ယခုလိုအချိန်တွင် ဈေးကွက်၌ မန်ကျည်းသီးစိမ်းများ အရောင်းအဝယ်ဖြစ်လျှက်ရှိပါသည်။ ရာသီစာ ဖြစ်သည့်အတွက် စားသုံးသူများကဝယ်ယူစားသုံးကြသဖြင့် ပေါ်ခါစအချိန်တွင် မန်ကျည်းစိမ်း မှာ ဈေးမြင့်လာခဲ့ပြီး အထွက်များလာချိန်တွင် ဈေးများကျလာခဲ့ပါသည်။ မန်ကျည်းသီးစိမ်းကို ပြည်အနီး တဝိုက်ရှိ ကျေးရွာများမှ ခူးဆွတ်၍ ပြည်မြို့ရှိ ဈေးများတွင်ရောင်းချလျှက်ရှိပါသည်။ မန်ကျည်းသီး စိမ်းများပေါ်ခါစတွင် တစ်ဆယ်ကျပ်သားလျှင် ၁၀၀၀-၁၂၀၀ ကျပ်ဈေးရှိခဲ့ပြီး ယခု ဇူလိုင်လ ဒုတိယ ပတ်တွင် တစ်ဆယ်ကျပ်သားလျှင် ၄၀၀ကျပ်အထိ ဈေးကျလာခဲ့ပြီး နေ့စဉ် အရောင်းအဝယ် ဖြစ်လျှက် ရှိပါသည်။
တဖန် ပြည်ဈေးကွက်တွင်ကျောက်ဖရုံသီးများ အရောင်းအဝယ်ဖြစ်လျှက်ရှိပြီး ပြည်ဒေသအနီး တဝိုက်ရှိ ကျေးရွာများ၊ သဲကုန်းမြို့နယ်ရှိ ပုတီးကုန်း၊ ဝက်ပုတ်နှင့် ရွှေတောင်မြို့ရှိ ကျေးရွာများမှ တင်ပို့ရောင်းချလျှက်ရှိပါသည်။ ရန်ကုန်မြို့ရှိ ဒညင်းကုန်းဈေးနှင့် သီရိမင်္ဂလာဈေးများသို့ အခြား ကုန်စိမ်းများနှင့် အတူတင်ပို့ရောင်းချကြောင်း သိရှိရပါသည်။ ကျောက်ဖရုံသီးဈေးမှာ ပေါ်ခါစအချိန်တွင် အလုံးကြီးတစ်လုံးလျှင် ၂၀၀၀ကျပ်၊ အလုံးသေးတစ်လုံးလျှင် ၁၀၀၀ကျပ်ဖြင့် ဈေးတန်ခဲ့သော်လည်း ယခုလှိုင်လှိုင်ပေါ်ချိန်တွင် ကျောက်ဖရုံသီးအလုံးကြီး တစ်လုံးလျှင် ၆၀၀-၇၀၀ ကျပ် နှင့် အလုံးသေး တစ်လုံးလျှင် ၄၀၀-၅၀၀ခန့်ဖြင့် ရောင်းချလျှက်ရှိကြောင်း သိရှိရပါသည်။
DOCA(ပဲခူး)