ပိန်းပန်းသည် အနံ့ကြောင့် ဂုဏ်ရှိတာမျိုးမဟုတ်ဘဲ အလှကြောင့်ဂုဏ်ရှိတဲ့ပန်းလို့ တင်စားလို့ရသော ပန်းတစ်မျိုးဖြစ်ပါသည်။ ပိန်းပန်းသည်လှပပြီး အလွန်ရေပန်းစားတဲ့ အလှစိုက်ပန်းပင်ဖြစ်ပြီး အရောင်မျိုးစုံရှိကာ နှလုံးပုံသဏ္ဍာန်အဖူးကြောင့် ထင်ရှားပါသည်။ ပိန်းပန်းကို ပွဲလမ်းသဘင်နှင့် အခမ်းအနားများ၌ တွင်တွင်ကျယ်ကျယ် အသုံးပြုလာခြင်းမှာ ရေရှည်ခံခြင်းနှင့် အကြမ်းခံခြင်းကြောင့် ဈေးကွက်တွင် နေရာရရှိလာခြင်းဖြစ်ပါသည်။ ဒါပေမဲ့ ပိန်းပန်းအပင်၊ အပွင့်၊ အရွက်တွေမှာ အဆိပ်ပါဝင်တာကြောင့် စားမိပါက ခံတွင်း၊ မျက်လုံး၊ အရေးပြားယားယံခြင်း၊ ဖူးရောင်ခြင်း၊ ပါးစပ်နာကျင်၊ ရောင်ရမ်းတာတွေ ဖြစ်နိုင်တာကြောင့် သတိထားရမယ့် အပင်တစ်မျိုး ဖြစ်ပါသည်။ အလှပန်းပင်စိုက်ပျိုးသူများအတွက် အိမ်တွင်းအပင်အဖြစ် တွင်ကျယ်စွာ စိုက်ပျိုးကြသည်။ အိမ်တွင် တစ်နိုင်တစ်ပိုင်ပဲစိုက်စိုက်၊ စီးပွားရေးအရ ပဲစိုက်စိုက် ပိန်းပန်းစိုက်ပျိုးသူများအတွက် ပိန်းပန်းပင်များသည် အခြားပန်းပင်များကဲ့သို့ ဓါတ်မြေဩဇာသုံးစွဲရန် မလိုအပ်ဘဲသဘာဝမြေဩဇာ ကြက်ချေးတစ်မျိုးတည်းကိုသာ သုံးစွဲရသဖြင့် စိုက်ပျိုးစရိတ် သက်သာသလို ရာသီမရွေးစိုက်ပျိုးနိုင်သည့် ပန်းမျိုးဖြစ်ကြောင်းနှင့် မိသားစုတစ်နိုင်တစ်ပိုင် စိုက်ပျိုးရန်သင့်တော်သည့် ပန်းမျိုးလည်းဖြစ်ကြောင်း သိရှိရပါသည်။ ပိန်းပန်းတွင် အပွင့်အကြီးမျိုးနှင့် အပွင့်အသေးမျိုးဟူ၍ (၂) မျိုးရှိပါသည်။ ပိန်းပန်း ပင်ကို မြေတွင်လည်းကောင်း၊ ရေတွင်လည်းကောင်း (၂) မျိုးစလုံးတွင် စိုက်ပျိုးနိုင်ပါသည်။ ယခု နောက်ပိုင်းတွင် ပိန်ပန်းကို အလှအိုးများနှင့် စိုက်ပျိုး၍ လက်ဆောင်ပေးလာကြသည့်အတွက် ဈေးကွက်တွင်ပိန်းပန်းပင်ဟာ နေရာတစ်နေရာရနေသည့် အလှပန်းပင်တစ်မျိုးလည်းဖြစ်ပါသည်။ ထို့အပြင် ပိန်းပန်းကို စီးပွားဖြစ် တစ်နိုင်တစ်ပိုင်စိုက်ပျိုးလာကြသူများ လည်းရှိကြပါသည်။ ပိန်းပန်း အိုးကြီးတစ်အိုးလျှင် အရောင်လိုက်၍ ကျပ် (၂၀၀၀၀)၊ ပိန်းပန်းအိုးလတ် တစ်အိုးလျှင်ကျပ် (၁၅၀၀၀)၊ ပိန်းပန်းအသေး တစ်အိုး လျှင် ကျပ် (၁၀၀၀) ရှိကြောင်း ပန်းအိုးပျိုးပင် စိုက်ပျိုးသူထံမှ သိရှိရပါသည်။ ပိန်းပန်းတွင် အဖြူရောင်၊ ပန်းရောင်၊ အနီရောင်၊ နှင့် အရောင်စပ်ကြား စသည့်အရောင်များဟာ အရောင်းရသွက်သလို၊ လူကြိုက်လည်းများလှပါသည်။ ပိန်းပန်းကို ပြည်မြို့ရှိ တစ်နိုင်တစ်ပိုင် စိုက်ပျိုးသူများနှင့် ရန်ကုန်မှတင်သွင်းကြောင်း သိရှိရပါသည်။ ပြည်မြို့မြို့မစည်ပင်သာယာဈေးကြီးနှင့် အခြားဈေးများတွင် ပိန်းပန်းအပွင့်ကြီး (၅)ပွင့်ပါတစ်စည်းလျှင် ကျပ် (၁၀၀၀၀)၊ ပိန်းပင် အပွင့်သေး တစ်စည်းလျှင် ကျပ် (၈၀၀၀) တို့ဖြင့် အရောင်းအဝယ်ရှိကြောင်း သိရှိရပါသည်။
DOCA(ပဲခူး)