ကမ္ဘာ့ထိပ်တန်း ဆန်တင်သွင်းသည့် ဖိလစ်ပိုင်နိုင်ငံအနေဖြင့် ပြည်တွင်း၌ ယှဉ်ပြိုင်နိုင်စွမ်း ရှိသည့် ဈေးနှုန်းများဖြစ်ပေါ်စေရန်နှင့် ထောက်ပံ့ပေးသွင်းမှုများ တည်ငြိမ်မှုရှိစေရန်အတွက် ၎င်း ၏ ဆန်အဓိကပေးသွင်းသူ ဗီယက်နမ်နိုင်ငံအပေါ် အလွန်အမင်းမှီခိုနေရမှုကို လျှော့ချသွားရန် စီစဉ် ဆောင်ရွက်လျက်ရှိကြောင်း သိရှိရပါသည်။
ဖိလစ်ပိုင် စိုက်ပျိုးရေးဦးစီးဌာနသည် အိန္ဒိယ၊ ပါကစ္စတန်၊ ကမ္ဘောဒီးယားနှင့် မြန်မာနိုင်ငံ တို့မှ ဆန်များကို ဝယ်ယူတင်သွင်းလျက်ရှိသော ပုဂ္ဂလိကလုပ်ငန်းရှင်များနှင့် တွေ့ဆုံဆွေးနွေးမှု များ ပြုလုပ်လျက်ရှိကြောင်း၊ အင်ဒိုနီးရှား၊ ထိုင်းတို့နှင့်လည်း စာချုပ်ချုပ်ဆိုနိုင်ရေး ဆောင်ရွက် မည်ဖြစ်ကြောင်း၊ ၎င်းတို့ အနေဖြင့် ခွဲခြားမှုမရှိပဲ လုပ်ငန်းများ တစ်ပြေးညီဆောင်ရွက်နိုင်စေရေး အတွက် ဆန်တင်သွင်းမှု အရင်းအမြစ်များကို ဖြန့်ခွဲရရှိနိုင်ရန် ကြိုးပမ်းလျက်ရှိကြောင်း၊ ဗီယက်နမ် သည် အဓိကအားထားရသည့် ဆန်ပေးသွင်းသော နိုင်ငံတစ်ခုဖြစ်သော်လည်း ဖိလစ်ပိုင်၏ ဆန် တင်သွင်းမှု၌ ၉၀ ရာခိုင်နှုန်းအထိ ရယူထားသဖြင့် အကယ်၍ ရောင်းလိုအားပြတ်လပ်ခဲ့ပါက ပြဿနာတစ်ရပ် ဖြစ်ပေါ်နိုင်ကြောင်းဖြင့် စိုက်ပျိုးရေးအတွင်းဝန် Francisco Tiu Laurel က မေ ၃၀ ရက်နေ့၌ တွေ့ဆုံမေးမြန်းခန်းတစ်ခုတွင် ပြောကြားခဲ့ပါသည်။
ကုလသမဂ္ဂ စားနပ်ရိက္ခာနှင့်စိုက်ပျိုးရေးအဖွဲ့၏ အချက်အလက်များအရ ဗီယက်နမ်နိုင်ငံ က ရောင်းချခဲ့သည့် ဆန်အမျိုးအစားအားလုံး၏ ဈေးနှုန်းများသည် ပြည်တွင်းပြည်ပ ကုန်သည်များထံမှ ဝယ်လိုအားများပြားမှုကြောင့် ဧပြီလတွင် ၃ လအတွင်း အမြင့်မားဆုံးသို့ ရောက်ရှိခဲ့ကြောင်း သိရှိရပါသည်။
အဓိက စားသုံးသီးနှံဖြစ်သော ဆန်ဈေးနှုန်းများအား သင့်တင့်မျှတမှုရှိအောင် ဆောင်ရွက်ခြင်းသည် သမ္မတ Ferdinand Marcos Jr ၏ အဓိကအစီအစဉ်တစ်ခုဖြစ်ကြောင်း၊ ၎င်း၏ အစိုးရအနေဖြင့် ဆန်တင်သွင်းမှုအပေါ် အကောက်ခွန်အား ၃၅ ရာခိုင်နှုန်းမှ ၁၅ ရာခိုင်နှုန်းသို့ လျှော့ချခြင်းကို ယခင်နှစ်၌ ဆောင်ရွက်ခဲ့ပြီး ဈေးနှုန်းများမြင့်မားမှုကို လျှော့ချနိုင်ရေးအတွက် ဖေဖော်ဝါရီလတွင် စားနပ်ရိက္ခာဖူလုံမှု အရေးပေါ်အခြေအနေကို ကြေညာခဲ့ကြောင်း သိရှိရပါသည်။
Mr. Laurel အနေဖြင့် ယခုနှစ်ဆန်တင်သွင်းမှုကို ၂၀၂၄ ခုနှစ်ကထက် လျှော့ချလျက် တန်ချိန် ၄.၅ သန်း ထက်မပိုစေရန် မျှော်မှန်းထားသည်။ ၎င်းသုံးသပ်ချက်မှာ ဖိလစ်ပိုင်သည် ၂၀၂၅ ခုနှစ်၌ ဆန်တန်ချိန် ၅.၄ သန်းခန့် တင်သွင်းရနိုင်သည်ဟူသော အမေရိကန်စိုက်ပျိုးရေးဦးစီးဌာန ၏ ခန့်မှန်းချက်နှင့် နှိုင်းယှဉ်ပါက ကွာခြားလျက်ရှိသည်။ ဖိလစ်ပိုင်နိုင်ငံအနေဖြင့် ယခုနှစ်တွင် စပါးတန်ချိန် ၂၀.၄၆ သန်းအထိ စံချိန်တင်ထွက်ရှိမည့် အခြေအနေကြောင်း Mr. Laurel က ပြောကြားထားပါသည်။
Source: Bloomberg, June 2, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)