စီးပွားရေးနှင့်ကူးသန်းရောင်းဝယ်ရေးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ဒု-ဦးစီးမှူးဒေါ်မွန်မွန်သက်သည် (1၅.9.2022)ရက်နေ့တွင် ပွင့်ဖြူမြို့နယ် ကျွန်းပင်စင်ကျေးရွာ၌ ပြည်တွင်းကုန်သွယ်မှုဖွံ့ဖြိုးတိုးတက်စေရေးအတွက် မိုးစပါးစိုက်တောင်သူ ဦးယုလွင်၏ စပါးစိုက်ပျိုးထွက်ရှိမှု ကုန်ကျစရိတ်နှင့်အကျိုးအမြတ် ရရှိမှု အခြေအနေကို ကွင်းဆင်း လေ့လာခဲ့ရာ ကျွန်းပင်စင်ကျေးရွာသည် အိမ်ခြေ(၁၅၀)ခန့်ရှိပြီး လူဦးရေမှာ(650) ကျော်ခန့်ရှိကြောင်း၊ နှစ်စဉ် ကိုင်းမြေနှင့်လယ်မြေများတွင် နွေ၊မိုး၊ဆောင်းသုံးသီး စိုက်ပျိုးလျက်ရှိကြောင်း၊ ကိုင်းမြေများတွင် မိုးရာသီ၌ နှမ်းစိုက်ကြောင်း၊ ဆောင်းရာသီတွင် မြေပဲ၊စတော်ပဲ၊ထော်ပတ်ပဲ၊ပြောင်းနှင့်ကြက်သွန်များကို စိုက်ပျိုးကြကြောင်း၊ လယ်မြေများတွင် နွေရာသီ၌ နှမ်းများစိုက်ပျိုးပြီး မိုးရာသီတွင် ဧရာပဒေသာစပါး စိုက်ပျိုးလျက်ရှိကြောင်း၊ တောင်သူ ဦးယုလွင်သည် မိုးစပါး(၁၀)ဧကခန့် စိုက်ပျိုးထားရှိပြီး ကိုင်းမြေ တွင်(7)ဧကခန့် ကြက်သွန်နှင့်ငရုတ်စိုက်ပျိုးထားကြောင်း၊ နှစ်စဉ်လယ်(၁)ဧကမှစပါး 75တင်းမှ80 တင်းခန့် ပျမ်းမျှထွက်ရှိကြောင်း၊ ဆည်ရေသောက် စိုက်ပျိုးသည့်အတွက် ရေလိုအပ်ချိန်တွင် ရေပေး သွင်းနိုင်၍ စပါးအထွက်နှုန်း ကောင်း မွန်ကြောင်း သိရှိရပါသည်။
မိုးစပါးစိုက်ပျိုးရန်အတွက် ဆည်ရေရရှိသော ဇူလိုင်လ(၁၅)ရက်ခန့်တွင် ဧရာပဒေသာစပါးမျိုး ကိုပျိုးထောင်ရကြောင်း၊ စပါးမျိုးစေ့ပျိုးသည်မှ ပျိုးပင်ရသည်အထိ ကုန်ကျစရိတ်မှာ (30000)ခန့် ရှိကြောင်း သိရပါသည်။ (45)ရက် သက်တန်းရှိသော စပါးပျိုးပင်ကို ဩဂုတ်လကုန်တွင် စိုက်ခင်းသို့ ပြောင်းရွှေ့စိုက်ပျိုးပြီး၊ (2)လခန့်အကြာတွင် စပါးနှံထွက်ရှိကြောင်း နိုဝင်ဘာလ ကုန်ခန့်တွင် စပါးရင့် မှည့်၍ စတင်ရိတ်သိမ်းကြကြောင်း စိုက်ပျိုးချိန်မှရိတ်သိမ်းချိန်အထိ (၃)လခွဲခန့်ကြာကြောင်း သိရပါသည်။
