ကမ္ဘောဒီးယားနိုင်ငံ၏ လေကြောင်းကဏ္ဍသည် ၂၀၂၅ ခုနှစ်၊ ဇန်နဝါရီမှ အောက်တိုဘာ လအထိ ကာလအတွင်း စုစုပေါင်းခရီးသည် ၅.၆၆ သန်း ဝင်ရောက်ခဲ့ပြီး ၂၀၂၄ ခုနှစ်ထက် ၁၄ ရာခိုင်နှုန်း တိုးတက်လာခဲ့ကြောင်း (SSCA) ၏ ၁၉-၁၁-၂၀၂၅ ရက်နေ့ကထုတ်ပြန်ခဲ့သော အစီရင်ခံစာအရ သိရသည်။ လက်ရှိလည်ပတ်နေသော နိုင်ငံတကာလေဆိပ်သုံးခုအနေဖြင့် Techo အပြည်ပြည်ဆိုင်ရာလေဆိပ်၊ Siem Reap Angkor အပြည်ပြည်ဆိုင်ရာလေဆိပ်နှင့် Sihanouk အပြည်ပြည်ဆိုင်ရာလေဆိပ်တို့ဖြစ်ကြပြီး အချက်အလက်များအရ အဆိုပါ လေဆိပ် သုံးခုသည် အဆိုပါကာလအတွင်း လေယာဉ်ခရီးစဉ် ၅၂,၉၅၄ ကြိမ်ကို ဝန်ဆောင်မှုပေးခဲ့ပြီး ယခင်နှစ်ထက် ၁၂ ရာခိုင်နှုန်း တိုးတက်လာကြောင်း အစီရင်ခံစာတွင် ဖော်ပြထားသည်။ လေကြောင်းကုန်စည်ပို့ဆောင်မှုပမာဏသည်လည်း သိသိသာသာ မြင့်တက်လာပြီး ၁၄ ရာခိုင်နှုန်း မြင့်တက်လာကာ တန်ချိန် ၇၄,၉၁၂ တန် ရှိခဲ့ကြောင်း အစီရင်ခံစာတွင် ဖော်ပြထားသည်။ SSCA ၏ ပြောရေးဆိုခွင့်ရှိသူ Sinn Chanserey Vutha က နိုင်ငံတော်၏ လေကြောင်းသယ်ယူပို့ဆောင်ရေးလုပ်ငန်း ခိုင်မာစွာတိုးချဲ့လာရခြင်းသည် အစိုးရ၏ မဟာဗျူဟာမြောက် မူဝါဒများနှင့် ခေတ်မီအခြေခံအဆောက်အအုံအသစ်များ အပါအဝင် အဓိကအချက်များစွာကြောင့် ဖြစ်ကြောင်း ပြောကြားခဲ့သည်။ SSCA သည် လေကြောင်းသယ်ယူပို့ဆောင်ရေး တိုးတက်မှုကို ဆက်လက်မြှင့်တင်နေပြီး စီးပွားရေး၊ ကုန်သွယ်ရေး၊ လူမှုရေးနှင့် ယဉ်ကျေးမှု ဆက်ဆံရေးများ၏ လိုအပ်ချက်များကို ဖြည့်ဆည်းပေးနေကြောင်း Vutha က ထပ်လောင်းပြောကြားခဲ့သည်။
DOCA(ရန်ကုန်)