ဧရာဝတီတိုင်းဒေသကြီး၊ မြန်အောင်ခရိုင်၊ အင်္ဂပူမြို့နယ်တွင် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်လျက်ရှိပြီး ပဲ၊ပြောင်းနှင့် ဆီထွက်သီးနှံများလည်း စိုက်ပျိုးလျက်ရှိပါသည်။ ဆီထွက် သီးနှံများအနက် မိုးမြေပဲသီးနှံကို အင်္ဂပူမြို့နယ်တွင် စိုက်ဧက(၂၉၅၃)ဧက ရှိပါသည်။ တောင်သူများ သည် မိုးမြေပဲကို သဲနှုန်းမြေအမျိုးအစားတွင် တစ်နိုင်တစ်ပိုင် စိုက်ပျိုးလေ့ရှိကြပါသည်။ ဒေသတွင်း ထွက်ရှိသော မြေပဲများကို စားသောက်ကုန် လုပ်ငန်း၊ ရိုးရာမုန့်လုပ်ငန်းများတွင် အသုံးပြုလျက်ရှိပြီး၊ မြေပဲကို ကြိတ်ခွဲ၍ မြေပဲဆီအဖြစ်လည်း ထုတ်လုပ်ရောင်းချလျက်ရှိရာ ဒေသအတွင်း မြေပဲများ ပုံမှန်အရောင်းအဝယ် ဖြစ်နေကြောင်း သိရှိရပါသည်။
မိုးမြေပဲကို မေလနောက်ဆုံးပတ်နှင့် ဇွန်လ ပထမပတ်များတွင် စတင် စိုက်ပျိုးကြပြီး၊ ယခု ဩဂုတ်လဆန်းပိုင်တွင် စတင်ရိတ်သိမ်းကြပါသည်။ မိုးမြေပဲ စိုက်ပျိုးရာတွင် တစ်ဧကလျှင် (၁၁)သိန်း ခန့် ကုန်ကျကြောင်းသိရှိရပါသည်။ယခုအခါ ဒေသတွင်း မိုးမြေပဲများထွက်ရှိပြီဖြစ်ရာ တစ်ဧကလျှင် အထွက်နှုန်း အနေဖြင့် (၅၆ တင်းမှ ၆၀ တင်း)ကြားထွက်ရှိပြီး၊ မြေပဲအရည်အသွေးအပေါ် မူတည်၍ မြေပဲတောင့်တစ်တင်းလျှင် (၃၂၀၀၀/- ကျပ်)ဖြင့် အရောင်းအဝယ်ဖြစ်လျက်ရှိပါသည်။ မိုးမြေပဲစိုက်ပျိုး ရာတွင် ကုန်ကျစရိတ် သက်သာပြီး အကျိုးအမြတ်များ ရရှိသည့်အပြင် ပြည်တွင်းစားသုံးဆီ ဖူလုံရုံသာ မက မြေပဲပင်မှ ထွက်ရှိသော မြေပဲရိုးနှင့် မြေပဲမှော်များကိုလည်း ကျွဲ၊ နွား အစာအဖြစ် အသုံးပြုရသော ကြောင့် မြေပဲစိုက်တောင်သူများ တွက်ချေကိုက်သည့် သီးနှံတစ်မျိုးဖြစ်ကြောင်း သိရှိရပါသည်။
DOCA(ဧရာဝတီ)