ပြည်ခရိုင်၊ ပြည်မြို့ရှိ ဈေးများတွင် ဇူလိုင်လနောက်ဆုံးပတ်မှစတင်၍ ဝါးယောင်းမှိုများ ဈေးကွက်ထဲတွင် ရောင်းချလျှက်ရှိပါသည်။ သဘာဝအလျောက် အလေ့ကျပေါက်လေ့ရှိသည့် မှိုများ ထဲတွင် ဝါးယောင်းမှိုမှာအပါအဝင်ဖြစ်ပြီး ပေါ်ဦးပေါ်ဖျားတွင် ဈေးကောင်းလည်းရပြီး ရောင်းအား လည်းကောင်းလျှက်ရှိပါသည်။ ဝါးယောင်းမှိုကို ပြည်မြို့ အနောက်ဘက်ကမ်းရှိ ကျေးရွာများတွင် အလေ့ကျပေါက်ရောက်တက်သောမှိုတစ်မျိုးဖြစ်ပါသည်။ မှိုများစွာထဲတွင် အဆိပ်အတောက် အလွန် နည်းပါးသော မှိုတစ်မျိုးဖြစ်သဖြင့် စားသုံးသူများက ဝယ်ယူစားသုံးကြပါသည်။ ဝါးယောင်းမှိုကို ကြော်၍တစ်မျိုး၊ ငရုတ်သီးစီမ်းနှင့်ချက်၍တစ်မျိုး၊ မှိုချဉ်ပြုလုပ်၍တစ်ဖုံ စားသုံးကြပါသည်။ ဝါးယောင်းမှိုစားသုံးခြင်းဖြင့် လူကိုဘေးအန္တရာယ်မဖြစ်စေနိုင်သည့်အပြင် ဗီတာမင်ဓါတ် များကို လည်းရရှိနိုင်ပါသည်။ ပေါ်ဦးပေါ်စ ဝါးယောင်းမှိုဈေးများမှာ တစ်ပိဿာလျှင် ၇၀၀၀ကျပ်ဖြင့် ဈေးကောင်းရပြီး အရောင်းအဝယ်လည်းဖြစ်လျှက်ရှိပါသည်။ တချို့ခေါင်းရွက်ဈေးသည်များမှာ ဝါးယောင်းမှိုကို အင်ဖက်ဖြင့် ကတော့လေးများထိုး၍ ရောင်းခသည်ကိုလည်း တွေ့ရပါသည်။ ရာသီ ပေါ်ဖြစ်၍ စားသုံးသူများအနေဖြင့် ဈေးကောင်းပေး၍ ဝယ်ယူစားသုံးကြသလို ရောင်းချသူများ အနေဖြင့်လည်း တွက်ခြေကိုက်လျှက်ရှိကြောင်းသိရှိရပါသည်။
DOCA(ပဲခူး)