ကယားပြည်နယ်၊ လွိုင်ကော်မြို့တွင် ရာသီပေါ် အသီးအနှံများ တစ်နိုင်တစ်ပိုင် စိုက်ပျိုး လျက်ရှိရာ ယခုလအတွင်း မုန်ညှင်းဖူး(ခေါ်)မုန်ညှင်းရွက်အမျိုးမျိုးကို ဈေးကွက်အတွင်း လတ်လတ်ဆတ်ဆတ်ခူးဆွတ်ကာ ရောင်းချကြသည်ကို မြင်တွေ့ရပါသည်။မုန်ညှင်းဖူးသည် အေးသော ရာသီ ဥတုကို နှစ်သက်သော အပင်မျိုးဖြစ်ပြီး အရသာမှာလည်း ချိုပါသည်။လွိုင်ကော်မြို့တွင် မုန်ညှင်း ဖူးပင်များကို မိုင်းလုံးရပ်ကွက်၊ မှုံပြာကျေးရွာနှင့်မိုက်ကန်းကျေးရွာတို့မှ အများဆုံး စိုက်ပျိုးထွက် ရှိပါသည်။အခြားဒေသများသို့ တင်ပို့ရောင်းချမှုများ မရှိသော်လည်း ဒေသတွင်း စားသုံးရန် အတွက် ဖူလုံမှုရှိသောကြောင့် အခြားဒေသများမှ မှာယူရောင်းချရန် မလိုအပ်ပါ။ ဒေသအတွင်း ရာသီစာ မုန့်ညှင်းဖူးများ လှိုင်လှိုင်ထွက်ရှိချိန်ဖြစ်၍ ဈေးနှုန်းမှာသင့်တင့်ပြီး စားသုံးသူများအနေဖြင့် ဈေး နှုန်းချိုသာစွာ ဝယ်ယူစားသုံးရပါသည်။လွိုင်ကော်မြို့၊ သီရိမင်္ဂလာဈေးတွင် မုန်ညှင်းဖူး တစ်စည်း လျှင် ယခင်လက(၅၀၀)ကျပ်မှ(၇၀၀)ကျပ်ခန့်ရှိပြီး ယခုလတွင်(၂၅၀)ကျပ်မှ(၃၀၀)ကျပ် ခန့်ရှိ ကြောင်း၊ ယခင်လနှင့်နှိုင်းယှဉ်ပါက ထက်ဝက်ခန့် ဈေးနှုန်းကျဆင်းလျက်ရှိကြောင်း ကုန်စိမ်း ရောင်းချနေသူ ဈေးသည်များထံမှ သိရှိရပါသည်။
DOCA(ကယား)