မြင်းခြံခရိုင်အတွင်းတည်ရှိသော နွာထိုးကြီးမြို့နယ်သည် မိုးကောင်းသောက်ယာမြေများ၌ ပဲမျိုးစုံ၊ ပြောင်း၊ ဆီထွက်သီးနှံနှင့် ကြက်သွန်နီတို့စိုက်ပျိုးလျက်ရှိရာ မိုးပဲတီစိမ်းသီးနှံကိုလည်း တောင်သူများအနေဖြင့် အများဆုံးစိုက်ပျိုးကြောင်းသိရှိရသည်။ မိုးဦးပဲတီစိမ်းသီးနှံကို (မေလ-ဇွန်လ) စိုက်ပျိုးထားရှိပြီး (ဩဂုတ်လ-စက်တင်ဘာလ) တို့တွင် ရိတ်သိမ်းမည်ဖြစ်ကြောင်း၊ စိုက်ပျိုးချိန်မှ ရိတ်သိမ်းချိန်အထိ (၄) လခန့် ကြာမြင့်ကြောင်း သိရှိရသည်။
၂၀၂၅-၂၀၂၆ ခုနှစ်တွင် နွာထိုးကြီးမြို့နယ်၌ မိုးကြိုပဲတီစိမ်း စိုက်ဧက (၂၁၂) ဧကစိုက်ပျိုးထားရှိကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ စိုက်ပျိုးရန်ကျန်ရှိသော ဧကများအား ဆက်လက်စိုက်ပျိုးနေကြောင်း၊ တောင်သူများအနေဖြင့် ရာသီမရွေး စိုက်ပျိုးနိုင်သော ရေဆင်း (၃) ကို စိုက်ပျိုးထားရှိပြီး ထွန်ကြောင်းခံ၍ တစ်ဧကမျိုး( ၆ -၇) ပြည်ကို ကြဲပတ်စနစ်ဖြင့် စိုက်ပျိုးထားရှိကြောင်း၊ အပင်ခြေတွင် တန်းကြား (၁၈) လက်မ၊ ပင်ကြား (၄) လက်မထား၍ စိုက်ပျိုးကြောင်း၊ အပင်ပေါက်ညီညာ၍ အပင်ပေါက်ကောင်းစေရန် ထယ်ရေးချရကြောင်း၊ အပင်ခြေတွင် အစိုဓာတ်ကောင်းပြီး စိုက်ပျိုးချိန်မှန်ကန်ပါက အထွက်နှုန်း ပိုမိုကောင်း မွန်ကြောင်း သိရှိရသည်။ ယခင်နှစ်ထွက်နှုန်းမှာ (၈) တင်းခန့်ထွက်ရှိကြောင်း၊ ယခုနှစ်တွင် ရာသီဥတုကောင်းပြီး အစိုဓာတ်ရှိသောကြောင့် ယခင်နှစ်ထက်အထွက်နှုန်း ပိုမိုထွက် ရှိနိုင်မည်ဟုခန့်မှန်းရကြောင်း ပဲတီစိမ်းစိုက်တောင်သူတစ်ဦး၏ ပြောပြချက်အရသိရှိရသည်။ ယခုဩဂုတ်ပထမပတ်တွင် တောင်သာမြို့နယ်၌ ပဲတီစိမ်းတစ်ပိဿာလျှင်( ၅၃၀၀) ကျပ်၊ တစ်တင်းလျှင် (၁၀၀၇၀၀)ကျပ် ပေါက်ဈေးရှိကြောင်း၊ ထွက်ရှိသောပဲတီစိမ်းများကို ဒေသတွင်းစားသုံးရန်နှင့် ပိုလျှံသည်များကို မြင်းခြံမြို့၊ မန္တလေးမြို့နှင့် ရန်ကုန် ဘုရင့်နောင်ပွဲရုံများသို့ တင်ပို့ရောင်းချကြောင်း သိရှိရပါသည်။
DOCA(မန္တလေး)