ပြည်ပဲမျိုးစုံဈေးကွက်အတွင်း ပြည်ပဝယ်လက်သီးနှံများဖြစ်သော မတ်ပဲနှင့် ပဲစင်းငုံသီးနှံများမှာ ဩဂုတ်နောက်ဆုံးပတ်တွင် ဈေးနှုန်းသိသိသာသာ မြင့်တက်လာခဲ့ပြီး ယခင်သီတင်းပတ် တစ်ပတ်လုံးတွင် ကျပ် ၆သောင်းအထက်ရရှိနေခဲ့ကာ မတ်ပဲသီးနှံအနေဖြင့် လက်ကျန်ပဲအချို့ ရှိခဲ့သော်လည်း အရောင်းအဝယ်နေ့စဉ်မဖြစ်ဘဲ ရက်ခြားသာအရောင်းအဝယ်ဖြစ်ခဲ့ပါသည် ။ ပဲစင်းငုံ သီးနှံမှာ မတ်ပဲ သီးနှံလောက် လက်ကျန်မများသော်လည်း တစ်ခါတစ်ရံ အရောင်းအဝယ်ဖြစ်သည့်အခါ အိတ် ၂၀၀/ ၃၀၀ကျော် ရောင်းချမှုဖြစ်ခဲ့ကြောင်း သိရှိရပါသည်။ အဆိုပါ ပြည်ပဝယ်လက်ပဲများမှာ ပြည်ပ ဝယ်လက်အပေါ်မူတည်သလို ပြည်တွင်းငွေကြေး ဈေးနှုန်း ပေါ်မူတည်၍ ဈေးနှုန်းများ မြင့်တက် လာခဲ့ကြောင်း တွေ့ရှိရပြီး ယခုရက်ပိုင်းတွင် ဈေးအနည်းငယ်ပြန်လျော့ခဲ့ကာ မတ်ပဲ ပိဿာ၂၀ တစ်တင်းလျှင် ၆၅၀၀၀ကျပ်မှ ၆၆၀၀၀ကျပ် အကြား ဈေးရခဲ့ကာ ပဲစင်းငုံသီးနှံနှင့် ဈေးတူရနေခဲ့သည်ကို တွေ့ရှိရပါသည် ။ ယခင်နှစ်က ကာလတူအချိန် အဆိုပါ ပဲများမှာ မတ်ပဲတစ်တင်း ၅၅၀၀၀ကျပ်နှင့် ပဲစင်းငုံတစ်တင်း ၄၅၀၀၀ကျပ်ဖြင့် ရောင်းဝယ်ခဲ့ကြသည့်အတွက် မတ်ပဲသီးနှံမှာ ယခင်နှစ်ဈေးထက် ကျပ် ၁သောင်းကျော် ဈေးမြင့်တက်လာသလို ပဲစင်းငုံသီးနှံမှာ တစ်တင်းကျပ် ၂သောင်းကျော်အထိ ဈေးရရှိခဲ့ကြောင်း လေ့လာသိရှိရပါသည်။
DOCA(ပဲခူး)