ကာဇတ်စတန်နိုင်ငံဆိုင်ရာအင်ဒိုနီးရှားသံအမတ် Fadjroel Rachman သည် ကုန်သွယ်ရေး၊ ရင်းနှီးမြှုပ်နှံမှုနှင့် ခရီးသွားကဏ္ဍတို့တွင် ကာဇတ်စတန်နှင့် ပူးပေါင်းဆောင်ရွက် ရန်အခွင့်အလမ်းများကိုဆွေးနွေးရန်အတွက် East Kalimantan ပြည်နယ်အစိုးရထံသို့ လည်ပတ် ခဲ့ကြောင်း သိရပါသည်။ ပြည်နယ်အုပ်ချုပ်ရေးအဖွဲ့ရုံး၏ စီးပွားရေးရာနှင့် ဖွံ့ဖြိုးတိုးတက်မှု အုပ်ချုပ်ရေးအဖွဲ့မှ တာဝန်ရှိသူတစ်ဦးဖြစ်သည့် Ujang Rachmad က ကာဇတ်စတန်သည် စားအုန်းဆီ၊ ကိုကိုး၊ ရာဘာနှင့် ရေထွက်ကုန်များပါဝင်သည့် များစွာသောအဓိကကုန်ပစ္စည်းများ ကို East Kalimantan ထံမှ လိုအပ်ကြောင်း ပြောကြားခဲ့ပါသည်။ ထို့ပြင်ခရီးသွားကဏ္ဍသည် လည်း East Kalimantan ၏ ယဉ်ကျေးမှုနှင့် သဘာဝအလှတရားများကို အာရှဗဟိုဒေသတွင် ဆွဲဆောင်ရန် အဓိကဂိတ်တံခါးတစ်ခုဖြစ်လာနိုင်ကြောင်း သိရပါသည်။ Rachmad က ၎င်းတို့ သည် East Kalimantan နှင့် ကာဇတ်စတန်ကြားတွင် ကုန်သွယ်ရေးဆက်နွယ်မှုခိုင်မာရန် မျှော်လင့်ကြောင်းနှင့် ၎င်းတို့၏ ကုန်ပစ္စည်းများသည် ယှဉ်ပြိုင်နိုင်စွမ်းရှိပြီး ကာဇတ်စတန် ဈေးကွက်လိုအပ်ချက်များနှင့် ကိုက်ညီရန် လိုအပ်ကြောင်း ပြောကြားခဲ့ပါသည်။ ခြေလှမ်းခိုင်မာ စေရန်အတွက် ပြည်နယ်အစိုးရသည် ရင်းနှီးမြှုပ်နှံမှုဖိုရမ်နှင့် ကာဇတ်စတန်ရင်းနှီးမြှုပ်နှံသူများနှင့် East Kalimantan စီးပွားရေးလုပ်ငန်းရှင်များကြား တစ်ဦးချင်းစီးပွားရေးချိတ်ဆက်မှုများကျင်းပ ပြုလုပ်သွားမည်ဟု သိရပါသည်။ East Kalimantan သည် ဂျကာတာတွင်ကျင်းပမည့် အင်ဒိုနီးရှားကုန်စည်ပြပွဲတွင် အထူးပြခန်းဖွင့်လှစ်သွားမည်ဟု ပြောကြားခဲ့ပါသည်။ ထိုပြခန်းတွင် ပြည်နယ်မှစီးပွားရေးလုပ်ငန်းရှင်များသည် စီးပွားရေးချင်းပူးပေါင်းဆောင်ရွက်မှုအားကောင်းရန် ကာဇတ်စတန်ထံမှ အလားအလာရှိသောမိတ်ဖက်များနှင့် တွေ့ဆုံသွားမည်ဟု သိရပါသည်။ တစ်ချိန်တည်းမှာပင် သံအမတ် Rachman က East Kalimantan အားဗဟိုအာရှဒေသမှရင်းနှီး မြှုပ်နှံသူများနှင့် ချိတ်ဆက်ပေးရန် ကတိကဝတ်ပြုခဲ့ကြောင်း သိရပါသည်။ သံအမတ်ကြီး၏ အဆို အရ East Kalimantan ၏ ကြီးမားသောကုန်သွယ်ရေး၊ စွမ်းအင်နှင့် ခရီးသွားကဏ္ဍအလားအလာ သည်နိုင်ငံတကာဈေးကွက်သို့ထိုးဖောက်ရန် ပိုမိုတက်ကြွထက်သန်စွာ ကုန်သွယ်မှုမြှင့်တင်ရန် လိုအပ်ကြောင်း သိရပါသည်။
Antara News
DOCA (ရန်ကုန်)