မွန်ပြည်နယ်၊ မုဒုံမြို့နယ်တွင် (၇၈)နှစ်မြောက် အာဇာနည်နေ့အထိမ်းအမှတ်အသိပညာပေးဟောပြောပွဲ၊ စာစီစာကုံး၊ ပန်းချီပြိုင်ပွဲနှင့် စာအုပ်စာစောင် နံရံကပ်ပိုစတာပြပွဲ ကို ၁၆.၇.၂၀၂၅ ရက်နေ့ နံနက် (၁၀:၀၀)နာရီက အ.ထ.က (ခွဲ) ဗိုလ်တေဇကျောင်း၌ ကျင်းပသည်။
ဟောပြောပွဲတွင် ကျောင်းအုပ်ဆရာကြီး ဦးမင်းအောင်က အမှာစကားပြောကြားပြီး မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်မိုးမိုးစန္ဒာထွန်းက လူငယ်နှင့်ပြည်သူများအား သမိုင်းအသိပညာ ဗဟုသုတများကြွယ်ဝစေရန်၊ အမျိုးသား စည်းလုံးညီညွတ်မှုကို မြှင့်တင်ပေးနိုင်ရန်နှင့် အာဇာနည် (၉) ဦး၏ စွန့်လွှတ်အနစ်နာခံမှု အကြောင်းအရာများကိုသိရှိစေရန် ဟောပြောပွဲကို ပြုလုပ်ရခြင်းဖြစ်ကြောင်း ရှင်းလင်းပြော ကြားသည်။ ထို့နောက် ဒုအလယ်တန်းပြ ဆရာမ ဒေါ်မိုးမိုးဆွေက အာဇာနည်၏ အဓိပ္ပါယ်၊ အာဇာနည်နေ့ဖြစ်ပေါ်လာပုံ သမိုင်းအကြောင်း၊ အာဇာနည်(၉)ဦး၏ အတ္ထုပ္ပတ္တိ အကြောင်းအရာ များကို ရှင်းလင်းပြောကြားသည်။
ဆက်လက်၍ စာစီစာကုံးနှင့် ပန်းချီပြိုင်ပွဲကို ကျင်းပရာ ကျောင်းသား/သူများက ပါဝင် ယှဥ်ပြိုင်ကြပြီး ခင်းကျင်းပြသထားသည့် အာဇာနည်နေ့ အကြောင်းအရာများနှင့် ပတ်သက်သည့် နံရံကပ်ပိုစတာများ၊ စာအုပ်စာစောင်များကို စိတ်ပါဝင်စားစွာလေ့လာ ကြည့်ရှုမှတ်သားခဲ့ကြ ကြောင်း သိရသည်။
DOCA (မွန်)