စစ်ကိုင်းတိုင်းဒေသကြီးအစိုးရအဖွဲ့၊ ကလေးအလုပ်သမားပပျောက်ရေးဆိုင်ရာကော်မတီလက်အောက်ရှိ အလုပ်အကိုင်အခွင့်အလမ်းများဖန်တီးပေးရေးလုပ်ငန်းကော်မတီသည် တိုင်းဒေသကြီး ရန်ပုံငွေဖြင့် အသက်မွေးဝမ်းကျောင်းသင်တန်းများကို ဖွင့်လှစ်ပို့ချပေးလျက်ရှိပါသည်။ ၂၀၂၁ အောက်တိုဘာလမှ ၂၀၂၂ခုနှစ် မတ်လထိ Mini Budgetအတွင်း သင်တန်း(၄)ကြိမ် ဖွင့်လှစ်ခဲ့ပါသည်။ ယခု ၂၀၂၂-၂၀၂၃ ဘဏ္ဍာနှစ်အတွင်း ဇွန်လတွင် လူသုံးကုန်ထုတ်လုပ်မှု နည်းပညာသင်တန်း(၇)ရက်ကို မုံရွာမြို့တွင်လည်းကောင်း၊ (၂၆)ရက်ကြာဖွင့်လှစ်ပို့ချသည့် အခြေခံမော်တော်ဆိုင်ကယ်ပြုပြင်ထိန်းသိမ်းနည်းသင်တန်းကို ဇွန်လ ၂၅ ရက်နေ့က ခန္တီးမြို့တွင်လည်းကောင်း၊ တစ်လုံးထိုးအင်ဂျင်ပြုပြင်ထိန်းသိမ်းမှု(၇)ရက်တာသင်တန်းကို ဇူလိုင်လ ၂၉ ရက် နေ့ကဟုမ္မလင်းမြို့တွင်လည်းကောင်း၊ မှိုစိုက်ပျိုးနည်းသင်တန်း(၂)ရက်ကို ဩဂုတ်လ(၂) ရက်နေ့က မုံရွာမြို့တွင်လည်းကောင်းဖွင့်လှစ်ခဲ့ပါသည်။
ကလေးအလုပ်သမားပပျောက်ရေးဆိုင်ရာအမျိုးသားအဆင့် လုပ်ငန်းစီမံချက်များအဖြစ် ခိုင်မာတိကျသော အခြေခံအချက်အလက်များကောက်ယူခြင်း၊ အသိပညာပေးခြင်းနှင့်စွမ်းဆောင်ရည်မြှင့်တင်ခြင်း၊ ပညာရေး၊ အသက်မွေးဝမ်းကျောင်းပညာအခွင့်အလမ်းများ ဖန်တီးခြင်း၊ ဥပဒေပိုင်းဆိုင်ရာပြုပြင်ရေးဆွဲမှုနှင့် အကောင်အထည်ဖော်ဆောင်ရွက်မှု ပိုမိုအားကောင်းလာစေခြင်း၊ အဆိုးရွားဆုံးပုံစံဖြင့်ခိုင်းစေခြင်းခံရသော ကလေးအလုပ်သမားများအား ဖယ်ရှားခြင်းနှင့် ပြန်လည်ကုစားခြင်း၊ မိသားစုများအတွက် ပိုမိုကောင်းမွန်သော အသက်မွေးဝမ်းကျောင်း အလုပ်အကိုင်များရရှိစေခြင်း ဟူသည့်ရည်မှန်းချက်(၆)ရပ်ချမှတ်ထားရှိပါသည်။
