စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မုံရွာခရိုင် ဦးစီးမှူးရုံးမှ ဒု-ခရိုင်ဦးစီးမှူးနှင့် ဝန်ထမ်း (၁)ဦးတို့သည် (၂၄.၈.၂၀၂၂)ရက်နေ့ မနက်(၁၀:၀၀) နာရီအချိန်တွင်မုံရွာမြို့၊ အောင်ချမ်းသာရပ်ကွက်ရှိ “အိအိချွန်” ပဲချောင်း၊ မုန့်ကြိုးလိမ်၊ စာကလေး ခွေကြော်ရောင်းချသည့်လုပ်ငန်းသို့ သွားရောက်၍ ဆီသုံးစွဲမှုပမာဏနှင့် လုပ်ငန်းလည်ပတ်မှု အခြေအနေတို့ကို သိရှိနိုင်ရန် သွားရောက်တွေ့ဆုံခဲ့ပါသည်။
ထိုသို့ တွေ့ဆုံခဲ့ရာတွင် “အိအိချွန်” ပဲချောင်း၊ မုန့်ကြိုးလိမ်၊ စာကလေးခွေကြော် ရောင်းချသည့်လုပ်ငန်းရှင် ဒေါ်ခင်လေးရီမှ မိမိတို့လုပ်ငန်းကို ယခင်ကလုပ်သား (၁၆)ဦးဖြင့် လုပ်ကိုင်ခဲ့ပြီး ယခုအခါတွင် လုပ်သားအင်အား ( ၇ ) ဖြင့် လည်ပတ်လျှက်ရှိပါကြောင်း၊ ယခင်က စားအုန်းဆီ တစ်ပိဿာကို (၁၇၀၀) ကျပ်နှုန်းဖြင့် ဝယ်ယူရပြီး တစ်ရက်လျှင် ပျမ်းမျှ ဆီ(၁၁၀) ပိဿာခန့် ကုန်ကြောင်း၊ ပဲမှုန့် (၁၀၀) ပိဿာ အသုံးပြုပြီးပဲချောင်းကို အဓိကထားထုတ်လုပ် ကြောင်း၊ ပဲချောင်း အထုပ်(၃၀၀၀) ခန့်ရရှိပြီးမှ ပိုသောပဲမှုန့်များကို မုန့်ကြိုးလိမ်နှင့် စာကလေးခွေ အဖြစ် ထုတ်လုပ်ကြောင်း၊ ယခုအခါတွင် ဆီတစ်ပိဿာကို (၈၅၀၀-၁၂၀၀၀) ကျပ် နှုန်းဖြင့် ဝယ်ယူရသဖြင့် တစ်ရက်လျှင်ပျမ်းမျှ ဆီ(၄၀)ပိဿာခန့်သာ လုပ်နိုင်တော့ကြောင်း၊ ပဲမှုန့်(၇၅)ပိဿာ အသုံးပြုပြီး ပဲချောင်းအထုပ်ရေ (၂၀၀၀)ထုပ် ရရှိပြီးမှသာ ပိုသောပဲမှုန့်များကို မုန့်ကြိုးလိမ်နှင့် စာကလေးခွေအဖြစ် ထုတ်လုပ်ကြောင်း၊ ယခင်က တစ်လလျှင် ပိတ်ရက်မရှိ လုပ်ငန်းလည်ပတ် နိုင်ပြီး ယခုအခါတွင် အလုပ်သမားများကို အလုပ်လက်မဲ့ မဖြစ်စေရေးအတွက် တစ်ပတ်တွင်(၃)ရက်၊ တစ်လလျှင်(၁၂)ရက်သာ လည်ပတ်နိုင်တော့ကြောင်း၊ မိမိတို့ထုတ်ကုန်များကို မုံရွာမြို့ပေါ်ရှိဈေးများ၊ ခရိုင်အတွင်းရှိမြို့များသို့ ဖြန့်ဖြူးရောင်းချသည့်အပြင် ချင်းတွင်းမြစ်အထက်ပိုင်းဖြစ်သော ကလေးဝမြို့၊ မင်းကင်းမြို့၊ မော်လိုက်မြို့၊ ဖောင်းပြင်မြို့နှင့် ခန္တီးမြို့များသို့ ပို့ဆောင်ပေးရကြောင်း ယခုအခါတွင် ကုန်ဈေးနှုန်းကြီးမြင့်နေမှုကြောင့် အဓိကကုန်ကြမ်းဖြစ်သော ပဲမှုန့်၊ ဆီ၊ သကြား၊ ထန်းလျက်များ ဝယ်ယူစရိတ်မြင့်တက်နေသည့်အပြင် ထုပ်ပိုးသည့်အိတ်များ၊ တံဆိပ်ရိုက်ခများ၊ သယ်ယူပို့ဆောင်ခ များပါ မြင့်တက်နေမှုကြောင့် ယခင်က မုန့်တစ်ထုပ်လျှင်(၃၀၀-၅၀၀) ကျပ် ရောင်းချရပြီး ယခုအချိန် တွင် မုန့်တစ်ထုပ်လျှင် (၅၀၀-၁၀၀၀) ရောင်းချမှသာ အဆင်ပြေတော့ကြောင်း၊ ထို့ကြောင့် ပုံမှန်လုပ်ငန်းလည်ပတ်ရန် အခက်အခဲရှိလာသဖြင့် ဩဂုတ်လမှစတင်ပြီး လုပ်ငန်းလည်ပတ်မှု ရပ်ဆိုင်းထားရကြောင်း ၊ နိုင်ငံတော်အစိုးရမှ စားအုန်းဆီများကို ယခင်ကကဲ့သို့ ဈေးနှုန်းချိုသာစွာဖြင့်လည်းကောင်း၊ လိုအပ်သလောက် ဝယ်ယူရရှိနိုင်ရေးအတွက်လည်းကောင်း၊ မုန့်လုပ်ငန်းရှင်များ အသင်းအတွက် သီးသန့်ခွဲတမ်းစနစ်ဖြင့် ရောင်းချပေးနိုင်မည်ဆိုပါက ပိုမိုအဆင်ပြေနိုင်မည်ဖြစ်ကြောင်း ဆွေးနွေးသိရှိခဲ့ရပါသည်။
DOCA(စစ်ကိုင်း)