ကန်စွန်းရွက်သည် လူတန်းစားမရွေးကြိုက်နှစ်သက်သော အရွက်တစ်မျိုးဖြစ်ပြီး ရေရရှိသော နေရာများတွင် လွယ်ကူစွာပေါက်ရောက်ရှင်သန်နိုင်သည်။ကန်စွန်းရွက်များကို လယ်ကန်သင်း၊လယ်ကွက်၊အင်းအိုင်၊ချောင်းမြောင်းနှင့်အခြားရေရရှိသောနေရာများတွင်သဘာဝအလျောက် ပေါက်ရောက်မှုများ ရရှိနိုင်သလို တစ်နိုင်တစ်ပိုင်သော်လည်းကောင်း၊စီးပွားဖြစ်သော်လည်းကောင်း၊ သီးသန့်စိုက်ပျိုးခြင်းမှလည်း ထွက်ရှိကြ၍ ရာသီချိန်ခါမရွေး စားသုံးရသော သီးနှံတစ်မျိုးဖြစ်ပါသည်။ ကန်စွန်ရွက်မှာ ဗမာကန်စွန်းရွက်နှင့်တရုတ်ကန်စွန်းရွက် (စိုက်ပျိုးရေး)ဟူ၍ အများအားဖြင့် သိရှိကြ ပြီး ဗမာကန်စွန်းရွက်ကို ကြိုက်နှစ်သက်မှုများသော်လည်း မိုးတွင်းရာသီကာလမှသာ အများဆုံးထွက် ပေါ်ရရှိသဖြင့် စိုက်ပျိုးရေးကန်စွန်းကိုသာ အားပြုစားသုံးကြပါသည်။ မင်းလှမြို့နယ်အတွင်းရှိ ကျေးရွာများတွင် ကန်စွန်းရွက်များကို စိုက်ပျိုးကြကြောင်း သိရှိရပါသည်။၂၀၂၅-ခုနှစ်၊နိုဝင်ဘာလ ပထမပတ်အတွင်း ကန်စွန်းရွက်တစ်စည်းလျှင် ၂၀၀ ကျပ်၊ကန်းစွန်းရွက်(၃) စည်းလျှင် ၅၀၀ ကျပ်ဖြင့် ရောင်းချကြောင်း ကန်စွန်းရွက်များကို အိမ်ရှင်မများဟင်းချက်ရာတွင်လည်းကောင်း၊ စားသောက် ဆိုင်များနှင့် အထောင်းစုံရောင်းချသော ဆိုင်များမှလည်းကောင်း ဝယ်ယူကြသဖြင့် ကန်စွန်းရွက်များ အရောင်အဝယ်သွက်လျက်ရှိကြောင်း ကုန်စိမ်းရောင်းချသူတစ်ဦးထံမှ သိရှိရပါသည်။
DOCA(ပဲခူး)