ယင်းမာပင်ခရိုင်သည် ဆီထွက်သီးနှံကို အဓိကစိုက်ပျိုးထွက်ရှိသည့် ခရိုင်တစ်ခုဖြစ်ပြီး နှမ်း၊ မြေပဲ၊ နေကြာသီးနှံများကို အဓိကစိုက်ပျိုးထုတ်လုပ်လျှက်ရှိပါသည်။ နှစ်စဉ် ဆီထွက်သီးနှံဧက (၄) သိန်းဝန်းကျင်ပုံမှန်စိုက်ပျိုးလျှက်ရှိသည့်အနက် နှမ်းသီးနှံမှာ စိုက်ဧက အများဆုံးဖြစ်သည်။ နှမ်းစိုက် ဧက (၆၀)% ရှိကြောင်း သက်ဆိုင်ရာဌာနများ၏ စာရင်းဇယားများအရ သိရှိရသည်။
ယခုနှစ်တွင် မိုးနှမ်းဧက (၁.၉)သိန်းခန့် စိုက်ပျိုးထွက်ရှိပြီး ဆောင်းနှမ်းဧက (၅)သောင်းကျော် စိုက်ပျိုးရန် လျာထားကြောင်း သိရသည်။ ဆောင်းနှမ်း (နှမ်းကြီး)ကို မြို့နယ် (၄)မြို့နယ်တွင် စိုက်ပျိုး သော်လည်း ကနီမြို့နယ်နှင့် ဆားလင်းကြီးမြို့နယ်တို့တွင် စိုက်ဧကအများဆုံးဖြစ်သည်။ အဆိုပါ မြို့နယ်များမှာ ချင်းတွင်းမြစ်ရိုးနှင့် နီးစပ်ပြီး မြေအောက်ရေလွယ်ကူစွာရရှိသည့်အတွက် နှစ်သီးစား စိုက်ပျိုးနိုင်သည့် အခွင့်အလမ်းများစွာရှိကြောင်း သိရသည်။ ဆောင်းနှမ်းကို စက်တင်ဘာလလယ်တွင် ပုံမှန်စိုက်ပျိုးပြီး ဒီဇင်ဘာလဆန်းပိုင်းတွင် ထွက်ရှိသည့် ဆောင်းနှမ်းရိတ်သိမ်းပြီးသည့် ရိုးပြတ်များတွင် ထွန်ယက်ပြုပြင်ကာ ကြက်သွန်နီနှင့်ကုလားပဲသီးနှံကို ရာသီအမီ စိုက်ပျိုးလေ့ရှိကြောင်း ဒေသခံတောင်သူများထံမှသိရှိရသည်။
ယခုနှစ်တွင်လည်း ဆောင်းနှမ်း( နှမ်းကြီး) စိုက်ပျိုးချိန် စက်တင်ဘာလဆန်းပိုင်းကတည်းက မိုးပုံမှန်ရွာသွန်းခဲ့သည့်အတွက် ဆောင်းနှမ်း (နှမ်းကြီး) စိုက်ပျိုးမည့် တောင်သူများအဖို့ အချိန်အခါ ကောင်းဖြစ်ခဲ့သည်။ ဆောင်းနှမ်း (နှမ်းကြီး) ကို စက်တင်ဘာလမကုန်မီ အပြီးစိုက်ပျိုးနိုင်ရေး ထွန်ရေးပြင်ဆင်စိုက်ပျိုးလျှက်ရှိကြောင်း ဒေသခံတောင်သူများထံမှ သိရှိရသည်။ လက်ရှိစိုက်ပျိုး နေသည့်မျိုးများမှာ သက်တမ်းတိုသည့် နှမ်းမျိုးများဖြစ်သည့်အတွက် နှမ်းညိုနှင့် ဆင်းရတနာ-၄နှမ်းဖြူမျိုးများဖြစ်ကြောင်း နှမ်းသီးနှံရိတ်သိမ်းပြီးပါက သီးထပ်အဖြစ် ဆောင်းကြက်သွန်နှင့်ကုလား ပဲသီးနှံများကို မြေအောက်ရေဖြင့် ရေသွင်းကာ ရာသီအမီစိုက်ပျိုးသွားရန် စီစဉ်ထားရှိ ကြောင်း နှမ်းစိုက်တောင်သူ ဦးသိန်းလှိုင်၏ ပြောပြချက်အရသိရှိရပါသည်။
လက်ရှိဒေသတွင်းဈေးကွက်၌ နှမ်းညိုတစ်တင်း (၈၅၀၀၀)ကျပ်၊ နှမ်းဖြူတစ်တင်း (၉၅၀၀၀)မှ (၁၀၀၀၀၀)၊ နှမ်းနက်တစ်တင်း (၈၅၀၀၀)မှ (၁၀၀၀၀၀)အသီးသီးပေါက်ဈေးရှိပြီး ပြည်တွင်းလုပ်ငန်းသုံးအဝယ်ရှိသလို ပြည်ပဝယ်လိုအားလည်း ရှိနေသည့်အတွက် အရောင်းအဝယ် ဖြစ်လျှက်ရှိ ကြောင်း သိရသည်။ ဆောင်းနှမ်း(နှမ်းကြီး)သီးနှံမှာ မိုးရေဖြင့် စိုက်ပျိုးဖြစ်ထွန်းရပြီး အပင်ဖြစ်ထွန်းချိန် ရာသီဥတုကောင်းမွန်ခြင်း၊ ရိတ်သိမ်းချိန်မှာလည်း ရာသီဥတု (မိုး၊ လေ)လွတ်ကင်းသည့်အတွက် အရည်အသွေးကောင်းမွန်ပြီး အလေအလွင့်နည်းပါးခြင်း၊ စိုက်ပျိုးရ လွယ်ကူပြီး ကုန်ကျစရိတ် သက်သာခြင်းနှင့် ပြည်ပဈေးကွက်ဝယ်လိုအားရှိနေခြင်းများကြောင့် တောင်သူများ ဆောင်းနှမ်း (နှမ်းကြီး) စိုက်ပျိုးရန် စိတ်အားထက်သန်လျှက်ရှိကြောင်း သိရှိရသည်။
ဆောင်းနှမ်း (နှမ်းကြီး)ရိတ်သိမ်းပြီးပါက သီးထပ်အဖြစ်စိုက်ပျိုးမည့် (ကြက်သွန်နီ၊ ကုလားပဲ)သီးနှံများ၏ လက်ငုတ်ဈေးများမှာလည်း ဈေးကောင်းရရှိနေသည့်အတွက် သီးထပ်စိုက်ပျိုးမည့် တောင်သူပိုမိုများပြားလာကြောင်း၊ သွင်းအားစုဈေးနှုန်းများ မြင့်တက်နေသော်လည်း သီးနှံများ၏ လက်ငုတ်ဈေးကောင်းမွန်နေသည့်အတွက် နှစ်သီးစားစိုက်ပျိုးမည့်အစီအစဉ်ဖြင့် ဆောင်းနှမ်း (နှမ်းကြီး)ကို လှိုင်လှိုင်စိုက်ပျိုးလျှက်ရှိပါကြောင်း ရေးသားတင်ပြလိုက်ရပါသည်။
DOCA(စစ်ကိုင်း)