(၁)ဧကမိုးစပါးစိုက်ပျိုးမှု ကုန်ကျစရိတ်မှာကျွန်းပင်စင်ကျေးရွာအနေဖြင့် လက်စားလိုက်စနစ်ဖြင့် မြေပြုပြင်ခြင်းကြောင့် မြေပြုပြင်စရိတ်သက်သာခြင်း၊ ကောက်စိုက်ခ၊ပျိုးနှုတ်ခ၊ ရိတ်သိမ်းခ၊ ကောက် လှိုင်းစည်းခအတွက် အလုပ်သမားဦးရေ(40)ဦးခန့် ငှားရမ်းသုံးစွဲရကြောင်း တစ်ဦးလျှင် နေ့တွက် လုပ်အားခ(5000) ကျပ်နှုန်းပေးရသည်အတွက် လုပ်အားခ စုစုပေါင်း(200000)ခန့် ကုန်ကျကြောင်း သိရပါသည်။ကျွန်းပင်စင် ကျေးရွာသည် မိုးစပါး ဆည်ရေသောက် စိုက်ပျိုးရသော်လည်း ယခုနှစ်တွင် စပါးစိုက်ပျိုးချိန်တွင် မကြာခဏ မိုးများစွာရွာသွန်းခြင်းကြောင့် ရေသွင်းမှုအကြိမ်ရေ နည်းပါးသော် လည်း ပိုးသတ်ဆေး၊ အားဆေးအမျိုးမျိုး၊ သွင်းအားစုများ ဈေးနှုန်းများမှာ ယခင်နှစ်ထက် (၂)ဆကျော် ဈေးနှုန်းမြှင့်မား လာပါသဖြင့် ကုန်ကျစရိတ်များလာကြောင်း တစ်ဧက ထွက်နှုန်းမှာ(75)တင်းခန့် ပျမ်းမျှထွက်ရှိပြီး လယ်ကွင်းအတွင်းမှ ကောက်လှိုင်းများကို လက်စားစနစ်ဖြင့် မိမိလှည်းနွားများ ဖြင့် တလင်းအရောက် ပို့ဆောင်ပေးရကြောင်း၊ တစ်ဧကကုန်ကျစရိတ်မှာ (400000)ကျော်ခန့် ရှိပါကြောင်း၊ ယခင်နှစ်များက စပါးပေါ်စတွင် (850000)ခန့် ရှိခဲ့သော်လည်း လက်ရှိဆန်ဈေးနှုန်းအရ စပါးဈေး (၉)သိန်းမှ (၉)သိန်းခွဲခန့်ရရှိမည်ဟုခန့်မှန်း ထားကြောင်း သိရပါသည်။
ကျွန်းပင်စင်ကျေးရွာသည် လယ်မြေ၊ ကိုင်းမြေများပေါ်တွင် အမှီပြု၍ နေထိုင်ပြီး စပါးစိုက်ဧကလည်းများကြောင်း ဆန်ထွက်ရှိမှုမှာလည်း များပြားသောကြောင့် စားသုံးပြီးပိုလျှံသော စပါး၊ဆန်များကို မင်းဘူး၊မကွေးမြို့နှင့် ချောက်မြို့များသို့ ဖြန့်ဖြူးလျက်ရှိပါကြောင်း သိရှိရပါသည်။ စိုက်ပျိုးရေးလုပ်ငန်း လုပ်ကိုင်ရာတွင် လက်စားလိုက် စနစ်ဖြင့်ဆောင်ရွက်သောကြောင့် လုပ်အားခ ကုန်ကျမှုသက်သာပြီး ဝင်ငွေများသောကြောင့် အခြား ကျေးရွာများလည်း ကျွန်းပင်စင်ကျေးရွာကဲ့သို့ လုပ်ကိုင်ပါကအလုပ်အကိုင်အခွင့်အလမ်းများ ဖန်တီးပေးနိုင်ပြီး ဒေသဖွံဖြိုးတိုးတက်မှုအတွက် အထောက်အကူပြုနိုင်မည်ဖြစ်ကြောင်း အကြံပြုရေးသားလိုက်ရပါသည်။
DOCA(မကွေး)