မွန်ပြည်နယ်၊ ဘီးလင်းမြို့နယ်ဒေသထွက် ဗမာဒူးရင်းသီးများသည် ဇွန်လတွင် စတင်ပေါ်ပြီး ဇူလိုင်လနှင့် ဩဂုတ်လတို့တွင် လှိုင်လှိုင်ထွက်ပေါ်ကာ မိုးများသည့်ကာလ ဖြစ်သောကြောင့် ဒူးရင်းသီးစားသုံးသူများ အပူစာဖြစ်သည့် ဒူးရင်းသီးကို ပိုမိုစားသုံးကြကြောင်း သိရသည်။
ဒူးရင်းသီးထွက်ရှိရာ ဘီးလင်းမြို့နယ်ရှိ အလူလေးကျေးရွာ၊ အလူးကြီးကျေးရွာ၊ ပိုင်ဒဝယ် ကျေးရွာ၊ နတ်ကြီးကျေးရွာနှင့် မဲဝိုင်ကျေးရွာများမှ ဒူးရင်းသီးခြံပိုင်ရှင်များမှ ဘီးလင်းမြို့ပေါ်တွင် လာရောက်ရောင်းချသည်များရှိသကဲ့သို့ ဘီးလင်းမြို့မှ ဒူးရင်းသီးရောင်းချသူများမှလည်း ထိုကျေးရွာများသို့ သွားရောက်ဝယ်ယူ၍ ဘီးလင်းမြို့တွင် ပြန်လည်ရောင်းချသည်များလည်း ရှိကြောင်း၊ ဒူးရင်းသီးတစ်လုံးလျှင် အရွယ်အစားအလိုက် အသေးတစ်လုံးလျှင် ၅၀၀၀ ကျပ်၊ အကြီးတစ်လုံးလျှင် ၁၅၀၀၀ ကျပ်မှ ၂၀၀၀၀ ကျပ်ဝန်းကျင်းဖြင့် အရောင်းအဝယ်ဖြစ်ထွန်းနေပြီး ဈေးကောင်းရရှိ၍ အရောင်းသွက်သောကြောင့် ဘီးလင်းမြို့နယ်မှ ဒူးရင်းခြံပိုင်ရှင်များ အဆင်ပြေ ကြကြောင်း သိရှိရပါသည်။
DOCA (မွန်)