မကွေးတိုင်းဒေသကြီး၊ သရက်ခရိုင်၊ သရက်မြို့၊ မြို့မဈေးနှင့် အခွန်လွတ်ဈေးများတွင် ရောင်းချလျက်ရှိသည့် ကြောင်လျှာသီးများမှာ ကျေးရွာများရှိ ခြံစည်းရိုးများတွင် နှစ်ရှည်ပင်အဖြစ် စိုက်ပျိုးပြီး ရောင်းချကြောင်း သိရှိရသည်။
ကြောင်လျှာသီးသည် ဈေးနှုန်းသက်သာပြီး အနုသည် ခါး၏။ ဖန်/ချို အရသာရှိပြီး ဝမ်းမီးကို တောက်စေသည်။ ဝမ်းလားသောအနာ၊ အစာမကြေသောအနာ၊ လေအားကြီးသောအနာ၊ ဝမ်း တွင်းပူသောအနာ၊ ဝမ်းချုပ်သော အနာတို့ကို ငြိမ်းစေတတ်၏။ နားလေးသူများ ကြောင်လျှာသီး ကိုစားလျှင် သက်သာစေသည်။ ကြောင်လျှာသီးကို ပါးပါးလှီး၍ ဆန်ဆေးရည်နှင့် တစ်ညရေစိမ်ပြီး သုပ်၍စားလျှင်သော်လည်းကောင်း၊ မီးကင်ပြီး နှပ်စား၍သော်လည်းကောင်း၊ တို့စရာအဖြစ်သော်လည်းကောင်း အမျိုးမျိုးမိမိကြိုက်နှစ်သက်သကဲ့သို့ စားသုံးကြသည်မှာ မြန်မာလူမျိုးတို့၏ ဟင်းလျာကောင်းတစ်ခွက်ဖြစ်ပါသည်။ ကြောင်လျှာပွင့်ကိုလည်း ပြုတ်ပြီး သုပ်စားခြင်း၊ ကြောင်လျှာပွင့်ကို ရေစိမ်ပြီး အခြားသီးနှံများဖြင့် ရော၍ ကြော်စားခြင်းများကိုလည်း သုံးဆောင်နိုင်ပါသည်။ ကြောင်လျှာသီး၊ အရွက်နှင့် အပွင့်တို့ကိုစားလျှင်လည်း နားလေး သက်သာစေပါသည်။ ၂၀၂၅ခုနှစ်၊ သြဂုတ်လ(ပထမပတ်)တွင် ဖြစ်ပေါ်နေသော ကြောင်လျှာသီးဈေးနှုန်းမှာ အကြီး(၁)တောင့်လျှင် ကျပ်(၅၀၀)နှင့် အသေး(၁)တောင့်လျှင် ကျပ်(၃၅၀)ဖြင့် ရောင်းချလျက်ရှိကြောင်း သိရှိရသည်။
DOCA(မကွေး)