စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၌ မိုးမြေပဲစိုက်ဧက ငါးသောင်းကျော် နှစ်စဉ်စိုက်ပျိုးကြောင်း၊ တောင်သူများသည် ပြည်တွင်းစားသုံးဆီဖူလုံရေးအတွက် ဆီထွက်သီး နှံမြေပဲကို အဓိကထား၍ စိုက်ပျိုးကြကြောင်း သိရသည်။
ကန့်ဘလူမြို့နယ်အတွင်းရှိ နတ်ပေး၊ တောက္ကရှပ်၊ ကံကြီးကုန်း၊ ဆိပ်ဖူးမြောင်၊ လိတ္ထူ စသည့် ကျေးရွာများ၌ ပင်ထောင်အတောင့်သေးမျိုးများကို စိုက်ဧက ၅၀၀၀ ခန့်စိုက်ပျိုးထားရှိကြောင်း၊ မြေပဲသီးနှံကို မေလတွင် စတင်စိုက်ပျိုး၍ ဩဂုတ်လတွင် တူးဖော်ကြကြောင်း၊ စိုက်ပျိုးထုတ်လုပ်မှု ကုန်ကျစရိတ်အနေဖြင့် ငွေကျပ် ၈၅၀၀၀၀ ခန့်ကုန်ကျပြီး တစ်ဧက ပျမ်းမျှအထွက်တင်း ၄၈တင်းခန့် ထွက်ရှိကြောင်း၊ ယခုနှစ်တွင် စိုက်ပျိုးချိန်မှ တူးဖော်ချိန်အထိ ရာသီဥတုကောင်းမွန်သည့်အတွက် မြေပဲအထွက်နှုန်း ကောင်းမွန်ကြောင်း၊ ဒေသတွင်းပေါက်ဈေးအနေဖြင့် သီးနှံအရည်အသွေးပေါ်မူ တည်၍ မြေပဲတောင့်တစ်တင်းလျှင် ငွေကျပ် ၃၅၀၀၀-၃၈၀၀၀ ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ တစ်ဧကအကျိုးအမြတ်အနေဖြင့် ငွေကျပ် ၉၇၄၀၀၀ ခန့်အကျိုးအမြတ်ရရှိကြောင်း၊ ကန့်ဘလူမြို့နယ်အတွင်းမှ ထွက်ရှိသော မြေပဲများကို ဒေသခံဝယ်လက်(ပွဲစား)များမှ ဝယ်ယူ၍ ကန့်ဘလူဈေးကွက်သို့ တင်ပို့ရောင်းချပြီး ထိုမှတစ်ဆင့် မန္တလေးမြို့သို့ တင်ပို့ရောင်းချကြောင်း သိရသည်။
DOCA(စစ်ကိုင်း)