ဆီထွက်သီးနှံမြေပဲ(အတောင့်/အဆံ)များ ပခုက္ကူဈေးကွက်သို့ နေ့စဉ်ဝင်ရောက်၍ အရောင်းအဝယ်ဖြစ်လျက်ရှိပါသည်။ မြေပဲတောင့်များကို ပခုက္ကူမြို့နှင့် နီးစပ်ရာကျေးရွာများနှင့် ညောင်ဦးမြို့ နယ် ဒေသကျေးရွာများမှ ဝင်ရောက်ပြီး မြေပဲဆံများကို ပခုက္ကူဒေသအပြင် ကျောက်ပန်းတောင်း၊ မုံရွာ၊ပြည်၊ မြန်အောင်မြို့များမှ ဝင်ရောက်အရောင်းအဝယ်ဖြစ်လျက်ရှိပါသည်။ မြေပဲလှိုင်လှိုင်ဝင်ရောက်၍ ကုန်ပစ္စည်းဝင်သလောက် အရောင်းအဝယ်ဖြစ်လျက်ရှိပြီး မြေပဲဈေးနှုန်းများ တရိပ်ရိပ်ကျဆင်းလျက်ရှိကြောင်း သိရှိရသည်။
နိုဝင်ဘာ(ပထမ)ပတ်အတွင်း နေ့စဉ်ပခုက္ကူဈေးကွက်သို့ မြေပဲတောင့် (၃)တင်း ဝင်အိတ် (၇၀၀) ခန့် (၁)ပတ်အတွင်း အိတ်(၅၀၀၀)ခန့်ဝင်ရောက်ပြီး မြေပဲဆံအဝင်မှာလည်း (၁)ရက်လျှင် (၂၅)ပိဿာဝင်ဆန့် အိတ်(၅၀၀)၊ (၁)ပတ်အတွင်း အိတ်(၃၅၀၀)၊ ပိဿာ(၉၀၀၀၀)ခန့် ဝင်ရောက် အရောင်းအဝယ်ဖြစ်သည်။ နိုဝင်ဘာလ(ပထမ)ပတ်တွင် မြေပဲတောင့်(အခြောက်) (၁) ပိဿာလျှင် ကျပ်(၁၅၀၀မှ ၃၀၀၀)ထိ အရောင်းအဝယ်ဖြစ်ပြီး မြေပဲဆံလုံးဆံ အကြီးအသေးလိုက်၍ (၁)ပိဿာလျှင် လက်ကားဈေး ကျပ်(၅၁၀၀ မှ ၄၃၀၀) ၊ လက်လီဈေး ကျပ်(၅၆၀၀ မှ ၄၈၀၀) ထိ အရောင်းအဝယ်ဖြစ်ကြောင်း၊ မြေပဲ(စက်)ဆီ (၁) ပိဿာလျှင် ကျပ်(၁၀၀၀၀/ ၉၅၀၀) ရှိကြောင်း ယခင်တစ်ပတ်ထက် ဈေးအနည်းငယ်ကျဆင်းသွားကြောင်း ပခုက္ကူမြေပဲဈေးကွက်မှ သိရှိရသည်။
ကုန်စည်စီးဆင်းမှုအနေဖြင့် နိုဝင်ဘာ(ပထမ)ပတ်တွင် မြေပဲတောင့်များကို မြို့ပေါ်ရှိ မြေပဲ ရောင်းဝယ်ရေးပဲခွဲစက် လုပ်ငန်းရှင်များနှင့် မြေပဲဆုံဆီ၊ စက်ဆီလုပ်ငန်းရှင်များမှ ဝယ်ယူလျက်ရှိပြီး ရန်ကုန်မြို့သို့ အများဆုံးတင်ပို့လျက်ရှိကြောင်း၊ မြေပဲဆံ(လုံးဆံ/ဆီဆံ)များကို ဆီစက်လုပ်ငန်းရှင် များ၊ မြေပဲဆားလှော်၊ မြေပဲကြက်ဥ လုပ်ငန်းရှင်များမှ ဝယ်ယူပြီး ပြည်တွင်းရှိ နေရာဒေသအနှံ့အပြား အမြို့မြို့အနယ်နယ်သို့လည်း တင်ပို့ဖြန့်ဖြူးလျက်ရှိပြီး ပြည်တွင်းသာမက ပြည်ပပို့ကုန်အဖြစ် မန္တလေးမြို့မှတစ်ဆင့် တရုတ်နိုင်ငံသို့ တင်ပို့လျက်ရှိကြောင်း၊ မြေပဲများဈေးကွက်အတွင်းသို့ အဝင်များပြီး အဝယ်လိုက်သော်လည်း ဈေးနှုန်းကျဆင်းလျက်ရှိကြောင်း သိရှိရသည်။
DOCA(မကွေး)