အိမ်ရှင်မများအတွက် ဟင်းချက်စရာအမယ်တစ်ခုအဖြစ်ရှိနေသော (Bamboo Shoot) ဝါးပင်ပေါက်စလေးများကို မျှစ်ဟုခေါ်ကြပါသည်။ မျှစ်များသည် ဝါးပင်ပေါက်လေးများဖြစ်သည့်အတွက် နုပြီး အရသာချိုသည်။ မျှစ်တွင် ဗီတာမင်များ၊ သတ္ထုဓာတ်များ ပါဝင်သည့်အတွက် မျှစ်စားသုံးခြင်းသည် ကျန်းမာရေးအတွက် များစွာအထောက်အကူဖြစ်စေနိုင်ပါသည်။
မျှစ်များကို ကြော်၍စားသောက်ကြသည်။ ပြုတ်၍ ငပိထောင်း၊ ငပိရည်များဖြင့်လည်း တို့စားကြသည်။ မျှစ်သုပ်စားကြသည်များလည်းရှိသည်။ အခြားပုံစံအမျိုးမျိုးဖြင့်လည်း ချက်ပြုတ်စား သောက်ကြပါသေးသည်။
ကယားပြည်နယ်၊ လွိုင်ကော်မြို့၊ သီရိမင်္ဂလာဈေးအတွင်း (၂၇-၈-၂၀၂၅)ရက်နေ့တွင် ဖြစ်ပေါ်နေသော မျှစ်ဈေးနှုန်းမှာ မျှစ်ချဉ်တစ်ပိဿာလျှင်(၈၀၀၀/-)ကျပ်၊ မျှစ်စပ် တစ်ပိဿာလျှင် (၄၀၀၀/-)ကျပ်၊ ချိုးယူအခွံခွာပြီးသား မပြုတ်ရသေးသောမျှစ်(ရိုးရိုး) တစ်ပိဿာလျှင်(၃၀၀၀/-) ကျပ်ဖြင့် အရောင်းအဝယ်ဖြစ်လျက်ရှိပါသည်။ မျှစ်ချဉ်များကို နေပြည်တော်၊ မန္တလေးမြို့၊ မိတ္ထီလာမြို့ဘက်မှ ဝယ်ယူရောင်းချကြပြီး မျှစ်စပ်နှင့် မျှစ်(ရိုးရိုး)များကို ယခုမိုးတွင်းကာလတွင် ဒေသအတွင်း ချိုးယူရောင်းချကြကြောင်း မျှစ်ရောင်းသူဈေးသည် တစ်ဦးထံမှ သိရှိရပါသည်။
DOCA(ကယား)