ရှမ်းပြည်နယ်(တောင်ပိုင်း) ဆီဆိုင်၊ နမ့်စန်၊ မိုင်းကိုင်၊ မိုင်းပန်မြို့များတွင် အများဆုံးစိုက်ပျိုးကြပါသည်။ နာနတ်အပင် သက်တမ်းမှာ (၇) နှစ်ရှိပြီး “နှစ်လတ်” သီးနှံ ဖြစ်ပါသည်။ တစ်ကြိမ်စိုက်ပျိုးပြီး ကျန်နှစ်များတွင် ပေါင်း/မြက် ရှင်းလင်းခြင်း နှင့် အပင်ပြုစု စရိတ်သာကုန်ကျပြီး နှစ်စဉ်ဝင်ငွေရရှိသဖြင့် တောင်သူများအကျိုးအမြတ်ရရှိသည့် သီးနှံတစ်မျိုး ဖြစ်ပါသည်။ ယခင်နှစ် စတင်ထွက်ရှိသည့်အချိန်တွင် နာနတ်သီး (ဒေသသီး) တစ်လုံးလျှင် ၂၀၀၀/- မှ ၃၀၀၀/- ၊ ပျားနာနတ်(အချိုသီး) တစ်လုံးလျှင် ၃၅၀၀/- မှ ၄၀၀၀/- ရရှိပြီး ယခုနှစ် စတင်ထွက်ရှိချိန်မှာတော့ (ဒေသသီး) ၃၅၀၀/- မှ ၄၀၀၀/- ၊ ပျားနာနတ် ၅၅၀၀/- မှ ၆၀၀၀/- ဖြင့် ရောင်းချနေကြောင်း တွေ့ရှိရပါသည်။ တန်ဖိုးမြှင့်ထုတ်ကုန် (Value Added) ဖြစ်သည့် ဝိုင်လုပ်ငန်းရှင်များ၊ ဖျော်ရည်လုပ်ငန်းရှင်များ၊ ယိုလုပ်ငန်းရှင်များမှလည်း သီးနှံထွက်ရှိသည့် မြို့/ရွာများအထိ ခြံပြတ်လာရောက်ဝယ်ယူလျက်ရှိကြောင်း သိရှိရပါသည်။ ရှမ်းပြည်နယ် တောင်ပိုင်းမှ ထွက်ရှိလာသော နာနတ်သီးမျာအား ဒေသတွင်းနှင့် နေပြည်တော်၊ ရန်ကုန်မြို့များသို့ တင်ပို့ရောင်းချလျက်ရှိကြောင်း၊ ယခင်နှစ်များထက် ယခုနှစ်က ဈေးပိုမိုရရှိနိုင်သဖြင့် တောင်သူများ စားဝတ်နေရေးအဆင်ပြေမည် ဖြစ်ပါကြောင်း သိရှိရပါသည်။
DOCA(ရှမ်း)