အင်ဒိုနီးရှားနိုင်ငံသည် ပြည်တွင်း အထည်အလိပ်လုပ်ငန်းကို ကာကွယ်ရန် တစ်ပတ်ရစ် အ၀တ်အထည်များ တရားမဝင် တင်သွင်းမှုကို ဖြိုခွဲခဲ့

         ဒေသတွင်း အထည်အလိပ်လုပ်ငန်းကို ကာကွယ်ရန်နှင့် ပြည်သူ့ကျန်းမာရေးကို အကာအကွယ်ပေးရန်အတွက် တရားမဝင်တပတ်ရစ်အဝတ်အထည်များ တင်သွင်းမှုကိုနှိမ်နင်းရန် အင်ဒိုနီးရှားအစိုးရသည် ကြိုးပမ်းအားထုတ်မှုများကို အရှိန်မြှင့်လုပ်ဆောင်လျက်ရှိသည်။ ပြီးခဲ့သည့်နိုဝင်ဘာလ ၈ ရက်နေ့တွင် Riau ကျွန်းစုရှိ အကြီးဆုံးမြို့ဖြစ်သည့် Batam တွင် ဒေသခံရဲများက နိုင်ငံတွင်းသို့ အဝတ်အစားများ မှောင်ခိုကူးသည်ဟု သံသယရှိသူလူ ၂၅ ဦးကို ဖမ်းဆီးခဲ့သည်။ Tanjung Uncang ဧရိယာရှိ ထရပ်ကားသုံးစီးပေါ်မှ ကွန်တိန်နာနှစ်လုံးမှ တင်သွင်းလာသော သံသယဖြစ်ဖွယ် ကုန်ပစ္စည်းများအား မြို့တော်ကို ကြီးကြပ်သည့် Barelang ရဲတပ်ဖွဲ့က အဆိုပါ စစ်ဆင်ရေးကို ဆောင်ရွက်ခဲ့သည်။ အခင်းဖြစ်ပွားရာသို့ ရောက်ရှိလာသည့် ရဲတပ်ဖွဲ့ဝင်များက တရားဝင်စာရွက်စာတမ်းမရှိဘဲ သယ်ဆောင်လာခြင်းဖြစ်ကြောင်း တွေ့ရှိခဲ့သည်။ ဖမ်းဆီးခံရသူများတွင် ကုန်တင်ယာဉ်မောင်းများနှင့် ကုန်တင်လုပ်သားများလည်း ပါဝင်သည်။ ထိုဖမ်းဆီးရရှိမှုတွင် ရပ်ရွာလူထု၏ အခန်းကဏ္ဍကို ကျေးဇူးတင်ကြောင်း၊ ထိုသို့ ပူးပေါင်းဆောင်ရွက်မှုသည် Batam ဒေသမှာ လူကုန်ကူးသော အလေ့အကျင့်များကို အမြစ်ပြတ်ချေမှုန်းရာတွင် အထောက်အကူပြုကြောင်း Barelang ရဲချုပ် Zaenal Arifin က ပြောကြားခဲ့သည်။ အင်ဒိုနီးရှားသည် ၎င်း၏ပြည်တွင်းအထည်အလိပ် ကဏ္ဍကိုကာကွယ်ရန်၊ အလုပ်အကိုင်ထိန်းသိမ်းရန်နှင့် အထည်များနှင့်ဆက်စပ်သော ကျန်းမာရေးအန္တရာယ်များကို လျှော့ချရန်အတွက် တစ်ပတ်ရစ်အ၀တ်များ တင်သွင်းခြင်းကို ကာလရှည်ကြာတားမြစ်ထားသည်။ စည်းမျဥ်းများကြားမှ တင်သွင်းလာသော တစ်ပတ်ရစ်အဝတ်အထည်များ စုဆောင်းခြင်း သို့မဟုတ် စျေးဝယ်ခြင်းအလေ့အကျင့်သည် အင်ဒိုနီးရှားလူမျိုးများကြားတွင် ရေပန်းစားနေဆဲဖြစ်ပြီး အထူးသဖြင့် တံဆိပ်အသစ်အ၀တ် အထည်များသည် ပျမ်းမျှစားသုံးသူတတ်နိုင်သည်ထက် ပိုကုန်ကျလေ့ရှိသောကြောင့် ဖြစ်သည်။ အဆိုပါလမ်းကြောင်းသည် အွန်လိုင်းစျေးကွက်များနှင့် ဆိုရှယ်မီဒီယာပလပ်ဖောင်းများမှတစ်ဆင့် ကျယ်ပြန့်လာသည်။  အဆိုပါပြဿနာကို ကိုင်တွယ်ဖြေရှင်းရန် အစိုးရသည်အွန်လိုင်းမှ တင်သွင်း သော တပတ်ရစ်အဝတ်အစားများရောင်းချခြင်းကိုတားဆီးရန်အဓိက e-commerce ကုမ္ပဏီများ နှင့် ပူးပေါင်းဆောင်ရွက်ခဲ့သည်။ ပြီးခဲ့သည့် သီတင်းပတ်က အသေးစားနှင့် အလတ်စား စီးပွားရေး လုပ်ငန်းများ ဝန်ကြီးဌာနသည် ညှိနှိုင်းဆောင်ရွက်မှု အားကောင်းစေရန် အင်ဒိုနီးရှား E-commerce အသင်းမှ ကိုယ်စားလှယ် များနှင့် တွေ့ဆုံခဲ့သည်။ တစ်ပတ်ရစ်အဝတ်အထည်များ မှောင်ခိုရောင်းချမှုတွင် ပါဝင်ပတ်သက်သူများကို အစိုးရက ဒဏ်ငွေ၊ ပြစ်ဒဏ်များနှင့် အမည်ပျက်စာရင်းများ ချမှတ်မည်ဖြစ်ကြောင်း ဘဏ္ဍာရေးဝန်ကြီး Purbaya Yudhi Sadewa က အောက်တိုဘာလနှောင်းပိုင်းတွင် ပြောကြားခဲ့သည်။ အာဏာပိုင်များက ဆိပ်ကမ်းများတွင် ကြီးကြပ်ကွပ်ကဲမှု တင်းကျပ်ပြီး နိုင်ငံ၏ အထည်အလိပ်လုပ်ငန်းကို ပြန်လည်ရှင်သန်လာစေရန်အတွက် ပြည်တွင်းဖြစ် အထည်အလိပ် ထုတ်ကုန်များဆီသို့ ရွှေ့ပြောင်းရန် အထည်အလိပ် ကုန်သည်များကို တွန်းအားပေးဆောင်ရွက်သွားမည်ဖြစ်ကြောင်း ၎င်းက ပြောကြားခဲ့ကြောင်း သိရှိရပါသည်။

Source: Xinhua                                                                                            

DOCA (ရန်ကုန်)