ပခုက္ကူမြို့နယ်၌ ဆေးရွက်ကြီးစိုက်တောင်သူများ အကျိုးအမြတ်များစွာရရှိနေ

   မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်အတွင်းရှိ ကုက္ကိုလှ၊ ကျွန်းညိုကြီး၊ မြင်းကျွန်း၊ ကျွန်းညို၊ သံပုရာပင်ကုန်း၊ မှိုက်ပင်ကုန်း၊ တင်းဂါတ်အတွင်းရှိ ကျေးရွာများတွင် ဆေးရွက်ကြီး စိုက်ပျိုး‌‌ရေးကို အဓိကထားလုပ်ကိုင်ကြပြီး ဧရာဝတီမြစ်ရိုးတစ်လျှောက်ရှိ ကိုင်းကျွန်း မြေများတွင် နှစ်စဉ် ဆေးရွက်ကြီး၊ အစေ့ထုတ်ပြောင်း(CP)၊ ငရုတ်၊ ပဲမျိုးစုံနှင့် ကုန်စိမ်းသီးနှံမျိုးစုံကို ရာသီအလိုက်ဒေသစီးပွားဖြစ် စိုက်ပျိုးကြပြီး ငရုတ်သီးနှံနှင့် ဆေးရွက်ကြီးကို စိုက်ဧကအများဆုံး စိုက်ပျိုးကြောင်း သိရှိရသည်။ ဗမာ ဆေးရွက်ကြီးမျိုးကို အများဆုံးစိုက်ပျိုးကြောင်း၊ ယခင်နှစ် စိုက်ဧက(၃၅၀)ခန့် စိုက်ပျိုးပြီး သီးနှံရောင်းချချိန်တွင် ပြည်တွင်းဝယ်လိုအား ဈေးကွက်ကောင်း၍ ဈေးနှုန်းမြင့်တက်မှုကြောင့် ယခုနှစ်တွင် ဆေးရွက် ကြီးစိုက်ဧက(၄၀၀)ခန့်အထိ တောင်သူများ တိုးချဲ့စိုက်ပျိုးမှု များလာကြောင်း သိရှိရသည်။

     စိုက်ပျိုးမှုအနေဖြင့် ဗမာဆေးရွက်ကြီးကို သဲနုန်းမြေအမျိုးအစားတွင် စိုက်ပျိုးကြသည်။ မြေအောက်ရေအပြင် ရေလိုအပ်ပါက ရေသွင်းစိုက်ပျိုးကြောင်း၊ ဒေသခံတောင်သူများမှ မိမိစိုက်ခင်း ထွက် ဆေးရွက်ကြီးမျိုးစေ့ကို ကိုယ်တိုင်ပျိုးထောင်၍ စိုက်ပျိုးခြင်းနှင့် ပျိုးပင်ဝယ်ယူစိုက်ပျိုးခြင်း (၂)မျိုးဖြင့် စိုက်ပျိုးကြောင်း၊ မျိုးစေ့တစ်ပြည်လျှင် ကျပ်(၂၀၀၀၀)ခန့် ပေါက်ဈေးရှိပြီး ပျိုးပင်တစ်ပင် (၂၀)ကျပ် ဈေးနှုန်းဖြင့် ဝယ်ယူစိုက်ပျိုးရကြောင်း၊ မျိုးစေ့မှ ပျိုးထောင်လုပ်ငန်းကို တော်သလင်းလ တွင် ပျိုးထောင်ပြီး (၄၅)ရက်ကြာလျှင် ပျိုးခင်းသို့ ပျိုးပင်များ ပြောင်းရွှေ့စိုက်ပျိုးကြောင်း၊ တစ်ဧက လျှင် ပျိုးပင်(၇၀၀၀)ခန့် ဝင်ဆံ့ပြီး (၂)ပေအကွာစိုက်ပျိုးကြောင်း၊ သီတင်းကျွတ်လတွင် စတင် စိုက်ပျိုးပြီး တပေါင်းလတွင် ဆေးရွက်ကြီးများ ဆွတ်ခူးကြောင်း သိရှိရသည်။

