မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ မြစ်ခြေ၊ ကမ္မမြို့များနှင့် ကျွန်းဦး၊ ကျွန်းညို၊ ကျွန်းညိုကြီးရွာသစ်၊ သံပုရာပင်ကုန်းကျေးရွာများတွင် သီးနှံမျိုးစုံ နှစ်စဉ်စိုက်ပျိုးလျက်ရှိရာ သကြား ပြောင်းဖူးများကိုလည်း စီးပွားဖြစ်စိုက်ပျိုးကြသည်။ စိုက်ပျိုးမှုအနေဖြင့် သကြားပြောင်းဖူးများကို ထွန်ကြောင်းဆွဲ အစေ့ချစနစ်ဖြင့် ရေသွင်း၍ စိုက်ပျိုးကြသည်။ မိုးနှင့်ဆောင်းနှစ်ရာသီ စိုက်ပျိုး ကြောင်း၊ မိုးရာသီ၌ ဇွန်လတွင်စတင်စိုက်ပျိုးပြီး ဩဂုတ်လတွင် သီးနှံရိတ်သိမ်းပြီး ဆောင်းသီးနှံ အနေဖြင့် ဖေဖော်ဝါရီလတွင် စိုက်ပျိုးပြီး ဧပြီလတွင် သီးနှံရိတ်သိမ်းကြောင်း သိရှိရသည်။
စိုက်ပျိုးထုတ်လုပ်မှုအနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ငွေကျပ် (၁၀)သိန်းခန့် ကုန်ကျကြောင်း၊ အထွက်နှုန်းမှာ သကြားပြောင်းဖူးစိမ်းအဖူးရေ (၈၀၀၀-၁၀၀၀၀)ခန့် ထိ ထွက်ရှိကြောင်း၊ ဈေးနှုန်းအနေဖြင့် ပြောင်းဖူးအရွယ်အစားနှင့် သီးနှံလတ်ဆတ်မှုပေါ်မူတည်၍ သကြားပြောင်း(အစိမ်း) တစ်ဖူးလျှင် လက်ကားဈေး ကျပ်(၃၅၀-၃၀၀)၊ လက်လီဈေး ကျပ် (၅၀၀-၄၀၀)၊ သကြားပြောင်းဖူး(ပြုတ်)တစ်ဖူးလျှင် ကျပ်(၉၀၀-၈၀၀)ဈေးဖြင့် ရောင်းချရပြီး အကျိုးအမြတ် အနေဖြင့် တစ်ဧကလျှင် ကျပ်(၁၅)သိန်းခန့် ရရှိကြောင်း၊ ဈေးကွက်အနေဖြင့် ပွဲစားများမှ စိုက်ခင်းသို့ လာရောက်ဝယ်ယူခြင်းအပြင် ပခုက္ကူမြို့နယ်သို့ ကုန်စိမ်းသီးနှံ ရောင်းဝယ်ရေးဆိုင်များသို့ တင်ပို့ ရောင်းချကြောင်း၊ ပြည်တွင်းစားသုံးမှု မြင့်မားလျက်ရှိပြီး ဈေးကွက်ခိုင်မာ၍ ဈေးနှုန်းကောင်းမွန် သော သကြားပြောင်းသီးနှံကို ရာသီအလိုက်စိုက်ပျိုးခြင်းဖြင့် တောင်သူများ အကျိုးအမြတ်ရရှိကြောင်း သိရှိရသည်။
DOCA(မကွေး)