ယခုလို နိုဝင်ဘာလဒုတိယပတ် ဆောင်းရာသီအခါ သမယတွင် ပေါ်ဦးပေါ်ဖျားဖြစ်သည့် ပြည် ဒေသထွက် ဆီးသီးများ မြို့ပေါ်ဈေးများသို့ စတင်ဝင်ရောက်လာပါသည်။ ယခုကာလတွင် ပြည်မြို့ အနောက်ဘက်ကမ်းရှိ ညောင်ပင်သာရွာ၊ ရွှေဘုံသာရွာ၊ မန်ကျည်းစုရွာ၊ ဆင်တဲကျေးရွာများမှ ဝင်ရောက် မှုရှိနေပြီး လှိုင်လှိုင်ပေါ်ချိန်ဖြစ်သော နတ်တော်၊ ပြာသိုလများမှသာ ပြည်မြို့အနီး တစ်ဝိုက် မှော်ဇာရွာ၊ ဇီးအုပ်ရွာ၊ နတ်တလင်းကျေးရွာများမှ လှိုင်လှိုင်ဝင်ရောက်ကြောင်းလည်း သိရသည်။ ဝင်ရောက်မှုရှိသော ဆီးသီးများမှာ ချိုချဉ်အရသာရှိပြီး ဆောင်းရာသီဓါတ်စာအဖြစ် စားသုံးကြပြီး စားသုံးသူတိုက်ရိုက် ဝယ်ယူစားသုံးကြသလို အချဉ်ပေါင်းသည်များမှ လက်ကား ဝယ်ယူပြီး ရောင်းချကြကြောင်းလည်း သိရှိ ရပါသည်။ ဆီးသီးကိုအစိမ်းစားလေ့ရှိပြီး ငံပြာရည်၊ ငရုတ် သီးမှုန့်၊ ဆားတို့နှင့်တို့စား၊ သုပ်စားကြသည့် အလေ့လည်းရှိပါသည်။ ဆီးသီးအမှည့်ကို အခြောက် လှန်းကာ ထန်းလျက်ဖြင့် ယိုထိုး၍လည်း စားသုံးကြ ပါသည်။ ဆီးယိုပြုလုပ်ရောင်းချသူများမှ ဆီးသီးလှိုင်လှိုင်ပေါ်ချိန်မှသာ ဝယ်ယူသိုလှောင်ကြကြောင်း လည်း သိရပါသည်။ ဆီးသီးတွင် ဗီတာမင် C, K, A ၊ အမျှင်ဓါတ်နှင့် ပိုတက်စီယမ်ဓါတ်တို့ ပါဝင်သည့် အတွက် ကိုယ်ခံစွမ်းအားကို တိုးတက်မြင့်မားစေကော အအေးမိ၊နှာစေး၊ချောင်းဆိုးခြင်းများကို မဖြစ်စေဘဲ စိတ်နှလုံး တည်ငြိမ်ကာ စိတ်ဖိစီးမှု ဖြေလျော့ပေးနိုင်ပြီး အာရုံကြောများကို ငြိမ်းအေးစေ၍ သဘာဝ အတိုင်း နှစ်ခြိုက်စွာ အိပ်ပျော်စေနိုင်ပါသည်။ သည်းခြေအားနည်းသည့် စိတ်ဝေဒနာရှင်များအား ဆီးသီး နှင့် ဆီးယိုတို့ကို ဓါတ်စာအဖြစ်စားသုံးနိုင်ပြီး အမျှင်ဓါတ်ပါဝင်ခြင်းကြောင့် အူကို သန့်စင်စေပြီး အစာခြေ စနစ်ကောင်းမွန်ကာ ဝမ်းမှန်စေပါသည်။ ဗီတာမင် C ကြွယ်ဝ၍ မကောင်းသော LDL ကိုလက်စထရော များကို ဖယ်ရှားပေးပြီး အရွယ်မတိုင်ခင် အိုမင်းရင့်ရော်မှုမှ ကာကွယ်ပေးကာ အသားအရေကြည်လင် တောက်ပစေပါသည်။ ဆီးသီးသည် ကျန်းမာရေးအကျိုးကျေးဇူး များစွာရှိသော်လည်း အလွန်အကျွံ စားသုံးပါက ဆီးကျောက်တည်ခြင်းကို ဖြစ်ပေါ်စေနိုင်ပြီး ဆီးသီးနှင့်စားတော်ပဲ တွဲစားမိပါက ဝမ်းလျှော စေနိုင်ကြောင်းလည်း သိရှိရပါသည်။ ပြည်မြို့ပေါ် ဈေးများတွင် ဆီးသီးနို့ဆီတစ်ဘူးလျှင် ကျပ် ၄၀၀ - ၅၀၀ ခန့်ဖြင့်ရောင်းချကြပြီး တစ်ပြည်လျှင် ကျပ် ၃၀၀၀ - ၄၀၀၀ ခန့်ဖြင့် လက်ကားရောင်းချကြောင်းလည်း သိရှိရပါသည်။
DOCA(ပဲခူး)