ငွေနှင်းမှိုသည် အအေးဓာတ်ကို ကြိုက်နှစ်သက်သောမှိုဖြစ်ပြီး ယခင်က ပြင်ဦးလွင်ဒေသတွင် အများဆုံးစိုက်ပျိုးကြပြီး ယခုအခါ ဒေသစုံစိုက်ပျိုးလာကြောင်း သိရသည်။ငွေနှင်းမှိုသည် နွေရာသီတွင် အထွက်နှုန်းကောင်းပြီး ဆောင်းရာသီတွက် လူများလိုပင် ချမ်း၍ ကွေးနေသလိုပဲ အထွက်နှုန်း နည်းကြောင်း သိရသည်။ သန့်ရှင်းသော ပတ်ဝန်းကျင်တွင် ထားရှိရပြီး မှိုခူးရာတွင်လည်း သန့်ရှင်းစွာ ခူးရသည်။ မြင်းခြံမြို့၊ မြို့သစ်ရပ်တွင် အများဆုံးစိုက်ပျိုးပြီး ဒေသတွင်းဖြန့်ဖြူးရောင်းချလျက်ရှိပြီး သဘာဝထွက် မှိုများမပေါ်သောအချိန်တွင် ဈေးကွက်ဝယ် လိုအားကောင်းသဖြင့် မန္တလေးဈေးကွက်မှ ဝင်ယူရောင်းချကြောင်းသိရသည်။ ငွေနှင်းမှို ကို ငရုတ်သီးစိမ်းနှင့် အရည်ချို ချက်ပြုတ်၍လည်းကောင်း၊ မှိုနှင့်ကန်စွန်းရွက်ရော၍ ကြော်ချက်၍လည်းကောင်း စသည့်ဖြင့် ချက်ပြုတ်စားသောက်မှုများပြားကြသောကြောင့် ပုံမှန်ရောင်းအားကောင်းကြောင်း သိရသည်။ မြင်းခြံမြို့ အေးမြသီတာဈေး၊ မြို့မစည်ပင်သာယာဈေးနှင့် စံပြဈေးတို့တွင် သီးနှံများစုံလင်စွာရောင်းချလျက်ရှိရာ ငွေနှင်းမှိုမှာလည်းတစ်ခု အပါအဝင်ဖြစ်ပါသည်။ အေးမြသီတာ ဈေးရှိ ငွေနှင်းမှိုဈေးနှုန်းမှာ (၁၀) ကျပ်သားလျှင် (၁၅၀၀/၂၀၀၀)ကျပ်နှင့် တစ်ပိဿာလျှင် (၁၅၀၀၀/၁၈၀၀၀)ကျပ်ဖြင့် ရောင်းချလျက်ရှိကြောင်း၊ ရာသီအလိုက်မှိုထွက် နှုန်းကောင်းချိန်မကောင်းချိန်နှင့် သဘာဝမှိုများ ပေါ်ထွက်ချိန်တို့အလိုက် ဈေးနှုန်းအတက်အကျရှိကြောင်း သီးနှံရောင်းချသူတစ်ဦးထံမှသိရသည်။
DOCA(မန္တလေး)