ဒေသတွင်းဖွံ့ဖြိုးဆဲနိုင်ငံအများစုတွင် ကုန်ထုတ်စွမ်းအားများကို အထောက်အကူဖြစ်စေမည့် လူငယ်၊ လူရွယ်နှင့် ကလေးများကို အလုပ်သမားများအဖြစ် အသုံးပြုမှုများ ရှိနေပါသည်။ မြန်မာနိုင်ငံတွင် အသက်(၅)နှစ်မှ (၁၇)နှစ်အကြား ကလေးစုစုပေါင်း၏ (၁၀.၅)ရာခိုင်နှုန်း ဖြစ်သည့် (၁၂.၇၉)သန်းခန့်သည် စီးပွားရေးလုပ်ငန်းများတွင် ပါဝင်လုပ်ကိုင်လျက်ရှိသည်ကို တွေ့ရှိရပါသည်။ ဖွံ့ဖြိုးဆဲနိုင်ငံများတွင် အလုပ်အကိုင်အခွင့်အလမ်းနည်းပါးခြင်းနှင့် မိသားစုစားဝတ် နေရေးကိစ္စများအတွက် ဝင်ငွေရှာဖွေနိုင်မှု နည်းပါးခြင်းသည် ကလေးအလုပ်သမားများ ဖြစ်ပေါ်စေသည့် အကြောင်းရင်းများဖြစ်ပါသည်။ ကလေးအလုပ်သမား လျော့နည်းပပျောက်စေရန် မိဘ၊ အုပ်ထိန်းသူက အလုပ်အကိုင်ရှိမှသာသားသမီးကိုကျောင်းထားပေးနိုင်မှာဖြစ်သည့်အတွက် အလုပ်အကိုင်အခွင့်အလမ်းဖော်ဆောင်ရေးသည် အရေးကြီးပါသည်။ မိသားစုအတွက် ရေရှည်တည်မြဲစေမည့် အလုပ်အကိုင်အခွင့်အလမ်းများရရှိလာစေရေးအတွက် စိုက်ပျိုးရေး၊ မွေးမြူရေး၊ စက်မှုလက်မှု၊ ကုန်ထုတ်လုပ်မှု၊ စီးပွားရေးနှင့်ကူးသန်းရောင်းဝယ်မှုဆိုင်ရာ ဝန်ဆောင်မှုများစသည့် ပညာရှင်အဖွဲ့အစည်းများ၊ ဌာနများ၊ စီးပွားရေးလုပ်ငန်းရှင်များနှင့် ချိတ်ဆက်ပူးပေါင်း ဆောင်ရွက်ရမည်ဖြစ်ကြောင်း တိုင်းဒေသကြီးဝန်ကြီးချုပ်က ပြောကြားပါသည်။
မြန်မာနိုင်ငံကလေးအလုပ်သမားပပျောက်ရေးဆိုင်ရာ အမျိုးသားအဆင့်လုပ်ငန်းစီမံချက် (၂၀၀၉-၂၀၂၃)၏ ရည်မှန်းချက်များတွင်ပါဝင်သည့် အန္တရာယ်ရှိသောအလုပ်နှင့် လုပ်ငန်းခွင်များတွင် လုပ်ကိုင်နေရသည့် ကလေးအလုပ်သမားများကိုဖယ်ရှားပြီး သင့်လျော်ကောင်းမွန်သည့် အလုပ်အကိုင်ရရှိရေးနှင့် သက်မွေးပညာကျောင်းများတက်ရောက်နိုင်ရေးစီမံဆောင်ရွက်သွားရန် ဟုပါဝင်သည့်အတွက် သက်မွေးပညာသင်တန်းများဖွင့်လှစ်ပေးရခြင်းဖြစ်ကြောင်း ကလေးအလုပ်သမားလျော့နည်းပပျောက်ရေးသည် လူမှုအခွင့်အရေးများကို ကာကွယ်စောင့်ရှောက်ပေးရသည့် လုပ်ငန်းဖြစ်ပြီး နိုင်ငံ၏ဖွံ့ဖြိုးတိုးတက်မှု၊ လူနေမှုဘဝမြင့်မားမှု၊ ပညာရေးဖွံ့ဖြိုးတိုးတက်မှုတို့ကို အထောက်အကူပြုသွားမှာဖြစ်ကြောင်း သိရရှိပါသည်။
DOCA (စစ်ကိုင်း)