ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်တွင် ၂၀၂၅-၂၀၂၆ဘဏ္ဍာနှစ် မိုးစပါး စိုက်ပျိုးရာသီတွင် လျာထားဧက အနေဖြင့် (၁၅၃၆၆၇)ဧကဖြစ်ပြီး ဩဂုတ်လအစတွင် မိုးစပါး (၁၅၃၆၁၀)ဧက စိုက်ပျိုးပြီးစီးပြီးဖြစ်ကြောင်း မြို့နယ်မြေစာရင်းဦးစီးဌာနမှ သိရသည်။
သုံးခွမြို့နယ်၌ ယခုနှစ်မိုးစပါး စိုက်ပျိုးရာသီတွင် ဒေသတွင်း စားနပ်ရိက္ခာဖူလုံစေရေးနှင့် ဆန်စပါးစိုက်ပျိုးထုတ်လုပ်မှု ကဏ္ဍဖွံဖြိုးတိုးတက်စေရန် သာမက ပြည်ပသို့တင်ပို့နိုင်ရေးအတွက် ရည်ရွယ်၍ သုံးခွမြို့နယ်ရှိ ဒေသခံတောင်သူများမှ တစ်မြို့နယ်လုံး မိုးစပါးသီးနှံစိုက်ဧက (၁၅၃၆၁၀)ဧက အောင်မြင်စွာစိုက်ပျိုးနိုင်ခဲ့ကြောင်း သိရသည်။
သုံးခွမြို့နယ်တွင် ၂၀၂၅-၂၀၂၆ ဘဏ္ဍနှစ် မိုးစပါးစိုက်ပျိုးရာသီချိန်တွင် မြို့နယ် စိုက်ပျိုးရေးဦးစီးဌာနမှ တာဝန်ရှိသူများက ဒေသနှင့်ကိုက်ညီသည့် မျိုးကောင်းမျိုးသန့်များရရှိရေး၊ အထွက်နှုန်းကောင်းမွန်စေရေး၊ စိုက်ပျိုးနည်းစနစ်များ မှန်ကန်မှုရှိစေရေး၊ သွင်းအားစု ဓာတ်မြေဩဇာနှင့် ပိုးသတ်ဆေးများ စနစ်တကျ သုံးစွဲတတ်စေရေးတို့အတွက် သက်ဆိုင်ရာ ဆက်စပ်ဌာနနှင့်စိုက်ပျိုးမှုဆိုင်ရာ ကြီးကြပ်ကွပ်ကဲရေးအဖွဲ့များပူးပေါင်း၍ ဒေသခံတောင်သူများအား စိုက်ပျိုးရေးအသိပညာပေးလုပ်ငန်းများကို စဉ်ဆက်မပြတ် ဆောင်ရွက်ပေးလျက်ရှိကြောင်း သိရှိရပါသည်။
DOCA (ရန်ကုန်)