ဟော်လန်ပန်းများစိုက်ပျိုးရာတွင် ပန်းမျိုးဥများအားဝယ်ယူစိုက်ပျိုးရသည်။ မျိုး(၃)ပြည် လျှင် (၇၅၀၀)ကျပ်နှုန်းဖြစ်ပြီး ပန်းမျိုးဥ တစ်ပြည်လျှင် ၅ပေအကွာ မြောင်းအရှည် ၈/၉ပေရှိ မြောင်း (၆)မြောင်း ရရှိပါသည်။ ကုန်ကျစရိတ်မှာ ပန်းမျိုးဥအပေါ် စိုက်ပျိုးမှုကို အခြေခံပြီး တွက်ချက်ရပါသည်။ မျိုးဥများအားစိုက်ပျိုးရာတွင် မြေကြီးအတွင်း(၄)လအကြာတွင် မြေပေါ်သို့ အတက်ကလေးများစတင်ထွက်ရှိလာပြီးနောက် (၄)လအကြာတွင် ပန်းများစတင် ထွက်ပေါ်လာ ပါသည်။ ဟော်လန်ပန်းစိုက်ပျိုးရာဒေသများမှာ ပြည်မြို့နယ်အတွင်းရှိ မှော်ဇာကျေးရွာရှိ တောင်လုံး ညိုရွာ၊ ရန်ကုန်- ပြည်ကားလမ်းပေါ်ရှိ ရွှေတောင်မြို့နယ်များတွင်လည်း ပန်းပင်များအား ဒေသထွက်အဖြစ်စိုက်ပျိုးကြပါသည်။
ပန်းများခူးရာတွင် တစ်ပတ်လျှင်တစ်ကြိမ် ခူးယူရပြီး (၅)တံပါ အကြီးတစ်စည်းလျှင် ၁၅၀၀ ကျပ်၊ (၅)တံပါ အသေးတစ်စည်းလျှင် ၉၀၀-၁၀၀၀ကျပ်ဖြင့် ရောင်းချကြောင်းသိရှိရပါသည်။ ထွက်ရှိ လာသောပန်းများကို ပြည်မြို့၊ ရန်ကုန်မြို့နှင့် နေပြည်တော်မြို့များသို့ တင်ပို့ ရောင်းချ ပါသည်။ ပန်းများအားလုံးအခင်းပြတ်ခူးယူပြီး (၂)လအကြာတွင် ပန်းမျိုးဥအဖြစ်ပြန်လည် တူးဖော်ပြီးနောက် တစ်ကြိမ်ပြန်လည်စိုက်ပျိုးရန် ပန်းမျိုးဥအဖြစ် ထားရှိပါသည်။ ဟော်လန်ပန်းကို တစ်နှစ်လျှင် (၂)ကြိမ် စိုက်ပျိုးပါသည်။ ပန်းမျိုးများမှာ အရောင်အသွေးစုံလင်စွာဖြင့် ပတ္တမြား၊ ဆင်စွယ်ဖြူ၊ အဝါကြား၊ ပန်းရောင်၊ ရွှေလိပ်ပြာ၊ နှင်းဆီနီ၊ မိတ်ကပ်နှင့် ခရမ်းပြာအရောင်တို့ဖြစ်ပါသည်။
DOCA(ပဲခူး)