ပဲခူးတိုင်းဒေသကြီး ၊ နတ်တလင်းခရိုင် ၊ ပေါင်းတည်မြို့နယ်ရှိ ပေါက်တန်းကျေးရွာတွင် ပဲတောင့်ရှည် များ စိုက်ပျိုးလျက်ရှိပါသည်။
ပဲတောင့်ရှည်စိုက်ပျိုးရန် မြေကိုရှေးဦးစွာမစိုက်ပျိုးမီ ဘောင်များဆွဲ၍ လုပ်ကိုင်ရပါသည်။ ဘောင်ပေး ရာတွင် တစ်ဧကဘောင်ပေးရန် လုပ်သားငှားရမ်းခ ၂၅၀၀၀/ကျပ်ဖြင့် ၃ ရက်ခန့်ဘောင်ပေးရပါသည်။ ပဲစေ့ချ စိုက်ပျိုးရန်လုပ်သားငှားရမ်းခ ၂၀၀၀၀/ ကျပ်ဖြင့် တစ်ဧကကို ၂ ရက်ခန့် စိုက်ပျိုးရပါသည်။ မျိုးစေ့များကို စိုက်ပျိုးရေးဆေးဆိုင်များမှဝယ်ယူရရှိပြီး နို့ဆီဗူး တစ်လုံးလျှင် (၅၀၀၀)/ ကျပ်ဖြင့်ဝယ်ယူစိုက်ပျိုးရရှိပါသည်။ အပင်များကြီးထွားပြီးအညွန့်တက်လာပါက ဝါးကျစ်ဝါးများကို တိုင်ထောင်ရန်အသုံးပြုရပါသည်။ တစ်ဧက တိုင်ထောင်ရန်အတွက် ဝါးကျစ်ဝါး ၂၀၀၀ မှ ၂၂၀၀ ထိ တိုင်ထောင်၍ စိုက်ပျိုးကြရပါသည်။ တိုင်ထောင်ရန်ဝါးကျစ်ဝါး တစ်လုံးလျှင် ၁၀၀ကျပ် မှ ၁၅၀ ကျပ်ပေး၍ ဝယ်ယူသုံးစွဲရပါသည်။ သွင်းအားစု သုံးစွဲမှုအနေဖြင့် ပိုးသတ်ဆေး၊ အပင်သန်ဆေး၊ အသီး၊ အပွင့်ဆေး၊ မှိုဆေး တို့ကို သုံးစွဲရန် လိုအပ်ပါသည်။ တစ်ဧကလျှင် သွင်းအားစုကုန်ကျစရိတ်မှာ ၁၈၀၀၀၀ကျပ်ခန့် ကုန်ကျနိုင်ပြီး စိုက်ပျိုးပြီးချိန်မှစ၍ နှစ်လ အကြာတွင် အသီးများစတင်ခူးဆွတ်နိုင်ပါသည်။ စတင်ခူးဆွတ်ချိန်မှ အသီးတုံးချိန်ထိ တစ်ရက်ခြား ခူးဆွတ် နိုင်ပြီး တစ်လခွဲကြာသည်ထိ ခူးဆွတ်ရကြောင်း သိရပါသည်။ အပင်စတင်စိုက်ပျိုးချိန်မှစ၍ အသီးသီးပြီး ခူးဆွတ်ချိန်ထိ စုစုပေါင်း တစ်ဧက ကုန်ကျစရိတ်မှ ၅၁၅၀၀၀/ကျပ်ခန့် ကုန်ကျကြောင်း သိရှိရပါသည်။ ပဲတောင့်ရှည်သီး အပင်ကောင်းလျှင် အသီးစတင်ပြီးသီးချိန်မှစ၍ အသီးတုံးသည့်အချိန်ထိ အတောင့်အရေအတွက် နှစ်သိန်းတောင့်မှ နှစ်သိန်းတစ်သောင်းခန့်အထိ ထွက်ရှိကြောင်းသိရှိရပါသည်။
ပဲတောင့်ရှည်သီးများကို တင်ပို့ရောင်းချရာတွင် ဝက်ပုတ်၊အင်းမ၊ပေါင်းတည်မြို့များရှိ ကုန်စိမ်းဒိုင် များသို့ ရောင်းချရပြီး ၊ တစ်တောင့်လျှင် ၈ ကျပ် မှ ၁၀ ကျပ်ထိ ဈေးနှုန်းအတက်/အကျဖြင့် ရောင်းချရပါသည်။ ပဲတောင့်ရှည်သီး တစ်ဧကကုန်ကျစရိတ်မှာ ငါးသိန်းကျော်ကုန်ကျနိုင်ပြီး တစ်ဧက ပျှမ်းမျှဝင်ငွေမှာ သိန်းနှစ်ဆယ်ခန့် ဝင်ငွေရရှိနိုင်ပါသည်။ တစ်ဧကအကျိုးအမြတ်အနေဖြင့် တစ်ဆယ့်ငါးသိန်းကျော် အမြတ် ရရှိနိုင်သဖြင့် ပဲတောင့်ရှည်စိုက် တောင်သူများ အကျိုးဖြစ်ထွန်းနေကြောင်းသိရှိရပါသည်။
DOCA(ပဲခူး)