စစ်ကိုင်းတိုင်းဒေသကြီး၊ မုံရွာမြို့နယ်တွင် ကိုင်းခရမ်းချဉ်သီးကို မအူကျေးရွာ၊ တနောင်းတောကျေးရွာ၊ အောင်သာကျေးရွာ၊ လယ်စဉ်ကျေးရွာများတွင် စိုက်ပျိုးလျက်ရှိကြောင်း ခရမ်းချဉ်စိုက်တောင်သူများထံမှ သိရပါသည်။
ခရမ်းချဉ်စိုက်ပျိုးရာတွင် စပ်မျိုးခရမ်းချဉ်များဖြစ်သည့် တိုင်ထောင်ခရမ်းချဉ်၊ ငုတ်တုတ် ခရမ်းချဉ်နှင့် နွယ်ခရမ်းချဉ်မျိုးများအား ရွေးချယ်စိုက်ပျိုးကြကြောင်း၊ စတင်ပျိုးထောင်ချိန် ခရမ်းချဉ် စေ့တစ်စေ့ ပျိုးအိတ် တစ်အိတ်နှုန်းဖြင့်ထည့်ကာ ပျိုးထောင်ကြပြီး ရက်ပေါင်း (၂၀)ခန့်ရှိလျှင် ခရမ်းချဉ်စိုက်မည့် စိုက်ခင်းသို့ရွှေ့ပြောင်းစိုက်ပျိုးကြောင်းသိရသည်။ စိုက်ပျိုးပြီး တစ်လခန့်ကြာလျှင် စတင်အပွင့်ပွင့် အသီးသီးကြောင်း၊ နောက်ထပ်အပွင့်များ ပွင့်လာပြီး ခရမ်းချဉ်သီးများရင့်မှည့်ကာ ၃ လခန့်အကြာတွင် စတင်ခူးဆွတ် ရောင်းချကြကြောင်း သိရပါသည်။ စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင်တစ်ဧက လျှင် စုစုပေါင်း ငွေကျပ် ၁၅ သိန်းခန့် ကုန်ကျကြောင်း၊ စိုက်ဧက တစ်ဧကလျှင် ပိဿာချိန် ၃၀၀၀ - ၃၅၀၀ ခန့်ထွက်ရှိကြောင်း၊ မြေအနေအထားပေါ်မူတည်၍ အထွက်နှုန်းကွာဟမှုရှိကြောင်း သိရသည်။
ခရမ်းချဉ်သီးများကို တစ်ပတ်တစ်ခါခူးဆွတ်ရကြောင်း၊ ထွက်ရှိလာသည့် ခရမ်းချဉ်သီး များကို မုံရွာမြို့ ဈေးကွက်သို့လည်းကောင်း၊ ရန်ကုန်၊ မန္တလေးသို့ လည်းကောင်း လက်ကား တစ်ပိဿာလျှင် ၃၅၀၀ ကျပ်ဖြင့်တင်ပို့ရောင်းချလျက်ရှိပြီး အကျိုးအမြတ်အနေဖြင့်ကျပ်(၉၀၀၀၀၀၀)သိန်းခန့်ရရှိကြောင်း သိရသည်။
DOCA(စစ်ကိုင်း)