အာဖဂန်နစ္စတန်နိုင်ငံ အနောက်ပိုင်း Herat ပြည်နယ်ရှိ Torghundi ဆိပ်ကမ်းမှတစ်ဆင့် အာဖဂန်နစ္စတန်မှ လတ်ဆတ်သော သလဲသီးများကို ရုရှားနိုင်ငံသို့ ပထမဆုံးအကြိမ် တင်ပို့ခဲ့ကြောင်း အာဖဂန်အစိုးရ ပြောရေးဆိုခွင့်ရှိသူက အောက်တိုဘာ ၂၇ ရက်တွင် ပြောကြားခဲ့သည်။
"ဤလုပ်ငန်းစဉ်သည် သစ်သီးဝလံများ အထူးသဖြင့် သလဲသီးများအတွက် ကြီးမားသောစျေးကွက်တစ်ခု ဖန်တီးပေးမည်ဖြစ်ပြီး ယင်းကြောင့် နိုင်ငံ၏ ပို့ကုန်ကဏ္ဍတွင် ပိုမိုတိုးတက်မှုကို တွန်းအားပေးမည်" ဟု Zabihullah Mujahid က ၎င်း၏ ဆိုရှယ်မီဒီယာ ပလက်ဖောင်း X တွင် ရေးသားခဲ့ကြောင်း သိရသည်။
အာဖဂန်နစ္စတန်၏ လတ်ဆတ်သောသီးနှံများနှင့် အခြောက်လှန်းထားသောအသီးများ တင်ပို့မှုသည် ပါကစ္စတန်နိုင်ငံသို့ အဓိက ဦးတည်တင်ပို့ရန်ရည်ရွယ်ထားလျက်ရှိသည်။ သို့သော် နှစ်နိုင်ငံကြား မကြာသေးမီက နယ်နိမိတ် တင်းမာမှုများကြောင့် ကုန်သွယ်မှု စီးဆင်းမှုကို အနှောင့်အယှက် ဖြစ်စေခဲ့သည်။ တစ်ချိန်တည်းတွင် အာဖဂန်နစ္စတန်သည် တာဂျစ်ကစ္စတန်၊ ဥဇဘက်ကစ္စတန်နှင့် တာ့ခ်မင်နစ္စတန်အပါအဝင် ဗဟိုအာရှနိုင်ငံများသို့ တင်ပို့မှု သိသိသာသာ အားကောင်းလာခဲ့ကြောင်း သိရှိရပါသည်။
Source : Xinhua
DOCA(ရန်ကုန်)