ကမ္ဘောဒီးယားအမျိုးသားဘဏ် (NBC) သည် ဒေသတွင်း ချောမွေ့သော ငွေပေးချေသူများအတွက် QR ကုဒ်အခြေခံ ငွေပေးချေမှုများကို ချဲ့ထွင်ရန် ပိုမိုကျယ်ပြန့်သော မဟာဗျူဟာ၏ တစ်စိတ်တစ်ပိုင်းအဖြစ် ဖိလစ်ပိုင်နှင့် နှစ်နိုင်ငံ နယ်စပ်ဖြတ်ကျော် ငွေပေးချေမှုများကို စတင်ရန် စီစဉ်နေကြောင်း NBC က ၁၉-၈-၂၀၂၅ ရက်နေ့တွင် ထုတ်ပြန်ခဲ့သည်။ NBC အုပ်ချုပ်ရေးမှူး Chea Serey သည် ၁၈-၈-၂၀၂၅ ရက်နေ့က ဖိလစ်ပိုင်နိုင်ငံ Bohol ပြည်နယ်တွင် ဖိလစ်ပိုင်ဗဟိုဘဏ် အုပ်ချုပ်ရေးမှူး Eli M Remolona Jr နှင့် နှစ်နိုင်ငံဘဏ်များကြား ဒုတိယနှစ်ပတ်လည် အစည်းအဝေးတွင် အဆိုပါ အစီအစဉ်ကို တင်ပြခဲ့ခြင်းဖြစ်သည်။ နှစ်နိုင်ငံ နယ်စပ်ဖြတ်ကျော်မှုစတင်ခြင်းသည် ဗဟိုဘဏ်နှစ်ရပ်နှင့် နှစ်နိုင်ငံငွေကြေးမူဝါဒအပိုင်းတွင် နှစ်နိုင်ငံပူးပေါင်းဆောင်ရွက်မှုကို အားကောင်းစေရန်ကြိုးပမ်းမှု၏ အခြေခံအုတ်မြစ်တစ်ခု ဖြစ်လာခဲ့သည်။ ဗဟိုဘဏ်နှစ်ရပ်လုံး၏ ခေါင်းဆောင်များသည် မက်ခရိုစီးပွားရေး၊ ဘဏ်လုပ်ငန်းကဏ္ဍ၊ သုံးစွဲသူများကို အကာအကွယ်ပေးရေး မြှင့်တင်ရေးတို့နှင့် ပတ်သက်၍ အမြင်ချင်းဖလှယ် ဆွေးနွေးခဲ့ကြသည်ဟု NBC ၏ ထုတ်ပြန်ချက်တွင် ဖော်ပြထားသည်။ အစည်းအဝေးတွင် နှစ်နိုင်ငံပြည်သူများအကြား ကုန်သွယ်မှုနှင့်ခရီးသွားဖလှယ်မှု ပိုမိုလွယ်ကူချောမွေ့စေရန် မကြာမီကာလအတွင်းတွင် ဖွင့်လှစ်ရန် စီစဉ်ထားသည့် နှစ်နိုင်ငံနယ်စပ်ဖြတ်ကျော် ငွေပေးချေမှု အစီအစဉ်ကို QR ကုဒ်စနစ်ဖြင့် အရှိန်အဟုန်မြှင့်တင်ဆောင်ရွက်သွားရန် သဘောတူညီခဲ့ကြောင်း ထုတ်ပြန်ချက်တွင် ဖော်ပြထားသည်။ NBC ၏အဆိုအရ ဖွံ့ဖြိုးတိုးတက်မှုသည် သက်ဆိုင်ရာ အဖွဲ့အစည်းများနှင့် နယ်စပ်ဖြတ်ကျော်ငွေပေးချေမှုအငြင်းပွားမှုများကို အချိန်နှင့်တစ်ပြေးညီ ဖြေရှင်းရာတွင်ပါဝင်ရန် အထူးသဖြင့် နယ်စပ်ဖြတ်ကျော်ငွေပေးချေမှုများ၏ဘေးကင်းမှုနှင့် ထိရောက်မှုအားကောင်းစေရန် ဘဏ်နှင့်ဘဏ္ဍာရေးအဖွဲ့အစည်းများအား တွန်းအားပေးမည်ဖြစ်ကြောင်း သိရှိရပါသည်။
Source: Khmer Times
DOCA(ရန်ကုန်)