မကွေးတိုင်းဒေသကြီး၊ မကွေးမြို့ပေါ်ရှိဈေးများတွင် မင်းဘူးမြို့၊ ကျောက်တန်းကျေးရွာမှ ထွက်ရှိသော ပန်းများဝင်ရောက်လျက်ရှိရာ ဇွန်၊ ဇူလိုင်လများတွင် လှိုင်လှိုင်ထွက်ပေါ်လျက်ရှိသော နှင်းပန်းများ အရောင်းအဝယ်သွက်လျက်ရှိကြောင်း သိရသည်။
နှင်းပန်းမှာအဖြူရောင်ရှိပြီး ရနံ့မှာလည်း သင်းပျံ့ပျံ့မွှေးကြိုင်နေ၍ ဘုရားလှုမည့်သူများ နှင့်ပန်းအလှဆင်သူများ အဝယ်များပါသည်။ နှင်းပန်းတစ်ကြိမ်စိုက်ပျိုးလျှင် သုံးနှစ်သက်တမ်းရှိပြီး မိုးရာသီတွင် အဖူးအပွင့်များပိုမိုသန်မာ၍ ကျန်ရာသီများတွင် ပုံမှန်ရေသွင်းလျှင် ဆယ့်နှစ်ရာသီ ဖြစ် ထွန်းသော ပန်းတစ်မျိုးဖြစ်ပါသည်။ နှင်းပန်းကို မိုးကြိုပန်းဟူ၍လည်း လူသိများကြပါသည်။ မြေပြန့် ဒေသ၌ အများဆုံးစိုက်ပျိုးထားသည်ကို တွေ့ရပါသည်။ ၂၀၂၅ခုနှစ်၊ ဇူလိုင်လ(တတိယပတ်)တွင် ဖြစ်ပေါ်နေသော နှင်းပန်းဈေးနှုန်းမှာ နှင်းပန်းအခက်(၅)ခက်ပါတစ်စည်းလျှင် ကျပ်(၂၅၀၀)ဖြင့် အရောင်းအဝယ်ဖြစ်လျက်ရှိကြောင်း သိရသည်။ ဘုရားပန်းဈေးကွက်တွင် နှင်းပန်းရောင်းချရာ၌ တခြားပန်းများကဲ့သို့ တွင်တွင်ကျယ်ကျယ်ရောင်းချရကြောင်းလည်း သိရသည်။ သို့ဖြစ်ပါ၍ မိမိခြံဝန်း အတွင်းရှိ မြေဧကအနည်းငယ်ခန့်နေရာပေး၍ နှင်းပန်းစိုက်ပျိုးထားရှိလျှင် အိမ်ထောင်စုများအနေ ဖြင့် နေ့စဉ်ဝင်ငွေရရှိနေသည့်အတွက် အိမ်ခြံမြေများတွင် တိုးချဲ့စိုက်ပျိုးသင့်သော ပန်းတစ်မျိုးဖြစ်ပါ ကြောင်း ရေးသားတင်ပြလိုက်ရပါသည်။
DOCA(မကွေး)