ဗီယက်နမ်ဝန်ကြီးချုပ် Plam Minh Chinh က မှောင်ခိုရောင်းဝယ်မှု၊ ကုန်သွယ်မှု၊ လိမ်လည်မှု၊ ကုန်ပစ္စည်းအတုများ မူပိုင်ခွင့်ချိုးဖောက်မှုများကို တစ်နိုင်ငံလုံးအတိုင်းအတာဖြင့် နှိမ်နင်းရန်နှင့် ပြင်းပြင်းထန်ထန်ကြိုးပမ်းဆောင်ရွက်ရန် ဇွန်လ ၅ ရက်နေ့က တောင်းဆိုခဲ့ ကြောင်း ဗီယက်နမ်သတင်းအေဂျင်စီက ဖော်ပြခဲ့သည်။ ဖောက်ဖျက်ကျူးလွန်သူများကို အာဏာ ပိုင်များက အလျင်အမြန်ရှာဖွေဖော်ထုတ်ပြီး တင်းတင်းကျပ်ကျပ်ကိုင်တွယ်ရန် လိုအပ်ကြောင်း နှင့် အကျင့်ပျက်ခြစားမှု သို့မဟုတ် ကျူးလွန်သူနှင့် ပူးပေါင်းကြံစည်းသည့် အရာရှိများ၊ ပြည်သူ့ ဝန်ထမ်းများနှင့် တရားဥပဒေစိုးမိုးရေးအရာရှိများအား အရေးယူရန် လိုအပ်ကြောင်း ၎င်းက ပြောကြားခဲ့သည်။ မေလ ၁၅ ရက်နေ့မှစ၍ လူ ၁၁၉ ဦးပါဝင်ပတ်သက်သည့် ကုန်သွယ်မှု လိမ်လည်မှု ၃၆ မှုအား တရားစွဲဆိုနိုင်ခဲ့ကြောင်းသိရသည်။ အဆိုပါ ပြစ်မှုများတွင် မှောင်ခိုရောင်း ချမှု၊ ကုန်ပစ္စည်းအတုအပထုတ်လုပ်ဖြန့်ဖြူးမှုနှင့် မမှန်မကန် ကြော်ငြာမှုများ ပါဝင်ကြောင်း သိရှိရပါသည်။
DOCA(ရန်ကုန်)