စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် စားသုံးဆီတင်သွင်းသိုလှောင်ဖြန့်ဖြူး ခြင်းလုပ်ငန်းကော်မတီကိုဖွဲ့စည်းကာ ပြည်ပမှတင်သွင်းလာသည့် စားသုံးဆီများ သတ်မှတ်အရည်အသွေး စံချိန်စံညွန်းများနှင့် ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများ ဝယ်ယူသုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးအတွက် ကြီးကြပ်ထိန်းကျောင်း ဆောင်ရွက်လျက်ရှိသည့်အပြင် အခြေခံလက်ကားရည်ညွှန်းဈေးနှုန်းကိုလည်းအပတ်စဉ်ထုတ်ပြန်ပေးလျက် ရှိပါသည်။
စားသုံးသူရေးရာဦးစီးဌာန ခရိုင်ဦးစီးမှူးရုံးနှင့် မြို့နယ်တာဝန်ခံများအနေဖြင့်လည်း စားသုံးဆီ တင်သွင်းသည့်ကုမ္ပဏီများမှ စားအုန်းဆီများကိုဖြန့်ဖြူးရောင်းချခဲ့သည့်အပေါ် မိမိတို့ခရိုင်၊ မြို့နယ်အတွင်း ဝယ်ယူရရှိသည့် လက်ကားကုန်သည်များအနေဖြင့် စားအုန်းဆီများကို ရန်ကုန်အထိုင်ဈေး ရည်ညွှန်း လက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များ ထပ်ပေါင်း၍ ၂ရာခိုင်နှုန်းအမြတ်ထက် မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချသွားရမည်ဖြစ်ပြီး လက်လီဈေးကွက် အတွင်း ဖြစ်သင့်ဖြစ်ထိုက်သည့်ဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချ ခြင်းများမပြုလုပ်စေရေးတို့အတွက် ရွှေဘိုခရိုင် ဆီကုန်သည်နှင့်ဆီလုပ်ငန်းရှင်များအသင်းနှင့် ချိတ်ဆက်၍ စားသုံးဆီရောင်းချမှုများကို ပူးပေါင်းကွင်းဆင်း စိစစ်ကြပ်မတ်ဆောင်ရွက်လျက်ရှိပါသည်။
ရွှေဘိုခရိုင်၊ ရွှေဘိုမြို့တွင် စားအုံးဆီဒေသတွင်းတိုက်ရိုက်ရောင်းချမှု အစီအစဉ်အနေဖြင့် ဩဂုတ်လ (၉)ရက် နေ့မှ(၁၃)ရက်နေ့အထိ ဆီကုန်သည်(၈)ဦးမှ အလှည့်ကျဖြင့် တစ်ရက်လျှင်ဈေးကား(၄)စီးဖြင့် ရွှေဘိုမြို့ပေါ်ရှိ ကုန်းဘောင်ဈေးအနီး၊ အောင်ဇေယျဈေးအနီး၊ အောင်ချမ်းသာဈေးအနီး၊ ထိပ်တန်းဈေး အနီးတွင်လည်းကောင်း၊ (၁၄)ရက်နေ့တွင် ဆီကုန်သည်(၈)ဦးမှ ဈေးကား(၂)စီးဖြင့် ကုန်းဘောင်ဈေးအနီး နှင့်အောင်ချမ်းသာဈေးအနီးတွင်လည်းကောင်း နေ့စဉ်နံနက်(၇:၃၀)နာရီခန့်မှတင်၍ စားသုံးသူများ အလွယ်တကူဝယ်ယူနိုင်ရန်အတွက် “မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ ဦးဆောင် ပြုလုပ်သော သက်ဆိုင်ရာဒေသအလိုက် စားသုံးဆီဈေးနှုန်းတည်ငြိမ်ရေးနှင့် သက်သာစွာဝယ်ယူနိုင်ရေး အတွက်ရွှေဘိုမြို့နယ်ဆီကုန်သည်အသင်းမှ မိမိဒေသတွင်းတိုက်ရိုက်ရောင်းချမှုအစီအစဉ် တစ်ပိဿာ ရောင်းဈေးနှုန်း(၄၀၀၀)ကျပ်” ဟူ၍ဗီနိုင်းကပ်ပြီး ဆီအရောင်းကားများဖြင့် နေရာအရောက် သွားရောက် ရောင်းချလျက်ရှိပြီး စားအုန်းဆီတစ်ပိဿာလျှင် (၄၀၀ဝိ/-)နှုန်းဖြင့် စားသုံးသူတစ်ဦးလျှင် တစ်ပိဿာ နှုန်းရောင်းချပေးသဖြင့် နေရာအလိုက် စားသုံးသူပြည်သူများ စည်ကားသိုက်မြိုက်စွာ တန်းစီ၍ဝယ်ယူလျက်ရှိပြီး ဝယ်ယူသည့်စားသုံးသူများကို မေးမြန်းကြည့်ရာ ယခုအချိန်တွင် စားသုံးဆီအမျိုးအစား အလိုက်ဈေးနှုန်းများ မြင့်မားနေသည့်အတွက် ယခုကဲ့သို့ ရောင်းချပေး၍ အခြေခံလူတန်းစားများအတွက် များစွာအဆင်ပြေသဖြင့် ရောင်းချရန် စီးစဉ်ဆောင်ရွက်ပေးသော တာဝန်ရှိသူများနှင့် ရောင်းချပေးသည့်သူများ၊ ကြီးကြပ်ဆောင်ရွက်ပေးသူများအား များစွာကျေးဇူးတင်လျက်ရှိပါကြောင်းနှင့် ဆက်လက်၍ လည်းရောင်းချပေးစေလိုသည်ဟု ပြောကြားခဲ့ကြောင်း သတင်း ရရှိပါသည်။
DOCA(စစ်ကိုင်း)