော မြေဩဇာတစ်ခုဖြစ်ရန် ရည်ရွယ်၍ ကြက်ချေးကွန်ပေါင်းမြေဩဇာအား ပြုလုပ်ထားပါသည်။ ကြက်ချေးကွန်ပေါင်းမြေဩဇာများ ပြုလုပ်ရာတွင် မွေးမြူရေးလုပ်ငန်းထွက် ကြက်ချေးများကို အပင်အတွက် အဓိကလိုအပ် သော အာဟာရများဖြစ်သည့် Nitrogen, Phosphate, Potassium နှင့် ဒုတိယအရေးပါသော အာဟာရဖြစ်သည့် Sulphur, Calcium, Magenesium တို့အပြင် အခြားနည်းလို အာဟာရဓါတ် များဖြင့် ပေါင်းစပ်ပြီး ပေါင်းကန်များထဲတွင် ထည့်သွင်းပေါင်းစပ်ခြင်းလုပ်ငန်းအား လုပ်ဆောင်ရပါသည်။ ထိုမှတစ်ဆင့် ပြည့်စုံစွာ နပ်သွားသော ကြက်ချေးကွန်ပေါင်းမြေဩဇာကုန်ကြမ်းများအား စက်ယန္တရားများဖြင့် အဆင့်ဆင့်ပြုပြင်ပြီး စိုက်ပျိုးထုတ်လုပ်သူ တောင်သူလယ်သမားများ အသင့် သုံးစွဲနိုင်သည့် မြေဩဇာအတောင့်ငယ်လေးများအဖြစ်သို့ ရောက်ရှိအောင်ပြုလုပ်ရပါသည်။ ရာသီမရွေး၊ မြေမရွေး၊ သီးနှံမျိုးစုံမရွေးသုံးစွဲနိုင်သော ကြက်ချေးကွန်ပေါင်းမြေဩဇာအဖြစ် သုံးစွဲရန်ပြုပြင် ထုတ်လုပ်ရောင်းချကြပါသည်။
စိုက်ပျိုးရေးလုပ်ငန်းများအတွက် အကျိုးကျေးဇူးများအနေဖြင့်လည်း သဘာဝမြေဩဇာအား အခြေခံ၍ ထုတ်လုပ်ထားသောကြောင့် မြေဆီလွှာ၏ ရုပ်ဂုဏ်သတ္တိ(Physical Properties)၊ ဓါတ်ဂုဏ်သတ္တိ (Chemical Properties)များတိုးတက်ကောင်းမွန်လာစေပြီး စိုက်ပျိုးသီးနှံ အထွက်နှုန်းတိုးတက်စေပါသည်။ ကြက်ချေးမြေဩဇာများကိုထည့်သွင်းအသုံးပြုခြင်းဖြင့် အပင်မှ အလွယ်တစ်ကူ စုပ်ယူစားသုံးနိုင်သလို ကြက်ချေးအခြေခံဖြစ်သောကြောင့် မြေကြီးထဲတွင်လည်း စွဲမြဲစွာ တည်ရှိနေနိုင်ပြီး သီးနှံပင်တစ်လျှောက်အာနိသင်ပေးစွမ်းနိုင်သော မြေဩဇာဖြစ်ပါသည်။ အာဟာရပြည့်ဝသောကြောင့် ဆိုးဝါးသော ရာသီဥတုနှင့် ရောဂါဒါဏ်တို့ကိုလည်း သီနှံပင်မှ ခံနိုင်ရည်ရှိစေပါမည်။ ကြက်ချေးကွန်ပေါင်းမြေဩဇာသည် သဘာဝနှင့် ဓါတုအား အချိုးညီမျှစွာဖြင့် ပေါင်းစပ် ထည့်သွင်းတည်ဆောက်ထားသော မြေဩဇာဖြစ်၍ G-A-P စနစ်ကို အခြေခံထားသော မြေဩဇာ ဖြစ်၍ လယ်ယာသီးနှံအပြင် ဟင်းသီးဟင်းရွက်နှင့် ပန်းမန်များတွင်လည်း သုံးစွဲနိုင်သော အကျိုးရှိ သည့် မြေဩဇာတစ်ခုအဖြစ် ထုတ်လုပ်ထားသောကြောင့် အဖိုးနှုန်းချိုသာ၍ တောင်သူလယ်သမား စိုက်ပျိုးရေးသမားများအတွက် အကျိုးများစေပြီး စီးပွားရေး တွက်ချေကိုက်သော မြေဩဇာ ဖြစ်ပါသည်။
ထိုမြေဩဇာကို သုံးစွဲပုံမှာ မစိုက်ပျိုးမှီ မြေပြင်ချိန်တွင် တစ်ဧကလျှင် (50)Kg တစ်အိတ်နှုန်းဖြင့် လည်းကောင်း၊ စိုက်ပျိုး ပြီး ကောက်ပင်လှန်ချိန်တွင် အိတ်ဝက်ကို လည်း ကောင်း၊ စပါးမှိုကပ်ချိန် တွင် အိတ်ဝက်ကိုလည်းကောင်း ကြဲပက်အသုံးပြုရမည်ဖြစ်ပါသည်။
ဈေးနှုန်းအနေဖြင့် (50)kg တစ်အိတ်လျှင် တောင်သူထံသို့ ရောင်းဈေး (၃၈၀၀၀)ကျပ် ဖြစ်၍ စပါးတစ်ဧကစိုက်ပျိုးပြီးသည်အထိ ကြက်ချေးကွန်ပေါင်းမြေဩဇာဖိုး (၇၆၀၀၀)ကျပ်သာ ကုန်ကျ မည်ဖြစ်ပြီး အခြားအကူအနေဖြင့် ပုလဲဓါတ်မြေဩဇာ (25)kg (အိတ်ဝက်)သာ အသုံးပြုရ တော့မည်ဖြစ်ပါသည်။ သို့ပါ၍ မြေဩဇာဖိုး စုစုပေါင်းမှာ (၁၃၀၀၀၀)ခန့်သာ ကုန်ကျမည် ဖြစ်သကဲ့သို့ အထွက်နှုန်းများလည်း ပို၍ကောင်းမွန် လာပြီး GAP စနစ်ဖြင့် စိုက်ပျိုးထုတ်လုပ်သော သီးနှံထွက်ကုန်များကို ရရှိမည် ဖြစ်ပါသည်။ ပုံမှန် ပုလဲ ဓါတ်မြေဩဇာနှင့် အခြား ကွန်ပေါင်း ဓါတ်မြေဩဇာများကို သုံးစွဲမည်ဆိုပါက (၂၅၀၀၀၀)ကျပ်ကျော် ကုန်ကျမည်ဖြစ်ပါသည်။
ထိုကြောင့် တိရိစ္ဆာန်စွန့်ပစ်ပစ္စည်းမှ ထွက်ရှိသော ကြက်ချေးကွန်ပေါင်းမြေဩဇာကို အသုံးပြုခြင်းဖြင့် အဖိုးလည်းသက်သာ အထွက်နှုန်းလည်းကောင်းလာနိုင်သဖြင့် တောင်သူများ ဝယ်ယူအသုံးပြုသင့်သော မြေဩဇာတစ်မျိုးဖြစ်ပါသည်။ ယခုအချိန်တွင် သွင်းအားစုများ ဈေးနှုန်း များကြီးမြင့်နေချိန်ဖြစ်၍ ထိုဓါတ်မြေဩဇာကိုအသုံးပြုခြင်းဖြင့် သီးနှံလည်းအထွက်နှုန်းကောင်း၊ အဖိုးနှုန်းလည်းချိုသာသဖြင့် တစ်ဖက်တစ်လမ်းမှ သွင်းအားစုစရိတ်များကာမိလာနိုင်ပြီး တောင်သူများအတွက် အကျိုးအမြတ်များစွာရရှိလာနိုင်မည်ဖြစ်ပါသည်။
DOCA(ပဲခူး)