    ဆေးရွက်ကြီးစိုက်ပျိုးမှုတစ်ဧကလျှင် ရာသီဥတုအနေအထား၊ သွင်းအားစုသုံးစွဲမှု တောင်သူ တစ်ဦးချင်းမတူညီ၍ ဆေးရွက်ကြီး ထွက်ရှိမှုမှာလည်း မတူညီကြောင်း၊ ယခု ၂၀၂၅ ခုနှစ် တွင် တောင်သူတစ်ဦးလျှင် ဆေးရွက်ကြီး ပိဿာ ပျမ်းမျှ (၁၀၀၀)ခန့် ထွက်ရှိပြီး တောင်သူ ပေါက်ဈေး တစ်ပိဿာလျှင် ကျပ်(၁၀၀၀၀)ဈေးဖြင့် ရောင်းချရကြောင်း၊ တစ်ဧက ကုန်ကျစရိတ်မှာ (၄၅)သိန်းခန့် ကုန်ကျကြောင်း၊ အကျိုးအမြတ်အနေဖြင့် တောင်သူတစ်ဦး ကျပ်သိန်း(၅၅)ဝန်းကျင် ခန့်ထိ အကျိုးအမြတ် များစွာရရှိခဲ့ကြောင်း၊ ယခင်နှစ် ဆေးရွက်ကြီးစိုက်ပျိုးမှုအနေဖြင့် ဒေသတွင်း နယ်မြေ အခြေအနေအရ ပြည်တွင်းဆေးရွက်ကြီး စိုက်ပျိုးထွက်ရှိမှုနည်းပြီး ဝယ်လိုအား ကောင်းမွန် ခြင်းကြောင့် ဆေးရွက်ကြီးဈေးနှုန်းများ မြင့်တက်ခဲ့ကြောင်း သိရှိရသည်။

   ဆေးရွက်ကြီးသည် မြန်မာလူမျိုးများအနေဖြင့် နေ့စဉ်သုံးစွဲမှု နည်းပါးသော်လည်း လူတိုင်း အတွက် အသုံးဝင်သော ကျန်းမာရေး ဆေးဖက်ဝင်တစ်မျိုးဖြစ်၍ ပခုက္ကူဒေသရှိ စိုက်တောင်သူ များသည် နှစ်စဉ်မပြတ် မိသားစုစီးပွားရေးအဖြစ် တစ်ပိုင်တစ်နိုင်စိုက်ပျိုးခဲ့ရာ ဈေးကွက်အနေဖြင့် ဒေသတွင်းထွက်ရှိသော ဆေးရွက်ကြီးများကို မြို့ပေါ်ရှိ ဆေးလိပ်ခုံလုပ်ငန်းရှင်များ၊ ကွမ်းယာ ဆိုင်များ၊ မြန်မာ့တိုင်းရင်းဆေး ဖော်စပ်ထုတ်လုပ်‌ရောင်းချသည့် လုပ်ငန်းရှင်များအပြင် မြန်မာ နိုင်ငံအောက်ပိုင်းရှိ ပုသိမ်၊ မြောင်းမြ၊ ဘိုကလေး၊ ဟင်္သတမြို့ ဝယ်လက်များမှလည်း ကျေးရွာ များထိဆင်း၍ နှစ်စဉ်ဝယ်ယူလျက်ရှိ၍ ဈေးကွက်ခိုင်မာမှုရှိခြင်းကြောင့် ပခုက္ကူမြို့နယ် အတွင်းရှိ ကျေးရွာများ၌ နှစ်စဉ်မပြတ်ဒေသစီးပွားဖြစ် စိုက်ပျိုးကြောင်း၊ ယခုနှစ်ဆေးရွက်ကြီး ပေါ်ချိန်တွင် ဈေးရွက်ကြီးဈေးနှုန်းမြင့်တက်ပြီး ရောင်းချရခြင်းကြောင့် စိုက်တောင်သူများမှ ဆေးရွက်ကြီး စိုက်ပျိုး ချိန်တွင် ယခင်နှစ်ထက် တိုးချဲ့စိုက်ပျိုးသွားမည်ဖြစ်ကြောင်း ကျွန်းညိုကြီးကျေးရွာရှိ စိုက်တောင်သူ တစ်ဦးထံမှ သိရှိရသည်။

DOCA(မကွေး)