မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်း မြစ်ရေကျချိန်တွင် ညောင်တော၊ ညောင်ဘိုပင်၊ ရှစ်အိမ်တန်း၊ ဇီးကျွန်း၊ ကူတုတ်၊ အောင်ချမ်းသာ ကျေးရွာများတွင် လယ်ယာစိုက်ပျိုး ရေးလုပ်ငန်းအား အဓိကထားပြီး သီးနှံမျိုးစုံကို ရာသီအလိုက် စိုက်ပျိုးလုပ်ကိုင်ကြပါသည်။ ညောင်တော ကျေးရွာအုပ်စုတွင် ကုလားပဲသီးနှံကို ဧက (၃၀)ခန့် စိုက်ပျိုးထားရှိကြောင်း၊ ကုလားပဲ သီးနှံကို အောက်တိုဘာလနှင့် နိုဝင်ဘာလများတွင် ကြဲပတ်စနစ်နှင့် အတန်းလိုက်စနစ် စိုက်ပျိုးပြီး၊ အဓိကစိုက်ပျိုးသည့် ကုလားပဲသီးနှံမျိုးများမှာ ဟော်လန် (ကုလားပဲဝါ)၊ V2 / V6 (ကုလားပဲဖြူ) နှင့် 929 (ကုလားပဲဝါကြီး) များကို အများဆုံးစိုက်ပျိုးကြကြောင်း၊ မိမိအနေဖြင့် ယခင်နှစ်က ဟော်လန် (ကုလားပဲဝါ)ကို (၂) ဧက၊ 929 (ကုလားပဲဝါကြီး) (၁) ဧကနှင့် V2 (ကုလားပဲဖြူ) (၂) ဧက၊ စိုက်ပျိုးခဲ့ ကြောင်း၊ (၁) ဧက စိုက်ပျိုးကုန်ကျစရိတ်အနေဖြင့် မျိုး၊ မြေပြင်ခြင်း၊ သွင်းအားစုနှင့် ရိတ်သိမ်းခြင်း များအတွက် ကျပ်(၁၀) သိန်းခန့် ကုန်ကျကြောင်း၊ အထွက်နှုန်းအနေဖြင့် (၂၀) တင်းခန့် ထွက်ရှိခဲ့ပြီး ဈေးနှုန်း အနေဖြင့် ကျပ်(၈)သောင်းခန့်ရကြောင်း၊ အကျိုးအမြတ်အနေဖြင့် ကျပ်(၆) သိန်းခန့်ရရှိခဲ့ ကြောင်း သိရသည်။
ယခုနှစ်တွင် မိမိအနေဖြင့် ဟော်လန်(ကုလားပဲဝါ)ကို (၃)ဧကနှင့် V2 / V6 (ကုလားပဲဖြူ) (၃) ဧက၊ စိုက်ပျိုးခဲ့ကြောင်း၊ ကုလားပဲ (၁)ဧက စိုက်ပျိုးစရိတ်အနေဖြင့် မျိုး၊ မြေပြင်ခြင်း၊ သွင်းအားစုနှင့် ရိတ်သိမ်းခြင်းအတွက် (၁၂)သိန်းခန့်ကုန်ကျနိုင်ကြောင်း၊ အထွက်နှုန်းအနေဖြင့် (၂၀/၂၅)တင်းခန့် ထွက်ရှိနိုင်ကြောင်း၊ လက်ရှိပေါက်ဈေးအနေဖြင့် (၁)တင်းလျှင် ဟော်လန်(ကုလားပဲဝါ) ကျပ်(၈၁၀၀၀ )၊ V6 (ကုလားပဲဖြူ) ကျပ်(၇၉၀၀၀)နှင့် 929 (ကုလားပဲဝါကြီး) ကျပ်(၈၀၀၀၀)ရှိကြောင်း၊ ယခုလက်ရှိ အချိန်တွင် (၁) လသား သက်တမ်းခန့်ရှိပြီး ရာသီဥတုလည်းကောင်းမွန်သဖြင့် ကုလားပဲ ပင်များ ဝေဝေဆာဆာအောင်မြင်ဖြစ်ထွန်းလျက်ရှိကြောင်း၊ ဖေဖော်ဝါရီလကုန်နှင့် မတ်လဆန်း တွင် ရိတ်သိမ်းရမည်ဖြစ်ကြောင်း ကုလားပဲစိုက်တောင်သူ တစ်ဦး၏ ပြောပြချက်အရသိရှိရပါသည်။
DOCA(မကွေး)